ಸ್ವಾತಂತ್ರ್ಯ ದಿನದಂದು ದೇಶದಲ್ಲೇ ಮೊದಲ ಪೆಂಗ್ವಿನ್ ಜನನದ ಸಂಭ್ರಮ
ಮುಂಬೈ, ಆಗಸ್ಟ್ 16: ಸ್ವಾತಂತ್ರ್ಯ ದಿನಾಚರಣೆ ಸಂಭ್ರಮಕ್ಕೆ ಬುಧವಾರ ಮತ್ತೊಂದು ಸಂತಸ ಸೇರ್ಪಡೆಯಾಗಿದೆ. ಮುಂಬೈನ ವೀರಮಾತಾ ಜೀಜಾಬಾಯಿ ಭೋಂಸ್ಲೆ ಉದ್ಯಾನ್ ಪ್ರಾಣಿ ಸಂಗ್ರಹಾಲಯದಲ್ಲಿ ಹಂಬೋಲ್ಟ್ ಪೆಂಗ್ವಿನ್ ಜನಿಸಿದೆ. ದೇಶದಲ್ಲೇ ಇದು ಮೊದಲ ಪೆಂಗ್ವಿನ್ ಜನನದ ಸಂಭ್ರಮ.
ಆಗಸ್ಟ್ 15ರಂದು ರಾತ್ರಿ 8 ಗಂಟೆ 02 ನಿಮಿಷಕ್ಕೆ ಮೊಟ್ಟೆಯೊಡೆದು ಪೆಂಗ್ವಿನ್ ಮರಿ ಆಚೆ ಬಂದಿತು. ಮರಿ ಚಟುವಟಿಕೆಯಿಂದ ಇದ್ದು, ತಾಯಿ ಹಕ್ಕಿ ಅದಕ್ಕೆ ಆಹಾರ ಉಣಿಸುವ ಪ್ರಯತ್ನ ಮಾಡುತ್ತಿದೆ ಎಂದು ಪ್ರಾಣಿ ಸಂಗ್ರಹಾಲಯದ ನಿರ್ದೇಶಕರೂ ಆದ ಡಾ.ಸಂಜಯ್ ತ್ರಿಪಾಠಿ ಮಾಹಿತಿ ನೀಡಿದ್ದಾರೆ.
ಈ ಪ್ರಾಣಿ ಸಂಗ್ರಹಾಲಯದಲ್ಲಿ ನಾಲ್ಕು ಹೆಣ್ಣು ಹಾಗೂ ಮೂರು ಗಂಡು ಪೆಂಗ್ವಿನ್ ಗಳಿವೆ. ಒಟ್ಟು ಆರು ಪೆಂಗ್ವಿನ್ ಗಳು ಅದಾಗಲೇ ಜೊತೆಯಾಗಿವೆ. ಆ ಪೈಕಿ ಒಂದು ಹೆಣ್ಣು ಪೆಂಗ್ವಿನ್ ಗೆ ಜೊತೆಗಾರನನ್ನು ಝೂನ ಸಿಬ್ಬಂದಿ ಹುಡುಕಾಡುತ್ತಿದ್ದಾರೆ. ಈ ಹೊಸ ಮರಿಯು ಝೂನ ಇತರ ಪೆಂಗ್ವಿನ್ ಗಳ ಜೊತೆಯಾಗಿದೆ.
ಒಟ್ಟು ಏಳು ಹಂಬೋಲ್ಟ್ ಪೆಂಗ್ವಿನ್ ಗಳನ್ನು ದಕ್ಷಿಣ ಕೊರಿಯಾದಿಂದ ಇಲ್ಲಿಗೆ ತರಲಾಗಿತ್ತು. ಆ ಪೈಕಿ ಒಂದು, ಡೋರಿ ಮೃತಪಟ್ಟಿತ್ತು.