ಮಂಗಳೂರು; ಕೋವಿಡ್‌ಗೆ ಆರು ತಿಂಗಳ ಗರ್ಭಿಣಿ ವೈದ್ಯೆ ಬಲಿ

ಮಂಗಳೂರು, ಏಪ್ರಿಲ್ 28; ರಾಜ್ಯದಲ್ಲಿ ಕೊರೊನಾ ತಾಂಡವವಾಡುತ್ತಿದೆ. ಬಡವ, ಶ್ರೀಮಂತರೆನ್ನದೆ ಎಲ್ಲರ ಬಾಳಿನಲ್ಲೂ ಕಣ್ಣೀರ ಕೋಡಿ ಹರಿಸುತ್ತಿದೆ. ‌ಮಂಗಳೂರಿನಲ್ಲಿ ಕೋವಿಡ್ ಭೀಕರತೆ ಮೆರೆದಿದ್ದು, ಆರು ತಿಂಗಳ ಗರ್ಭಿಣಿ ವೈದ್ಯೆ ಬಲಿಯಾಗಿದ್ದಾರೆ.

ಮಂಗಳೂರಿನ ಕಣಚೂರು ಆಸ್ಪತ್ರೆಯ ವೈದ್ಯೆ ಡಾ. ಮಾಬಷಿರಾ (26) ಕೋವಿಡ್‌ನಿಂದಾಗಿ ಮೃತಪಟ್ಟಿದ್ದಾರೆ. ಕೇರಳದ ತಲಶೇರಿ ಮೂಲದ ನಿವಾಸಿ ಮಾಬಷೀರಾ, ಮಂಗಳೂರಿನ ಕಣಚೂರಿನ ಆಸ್ಪತ್ರೆಯಲ್ಲಿ ವೈದ್ಯರಾಗಿದ್ದರು. ಈಕೆಯ ಪತಿ ಡಾ. ಮಹಾಶವಾಫರ್ ಮಂಗಳೂರಿನ ಇಂಡಿಯಾನಾ ಆಸ್ಪತ್ರೆಯಲ್ಲಿ ವೈದ್ಯರು.

ಮಾಬಷೀರಾ ಅವರು ಕಣಚೂರು ಆಸ್ಪತ್ರೆಯಲ್ಲಿ ಕೋವಿಡ್ ರೋಗಿಗಳಿಗೆ ಚಿಕಿತ್ಸೆ ನೀಡುತ್ತಿದ್ದರು. ಆದರೆ ವೈದ್ಯೆಗೆ ಸೋಂಕು ತಗುಲಿದ್ದು, ಪತಿ ಕೆಲಸ ಮಾಡುತ್ತಿದ್ದ ಇಂಡಿಯಾನಾ ಆಸ್ಪತ್ರೆಗೆ ದಾಖಲು ಮಾಡಲಾಗಿತ್ತು. ಕಳೆದರೆಡು ದಿನಗಳಿಂದ ಆಸ್ಪತ್ರೆಯಲ್ಲಿ ಮಾಬಷೀರಾಗೆ ಚಿಕಿತ್ಸೆ ನೀಡಿದರೂ ಫಲಕಾರಿಯಾಗಿಲ್ಲ.

ಮಾಬಷೀರಾ ಅವರು ಆರು ತಿಂಗಳ ಗರ್ಭಿಣಿಯಾಗಿದ್ದು, ಗರ್ಭಿಣಿಯಾಗಿದ್ದರೂ ರೋಗಿಗಳಿಗೆ ನೀಡುತ್ತಿದ್ದ ಸೇವೆಯನ್ನು ಮುಂದುವರೆಸಿದ್ದರು. ರೋಗಿಗಳ ಆರೈಕೆ ಮಾಡುತ್ತಾ ಅವರಿಗೆ ಕೋವಿಡ್ ಸೋಂಕು ತಗುಲಿದೆ.

ವೈದ್ಯೆಯ ಜೊತೆಗೆ ಇಡೀ ಕುಟುಂಬಕ್ಕೆ ಕೊರೊನಾ ಸೋಂಕು ಆವರಿಸಿದ್ದು ಎಲ್ಲರಿಗೂ ಪಾಸಿಟಿವ್ ಕಂಡು ಬಂದಿತ್ತು. ಎಲ್ಲರೂ ಗುಣಮುಖರಾಗುತ್ತಿರೂ ಮಾಬಷೀರಾ ಆರೋಗ್ಯ ಮಾತ್ರ ಸುಧಾರಿಸಲಿಲ್ಲ. ಕೊರೊನಾ ವೈದ್ಯೆಯ ಜೊತೆಗೆ ಲೋಕ ಕಾಣಬೇಕಾಗಿದ್ದ ಮಗುವನ್ನು ಕೂಡಾ ಬಲಿ ಪಡೆದಿದೆ.

English summary

A 25-year-old woman doctor C. C. Maha Basheer who was undergoing treatment for Covid-19 succumbed to the disease. Maha Basheer who was 6 months pregnant was admitted to Indiana hospital.