ತ್ರಿಬಲ್ ರೈಡಿಂಗ್: ಶಿರಸಿಯಲ್ಲಿ ಕಾರು ಮಾಲೀಕನಿಗೆ ದಂಡ
ಶಿರಸಿ, ಅಕ್ಟೋಬರ್ 4: ಮೋಟಾರು ವಾಹನ ಕಾಯ್ದೆ ತಿದ್ದುಪಡಿಯ ನಂತರ ಸಂಚಾರಿ ಪೊಲೀಸರು ಒಂದಲ್ಲಾ ಒಂದು ಕಾರಣಕ್ಕೆ ಸುದ್ದಿಯಾಗುತ್ತಲೇ ಇದ್ದಾರೆ. ಶಿರಸಿಯಲ್ಲೂ ಇಂಥದ್ದೇ ಒಂದು ಉದಾಹರಣೆ ದೊರೆತಿದೆ. ತ್ರಿಬಲ್ ರೈಡಿಂಗ್ ಮಾಡಿ ಸಂಚಾರಿ ನಿಯಮ ಉಲ್ಲಂಘಿಸಿದ್ದಾಗಿ ಕಾರಿನ ಮಾಲೀಕರೊಬ್ಬರಿಗೆ ಪೊಲೀಸರು 2 ಸಾವಿರ ರೂಪಾಯಿ ದಂಡ ವಿಧಿಸಿದ್ದಾರೆ.
ದಾವಣಗೆರೆ: ಟ್ರಾಫಿಕ್ ಪೊಲೀಸ್ ಲಂಚಾವತಾರ ವಿಡಿಯೋದಲ್ಲಿ ಸೆರೆ
ಶಿರಸಿ ನಿಲೇಕಣಿಯ ಪ್ರದೀಪ ನಾಯ್ಕ ಎಂಬುವವರಿಗೆ ಕಾರು ನಂಬರ್ ಸಹಿತ ದಂಡದ ಪಾವತಿ ಪತ್ರ ಅಂಚೆ ಮೂಲಕ ಮನೆಗೆ ಬಂದಿದೆ. ಶಿರಸಿ ನಗರ ಠಾಣೆಯಿಂದ ಈ ಪತ್ರ ಬಂದಿದೆ. ಮೋಟಾರು ವಾಹನ ಕಾಯ್ದೆ 1988ರ ಕಲಂ 133ರ ಪ್ರಕಾರ ನಿಯಮ ಉಲ್ಲಂಘನೆ ಮಾಡಿರುವುದಾಗಿ ಆರೋಪಿಸಲಾಗಿದೆ.
ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಕಾರು ಮಾಲೀಕ, ಪೊಲೀಸರ ತಪಾಸಣೆ ಎಷ್ಟೊಂದು ಅವೈಜ್ಞಾನಿಕ ಎಂಬುದಕ್ಕೆ ಈ ಪತ್ರ ಸಾಕ್ಷಿಯಾಗಿದೆ. ಬೈಕ್ ಗೆ ಅನ್ವಯವಾಗುವ ನಿಯಮವನ್ನು ಕಾರಿಗೆ ಅನ್ವಯಿಸಿ, ದಂಡ ವಿಧಿಸಲಾಗಿದೆ. ವಾಹನ ಸವಾರರು ರಸ್ತೆ ಸುರಕ್ಷತಾ ನಿಯಮ ಪಾಲಿಸುವುದು ಕಡ್ಡಾಯವಾದಂತೆ ಇಲಾಖೆ ಕೂಡ ಪ್ರಾಮಾಣಿಕವಾಗಿ ಕಾರ್ಯನಿರ್ವಹಿಸುವುದು ಮುಖ್ಯವಾಗಿದೆ ಎಂದು ಹೇಳಿದ್ದಾರೆ.