ಪಶ್ಚಿಮ ಬಂಗಾಳದಲ್ಲಿ ಎರಡು ತಲೆ ಹಾವು ಪತ್ತೆ!
ಕಲ್ಕತ್ತಾ, ಡಿಸೆಂಬರ್ 11: ಪಶ್ಚಿಮ ಬಂಗಾಳದ ಮಿಡ್ನಾಪುರ ಜಿಲ್ಲೆಯ ಕಾಡಂಚಿನ ಹಳ್ಳಿಯೊಂದರಲ್ಲಿ ಎರಡು ತಲೆಯ ನಾಗರ ಹಾವೊಂದು ಕಾಣಿಸಿಕೊಂಡು ಅಚ್ಚರಿಗೆ ಕಾರಣವಾಗಿದೆ.
ಮಿಡ್ನಾಪುರ ಜಿಲ್ಲೆಯ ಬೆಲ್ಡಾ ಅರಣ್ಯ ವಲಯದ ಎಕರುಕಿ ಗ್ರಾಮವೊಂದರಲ್ಲಿ ಈ ಎರಡು ತಲೆಯ ಹಾವು ಕಾಣಿಸಿಕೊಂಡಿದೆ. ಇದರಿಂದ ತೀವ್ರ ಅಚ್ಚರಿಗೆ ಒಳಗಾದ ಗ್ರಾಮಸ್ಥರು, ಇದು ದೈವ ಸೃಷ್ಠಿ ಎಂದು ಅದಕ್ಕೆ ಪೂಜೆ ಮಾಡಿ, ಹಾಲುಣಿಸಿದ್ದಾರೆ. ಸುದ್ದಿ ತಿಳಿದು ಸ್ಥಳಕ್ಕೆ ಆಗಮಿಸಿದ ಅರಣ್ಯಾಧಿಕಾರಿಗಳಿಗೆ ಈ ಹಾವನ್ನು ವಶಕ್ಕೆ ಒಪ್ಪಿಸಲು ಗ್ರಾಮಸ್ಥರು ನಿರಾಕರಿಸಿದ ಘಟನೆ ನಡೆದಿತ್ತು.
ಮೈಸೂರಿನ ಕೋಳಿ ಫಾರಂನಲ್ಲಿ ಮರಿ ಚಿರತೆ ಪ್ರತ್ಯಕ್ಷ
ನಂತರ ಅರಣ್ಯ ಇಲಾಖೆ ಅಧಿಕಾರಿಗಳು ಜೀವಿಶಾಸ್ತ್ರಜ್ಞರ ಜೊತೆ ಗ್ರಾಮಕ್ಕೆ ಆಗಮಿಸಿ, ತಿಳಿ ಹೇಳಿದ ನಂತರ ಹಾವನ್ನು ಸುರಕ್ಷಿತವಾಗಿ ಅರಣ್ಯಕ್ಕೆ ಬಿಡಲಾಗಿದೆ. ಈ ಹಾವು ಯಾವುದೇ ದೇವರ ಸೃಷ್ಠಿ ಅಲ್ಲ. ಅಪರೂಪಕ್ಕೆ ಭ್ರೂಣದಲ್ಲಿ ಉಂಟಾದ ಜೈವಿಕ ವ್ಯತ್ಯಾಸದಿಂದ ಎರಡು ತಲೆಯ ಹಾವು ಹುಟ್ಟುತ್ತವೆ. ಸಯಾಮಿ ಶಿಶುಗಳಂತೆ ಇದೂ ಸಹ. ವಿಷಕಾರಿ ಹಾವು ಇದಾಗಿತ್ತು ಎಂದು ಅರಣ್ಯ ಇಲಾಖೆ ಅಧಿಕಾರಿಗಳು ತಿಳಿಸಿದ್ದಾರೆ.