ಕೆಥೋಲಿಕ್ ಶಾಲೆಗಳಲ್ಲಿ ಮಕ್ಕಳಿಗೆ ಇನ್ನು ಸಂವಿಧಾನ ಕಲಿಕೆ ಕಡ್ಡಾಯ

ಮಂಗಳೂರು ಜುಲೈ 12 : ಸಂವಿಧಾನದ ಪರಿಚಯ ಪ್ರತಿ ನಾಗರಿಕನಿಗೂ ಇರಲೇಬೇಕಾಗಿರುವುದು ಅತ್ಯಂತ ಅಗತ್ಯ. ಭಾರತೀಯ ಸಂವಿಧಾನದ ಕುರಿತು ಬಾಲ್ಯದಿಂದಲೇ ಮಕ್ಕಳಿಗೆ ಅರಿವು ಮೂಡಿಸುವ ಅಗತ್ಯತೆ ಇದೆ. ಈ ನಿಟ್ಟಿನಲ್ಲಿ ಕೆಥೋಲಿಕ್ ಕ್ರಿಶ್ಚಿಯನ್ ಆಡಳಿತ ಮಂಡಳಿಯ ಶಾಲೆಗಳಲ್ಲಿ ಇನ್ನು ಭಾರತೀಯ ಸಂವಿಧಾನ ಕಲಿಕೆ ಕಡ್ಡಾಯಗೊಳ್ಳಲಿದೆ.

ಕೆಥೋಲಿಕ್ ಕ್ರಿಶ್ಚಿಯನ್ ಚರ್ಚ್ ಆಡಳಿತದ ಶಾಲೆಗಳಲ್ಲಿ ಇನ್ನು ಭಾರತೀಯ ಸಂವಿಧಾನ ಕಲಿಕೆ ಕಡ್ಡಾಯವಾಗಲಿದೆ. ರಾಜ್ಯ ಸೇರಿದಂತೆ ದೇಶದ ಎಲ್ಲೆಡೆ ಕೆಥೋಲಿಕ್ ಕ್ರಶ್ಚಿಯನ್ ಚರ್ಚ್ ಆಡಳಿತದ 1 ರಿಂದ 10 ನೇ ತರಗತಿಯ ವರೆಗೆನ ಶಾಲೆಗಳಲ್ಲಿ ಇನ್ನು ಭಾರತೀಯ ಸಂವಿಧಾನವನ್ನು ಗುರುವಾರ ಪಠ್ಯವಾಗಿ ಕಲಿಸಲು ತೀರ್ಮಾನಿಸಲಾಗಿದೆ.

ಭಾರತೀಯ ಕೆಥೋಲಿಕ್ ಧರ್ಮಾಧ್ಯಕ್ಷರ ಮಂಡಳಿಯ ಶಿಕ್ಷಣ ಮತ್ತು ಸಂಸ್ಕೃತಿ ವಿಭಾಗ ಈ ಕುರಿತು ತೀರ್ಮಾನಿಸಿದ್ದು, ಸಂವಿಧಾನದ ಪೀಠಿಕೆಯಲ್ಲಿ ನಮೂದಿತ ವಿಷಯ ಕಲಿಸಲು 9 ಪುಟಗಳ ಕೈಪಿಡಿ ಸಿದ್ದಗೊಳಿಸಲಾಗಿದ್ದು, ಇದೇ ಜೂ.11ರಂದು ಬಿಡುಗಡೆಗೊಳಿಸಲಾಗಿದೆ.

ಬೆಂಗಳೂರಿನಲ್ಲಿ ಕಳೆದ ಫೆಬ್ರವರಿ ತಿಂಗಳಲ್ಲಿ ನಡೆದಿದ್ದ ಕೆಥೋಲಿಕ್ ಧರ್ಮಾಧ್ಯಕ್ಷರ 33 ನೇ ಅಧಿವೇಶನದಲ್ಲಿ ಈ ಕುರಿತು ನಿರ್ಣಯ ಕೈಗೊಳ್ಳಲಾಗಿದೆ. ಈ ಅಧಿವೇಶನದಲ್ಲಿ ದೇಶದ 176 ಮಂದಿ ಕ್ರೈಸ್ತ ಧರ್ಮಾಧ್ಯಕ್ಷರು ಭಾಗವಹಿಸಿದ್ದರು.

ಈ ಆಧಿವೇಶನದಲ್ಲಿ ಕೈಗೊಂಡ 20 ಪ್ರಮುಖ ನಿರ್ಣಯಗಳಲ್ಲಿ ಈ ಸಂವಿಧಾನ ಕಲಿಕಾ ನಿರ್ಣಯ ಕೂಡ ಒಂದಾಗಿದೆ. ಈ ಪ್ರಕ್ರಿಯೆಗೆ ಈಗಾಗಲೇ ಕೇರಳದ ಶಾಲೆಗಳಲ್ಲಿ ಚಾಲನೆ ನೀಡಲಾಗಿದೆ.

ಶಾಲೆಗಳಲ್ಲಿ ಭಾರತೀಯ ಸಂವಿಧಾನವನ್ನು 4 ಹಂತಗಳಲ್ಲಿ ಕಲಿಸಲು ತೀರ್ಮಾನಿಸಲಾಗಿದೆ. ಸಂವಿಧಾನದ ಪೀಠಿಕೆಯಲ್ಲಿರುವ 85 ಶಬ್ದಗಳನ್ನು ಮಕ್ಕಳಿಗೆ ಕಂಠ ಪಾಠ ಮಾಡಿಸುವುದು ಹಾಗೂ ಆ ಕುರಿತು ಮಕ್ಕಳಲ್ಲಿ ಆಶು ಭಾಷಣ ಏರ್ಪಡಿಸುವುದು.

ಸಂವಿಧಾನದ ಪೀಠಿಕೆಯ ಮಹತ್ವ ತಿಳಿಸುವುದು ಮತ್ತು ಗುಂಪು ಚರ್ಚೆ, ಕ್ವಿಜ್ ಪ್ರಬಂಧ ಸ್ಪರ್ದೆ ಏರ್ಪಡಿಸುವುದು ಸೇರಿದಂತೆ ಇನ್ನಿತರ ರೀತಿಯಲ್ಲಿ ಸಂವಿಧಾನ ಕಲಿಸಲು ತೀರ್ಮಾನಿಸಲಾಗಿದೆ.

English summary

Catholic schools going to introduce a syllabus on Indian constitution. Catholic Bishop's conference decided to introduce Indian constitution as a compulsory syllabus to Catholic institution school students.