ಬರಬಹುದು ನಂಗು... ನಿಂಗು… ಡೆಂಗ್ಯೂ- ವೈರಲ್ ಆಯ್ತು ಪಾಪ್ ಶೈಲಿ ಹಾಡು
ಮಂಗಳೂರು, ಜುಲೈ 27: ಮಂಗಳೂರು ನಗರ ಸೇರಿದಂತೆ ದಕ್ಷಿಣ ಕನ್ನಡ ಜಿಲ್ಲೆಯಲ್ಲಿ ಡೆಂಗ್ಯೂ ಪ್ರಕರಣ ಹೆಚ್ಚಾಗುತ್ತಲೇ ಇದೆ. ಡೆಂಗ್ಯೂ ಜ್ವರದಿಂದ ಆಸ್ಪತ್ರೆಗೆ ದಾಖಲಾಗುತ್ತಿರುವವರ ಸಂಖ್ಯೆಯೂ ಬೆಳೆಯುತ್ತಿದೆ. ಡೆಂಗ್ಯೂ ನಿರ್ಮೂಲನೆಗೆ ಜಿಲ್ಲಾಡಳಿತ ಜಾಗೃತಿ ಅಭಿಯಾನವನ್ನೂ ಆರಂಭಿಸಿದೆ.
ಈ ನಡುವೆಯೇ ಡೆಂಗ್ಯೂ ಬಗ್ಗೆ ಜಾಗೃತಿ ಮೂಡಿಸುವ ಪಾಪ್ ಶೈಲಿಯ ಹಾಡೊಂದು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ. ತುಳು- ಕನ್ನಡ ಸಾಹಿತ್ಯ ಹೊಂದಿರುವ ಪಾಪ್ ಶೈಲಿಯ ಹಾಡು ಕಳೆದೆರಡು ದಿನಗಳಿಂದ ಮೊಬೈಲ್ ನಲ್ಲಿ ಹರಿದಾಡುತ್ತಿದೆ.
ಡೆಂಗ್ಯೂ ನಿಯಂತ್ರಣಕ್ಕೆ ಮಂಗಳೂರಿನಲ್ಲಿ ಡೆಂಗ್ಯೂ ಡ್ರೈವ್ ಡೇ
ಡೆಂಗ್ಯೂ ...ಡೆಂಗ್ಯೂ.....ಡೆಂಗ್ಯೂ ಬರಬಹುದು ನಂಗು..ನಿಂಗು... ಡೆಂಗ್ಯೂ ಗ್ ಇಜ್ಜಿ ಬೇಧ ಭಾವ...ಡೆಂಗ್ಯೂ ಬತ್ತಂಡ್ ಈ ಪೋವಾ... ಎಂದು ಆರಂಭವಾಗುವ ಈ ಹಾಡು ಹಾಸ್ಯದ ಜೊತೆ ಜೊತೆಗೇ ಡೆಂಗ್ಯೂ ಬಗ್ಗೆ ಜಾಗೃತಿ ಮೂಡಿಸುವಲ್ಲೂ ಪರಿಣಾಮಕಾರಿಯಾಗಿದೆ. ಮಂಗಳೂರಿನ ಕಲಾವಿದ ವಿಸ್ಮಯ ವಿನಾಯಕ್ ಈ ಹಾಡಿಗೆ ಸಾಹಿತ್ಯ ರಚಿಸಿದ್ದು, ಅವರದ್ದೇ ಧ್ವನಿ ಈ ಹಾಡಿನಲ್ಲಿದೆ. ಆರ್.ಜೆ.ಅರ್ಪಿತ್ ಅವರೂ ಜತೆಯಾಗಿದ್ದಾರೆ.
ಡೆಂಗ್ಯೂ ಕುರಿತು ಜಾಗೃತಿ ಮೂಡಿಸುವ ಕೆಲಸ 1 ನಿಮಿಷ 15 ಸೆಕೆಂಡ್ನ ಈ ಹಾಡಿನಲ್ಲಿ ನಡೆದಿದೆ. ನಿಂತ ನೀರಿನಲ್ಲಿ ಸೊಳ್ಳೆ ಉತ್ಪತ್ತಿಯಾಗುತ್ತದೆ. ಆದ್ದರಿಂದ ಮನೆ ಅಕ್ಕಪಕ್ಕ ಎಲ್ಲೂ ನೀರು ನಿಲ್ಲದಂತೆ ನೋಡಿಕೊಳ್ಳಬೇಕು. ನೀರು ನಿಂತಿರುವುದು ಕಂಡುಬಂದರೆ ಅದನ್ನು ಖಾಲಿ ಮಾಡಬೇಕು. ಇಲ್ಲವಾದಲ್ಲಿ ಸೊಳ್ಳೆ ಕಚ್ಚಿ ಸಾವು ಖಚಿತ ಎಂದೂ ಎಚ್ಚರಿಕೆ ನೀಡಲಾಗಿದೆ.