ಮಂಗಳೂರಿನ ಸೇಂಟ್ ಆಗ್ನೆಸ್ ಕಾಲೇಜಿಗೆ 'ಎಕ್ಸೆಲೆನ್ಸ್' ಗೌರವ
ಮಂಗಳೂರು, ಫೆಬ್ರವರಿ 11: ನಗರದ ಅತ್ಯಂತ ಹಳೆಯ ಹಾಗು ಪ್ರತಿಷ್ಠಿತ ಸೇಂಟ್ ಆಗ್ನೆಸ್ ಮಹಿಳಾ ಕಾಲೇಜಿಗೆ, ಮಂಗಳೂರು ವಿಶ್ವವಿದ್ಯಾಲಯವು 'ಎಕ್ಸೆಲೆನ್ಸ್ ಕಾಲೇಜ್' ಎಂಬ ಪುರಸ್ಕಾರ ನೀಡಿ ಗೌರವಿಸಿದೆ.
ಈ ಪ್ರತಿಷ್ಠಿತ ಮಾನ್ಯತೆ ಪಡೆದ ಕಾಲೇಜುಗಳಲ್ಲಿ ಆಗ್ನೆಸ್ ಕಾಲೇಜ್ ಈಗ ರಾಜ್ಯದಲ್ಲೇ ಮೂರನೇ ಕಾಲೇಜ್ ಆಗಿದ್ದು, ಭಾರತದಲ್ಲೇ 18 ಕಾಲೇಜುಗಳ ಪೈಕಿ ಈ ಆಗ್ನೆಸ್ ಕಾಲೇಜು ಕೂಡಾ ಒಂದಾಗಿದೆ.[ಮಂಗಳೂರಿನ ಸೇಂಟ್ ಆಗ್ನೆಸ್ ಕಾಲೇಜಿನ ಪರಿಸರ ಪ್ರೇಮ]
ಈ ಹೊಸ ಗರಿಮೆಯಿಂದ ಈ ಕಾಲೇಜಿಗೆ ಹೊಸ ಪ್ರಯೋಗಾಲಯ, ಯಂತ್ರೋಪಕರಣಗಳಂತಹ ಸೌಲಭ್ಯಗಳನ್ನು ಅಪ್ಗ್ರೇಡ್ ಮತ್ತು ಸೆಮಿನಾರ್ ಕಾರ್ಯಾಗಾರ ವ್ಯವಸ್ಥಿತವಾಗಿ ನಡೆಸಲು ಸಹಕಾರಿಯಾಗಿದೆ. ಈ ಮಾನ್ಯತೆ ದೊರಕಿದ ಬಗ್ಗೆ ಸಂತಸ ವ್ಯಕ್ತಪಡಿಸಿ ಮಾತನಾಡಿದ ಕಾಲೇಜು ಪ್ರಾಂಶುಪಾಲರಾದ ಸಿಸ್ಟರ್ ಎಂ ಜೆಸ್ವಿನ, ಈ "ಎಕ್ಸೆಲೆನ್ಸ್ ಕಾಲೇಜ್" ಎಂಬ ಹೆಗ್ಗಳಿಕೆಗೆ ಪಾತ್ರವಾದ ನಮ್ಮ ಕಾಲೇಜ್ ಇನ್ನು ಮುಂದಿನ ದಿನಗಳಲ್ಲಿ ಯು.ಜಿ.ಸಿ ಮತ್ತು ಪಿ.ಜಿ ಮಟ್ಟದಲ್ಲಿ ಉತ್ತಮ ಗುಣಮಟ್ಟದ ಶಿಕ್ಷಣ ಸುಧಾರಣೆಯ ಗುರಿಯನ್ನು ಹೊಂದಿದೆ ಎಂದು ಒನ್ ಇಂಡಿಯಾಕ್ಕೆ ಹೇಳಿದರು.
ನಾಕ್ ನಡೆಸಿದ ಮಾನ್ಯತಾ ಪ್ರಕ್ರಿಯೆಯಲ್ಲಿ ಈ ಕಾಲೇಜು 'ಎ' ಗ್ರೇಡ್ ಪಡೆದಿದೆ. ಇದಲ್ಲದೆ 2016 ರಲ್ಲಿ ಯುಜಿಸಿಯಿಂದ 'ಉತ್ಕೃಷ್ಟ ಸಾಧನೆಯ ಸಾಮರ್ಥ್ಯವಿರುವ ಕಾಲೇಜ್' ಎನ್ನುವ ಮಾನ್ಯತೆಯನ್ನು ಪಡೆದ್ದಿದ್ದು ಈಗ ಅದರೊಂದಿಗೆ ಮಂಗಳೂರು ವಿಶ್ವವಿದ್ಯಾಲಯ 'ಎಕ್ಸೆಲೆನ್ಸ್ ಕಾಲೇಜ್' ಎಂದು ಘೋಷಣೆ ಮಾಡಲಾಗಿದೆ.
ಸೇಂಟ್ ಆಗ್ನೆಸ್ ಕಾಲೇಜು ಮಂಗಳೂರು , ಭಾರತದ ಪಶ್ಚಿಮ ಕರಾವಳಿಯ ಮೊದಲ ಕ್ಯಾಥೊಲಿಕ್ ಮಹಿಳೆಯರ ಕಾಲೇಜ್ ಆಗಿದ್ದು ಇದನ್ನು 1921ರಲ್ಲಿ ಮದರ್ ಆಲೋಯ್ಸಿಯ ಸ್ಥಾಪಿಸಿದ್ದಾರೆ.ಇನ್ನು 2021ನೇ ವರ್ಷದಲ್ಲಿ ಶತಮಾನೋತ್ಸವ ಆಚರಿಸಲಿದೆ.