ಮಂಗ್ಳೂರು ವಿಮಾನ ನಿಲ್ದಾಣದಲ್ಲಿ ಪ್ರಯಾಣಿಕನ ಬಳಿ 5 ಗುಂಡುಗಳು ಪತ್ತೆ
ಮಂಗಳೂರು, ಜೂನ್ 07 : ಮಂಗಳೂರು ವಿಮಾನ ನಿಲ್ದಾಣದಿಂದ ದೆಹಲಿಗೆ ಪ್ರಯಾಣ ಬೆಳಸುತ್ತಿದ್ದ ವ್ಯಕ್ತಿಯೋರ್ವನ ಬಳಿ 5 ಸಜೀವ ಗುಂಡುಗಳು ಪತ್ತೆಯಾಗಿವೆ.
ಮಂಗಳೂರಿನ ಮೊಹಮ್ಮದ್ ಶಫೀಕ್ ಎನ್ನುವಾತ ಮಂಗಳವಾರ ಬೆಳಗ್ಗೆ ಜೆಟ್ ಏರ್ ವೇಸ್ ನಲ್ಲಿ ಮಂಗಳೂರಿನಿಂದ ದೆಹಲಿಗೆ ಪ್ರಯಾಣಿಸಲು ಮಂಗಳೂರು ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬಂದಿದ್ದ ಸಂದರ್ಭದಲ್ಲಿ ಸಿಬ್ಬಂದಿಗಳು ಆತನನ್ನು ತಪಾಸಣೆಗೊಳಪಡಿಸಿದರು. ಈ ವೇಳೆ ಬ್ಯಾಗ್ ನಲ್ಲಿದ್ದ 0.22 ಎಂ.ಎಂ. ಗಾತ್ರದ 5 ಸಜೀವ ಗುಂಡು ಪತ್ತೆಯಾಗಿವೆ.
ಇನ್ನು ಈ ಬಗ್ಗೆ ಆತನಲ್ಲಿ ಪರವಾನಿಗೆ ಹಾಗೂ ದಾಖಲೆ ಪತ್ರಗಳ ಕುರಿತು ವಿಚಾರಿಸಿ ಆರೋಪಿಯನ್ನು ಬಜ್ಪೆ ಪೊಲೀಸರಿಗೆ ಹಸ್ತಾಂತರಿಸಲಾಗಿದೆ ಎಂದು ವಿಮಾನ ನಿಲ್ದಾಣದ ಸಿಬ್ಬಂದಿಗಳು ತಿಳಿಸಿದ್ದಾರೆ.
ತನ್ನ ತಂದೆ ತನ್ನ ಹೆಸರಿನಲ್ಲಿ ಗನ್ ಹೊಂದಿದ್ದಾರೆ. ಮತ್ತು 2016ರಲ್ಲಿ ಗೋವಾದಲ್ಲಿ ನವೀಕರಣಕ್ಕಾಗಿ ಪರವಾನಗಿ ನೀಡಲಾಗಿದೆ ಎಂದು ಶಾಫೀಕ್ ಬಜ್ಪೆ ಪೊಲೀಸರಿಗೆ ವಿವರಿಸಿದ್ದಾನೆ.
ಶಫೀಕ್ ನ ತಂದೆ ಪಿಸ್ತೂಲ್ ಮತ್ತು ಗುಂಡುಗಳನ್ನು ಸಾಗಿಸಲು ಪರವಾನಗಿ ಹೊಂದಿದ್ದಾರೆ. ಆದರೆ. ತಂದೆಯ ಲಗೇಜನ್ನು ಶಫೀಕ್ ಹೊಂದಿದ್ದರಿಂದ ಪ್ರಾಥಮಿಕ ತನಿಖೆಗಾಗಿ ಎಫ್ಐಆರ್ ದಾಖಲಿಸಲಾಗಿದೆ.
ತನಿಖೆ ನಂತರ ನ್ಯಾಯಾಲಯಕ್ಕೆ ಹಾಜರುಪಡಿಸಿ ಜಾಮೀನು ಮೇಲೆ ಬಿಡುಗಡೆ ಮಾಡಲಾಗಿದೆ ಎಂದು ಬಾಜ್ಪೆ ಪೊಲೀಸ್ ಇನ್ಸ್ ಪೆಕ್ಟರ್ ತಿಳಿಸಿದ್ದಾರೆ.