ಜ. 18, 22ರಂದು ಮಕ್ಕಳಿಗೆ ಮರೆಯದೆ ಪೋಲಿಯೋ ಹಾಕಿಸಿ
ಬೆಂಗಳೂರು, ಜ. 17: ಕೇಂದ್ರ ಸರ್ಕಾರ ಪೋಲಿಯೋ ವಿರುದ್ಧ ಸಮರವನ್ನು ಮುಂದುವರಿಸಿದೆ. ಭಾನುವಾರ ಮತ್ತೆ ಪಲ್ಸ್ ಪೋಲಿಯೋ ಹಮ್ಮಿಕೊಂಡಿದೆ. 5 ವರ್ಷದೊಳಗಿನ ಮಕ್ಕಳಿಗೆ ಪೋಲಿಯೋ ಡ್ರಾಪ್ಸ್ ಹಾಕುವುದು ಮರೆಯಬೇಡಿ.
ಜ. 18 ಹಾಗೂ 22ರಂದು ಬೆಂಗಳೂರಿನ ಎಲ್ಲ ಆಸ್ಪತ್ರೆಗಳು, ಕ್ಲೀನಿಕ್, ಬಸ್ ನಿಲ್ದಾಣ, ರೈಲ್ವೆ ನಿಲ್ದಾಣ, ಮೆಡಿಕಲ್ ಶಾಪ್ ಸೇರಿದಂತೆ 3,390 ಕಡೆ ಪೋಲಿಯೋ ಹನಿ ಹಾಕಲು ವ್ಯವಸ್ಥೆ ಮಾಡಲಾಗಿದೆ.
ನೆರೆಮನೆಯಲ್ಲಿದೆ ಮಹಾಮಾರಿ : ಪ್ರಸ್ತುತ ಭಾರತ ಪೋಲಿಯೋ ಮುಕ್ತ ರಾಷ್ಟ್ರ ಎಂಬ ಹೆಗ್ಗಳಿಕೆ ಪಡೆದಿದೆ. ಈ ಕುರಿತು ವಿಶ್ವಸಂಸ್ಥೆಯೂ ಪ್ರಮಾಣಪತ್ರ ನೀಡಿದೆ. ಆದರೆ, ಮೂಲಭೂತವಾದಿಗಳ ಹಿಡಿತಕ್ಕೆ ಸಿಕ್ಕಿಬಿದ್ದಿರುವ ಪಾಕಿಸ್ತಾನ ಹಾಗೂ ಅಫ್ಘಾನಿಸ್ತಾನದಲ್ಲಿ ಪೋಲಿಯೋ ಡ್ರಾಪ್ಸ್ ಹಾಕಿಸಲೂ ಧಾರ್ಮಿಕ ಯೋಧರು ಅಡ್ಡಬರುತ್ತಿದ್ದಾರೆ! ಇದಕ್ಕೆ ಅವರ ಮಕ್ಕಳು ಬಲಿಯಾಗುತ್ತಿದ್ದಾರೆ. [ಜ. 18 ಹಾಗೂ 22 ಪೋಲಿಯೋ ದಿನ]
ಆದರೆ, ಪಕ್ಕದಲ್ಲಿಯೇ ಇರುವ ನಮಗೂ ಆ ವೈರಸ್ ಗಾಳಿ ಮೂಲಕ ಪಸರಿಸಬಹುದು. ನಾವು ಬಲಿಪಶುವಾಗಬಾರದಲ್ಲ. ಆದ್ದರಿಂದ ಈ ಭಾನುವಾರ ಪೋಲಿಯೋ ಹಾಕಿಸುವುದು ಮರೆಯಬೇಡಿ. ಪೋಲಿಯೋ ಎಂಬ ಮಹಾಮಾರಿ ಸೃಷ್ಟಿಸುವ ಸಮಸ್ಯೆಗಳ ಕುರಿತು ಒಂದು ನೋಟ ಇಲ್ಲಿದೆ.
ಪೋಲಿಯೋ ರೋಗದ ಲಕ್ಷಣಗಳು ಹೀಗಿರುತ್ತವೆ.
- ಜ್ವರ
- ಗಂಟಲು ನೋವು
- ತಲೆ ನೋವು
- ವಾಂತಿ
- ಆಯಾಸ
- ಬೆನ್ನು ನೋವು
- ಕುತ್ತಿಗೆ ನೋವು
- ಕೈ ಅಥವಾ ಕಾಲಿನಲ್ಲಿ ನೋವು
- ಸ್ನಾಯು ದೌರ್ಬಲ್ಯ ಅಥವಾ ಮೃದುತ್ವ
- ಮಿದುಳು ರೋಗ
- ತೀವ್ರ ಸ್ನಾಯು ನೋವು ಅಥವಾ ದೌರ್ಬಲ್ಯ
- ದೇಹದ ಪಾರ್ಶ್ವಗಳು ಜೋತು ಬೀಳುವುದು
ಪೋಲಿಯೋ ವೈರಸ್ ದಾಳಿಗೆ ತುತ್ತಾಗುವ ವ್ಯಕ್ತಿಯಲ್ಲಿ ಕಂಡುಬರುವ ಲಕ್ಷಣಗಳು.
- ಕೀಲುಗಳಲ್ಲಿ ನೋವು ಬಂದು ದುರ್ಬಲವಾಗುವುದು
- ತೀವ್ರ ಬಳಲಿಕೆ ಮತ್ತು ಸ್ನಾಯು ಕ್ಷೀಣತೆ
- ಉಸಿರಾಟ ಮತ್ತು ಆಹಾರ ನುಂಗಲು ಸಮಸ್ಯೆ
- ನಿದ್ರೆಯಲ್ಲಿ ಉಸಿರಾಟ ಸಮಸ್ಯೆ
- ತಾಪಮಾನದಲ್ಲಿ ಕಡಿಮೆ ಸಹನೆ
- ಏಕಾಗ್ರತೆ ಮತ್ತು ಜ್ಞಾಪಕ ಶಕ್ತಿ ಕಡಿಮೆಯಾಗುವುದು
- ಖಿನ್ನತೆ
ಹೀಗಾದರೆ ವೈದ್ಯರ ಹತ್ತಿರ ಹೋಗಿ.
- ನಿಯಮ ಪ್ರಕಾರ ಪೋಲಿಯೋ ಹನಿ ಹಾಕಿಸದಿದ್ದರೆ
- ಪೋಲಿಯೋ ಲಸಿಕೆ ಹಾಕಿದ ನಂತರ ಅಲರ್ಜಿ ಕಂಡುಬಂದರೆ
- ಪೋಲಿಯೋ ಇಂಜೆಕ್ಷನ್ ನೀಡಿದ ಜಾಗದಲ್ಲಿ ಕೆಂಪು ಗುರುತು ಕಂಡುಬಂದರೆ
- ಪೋಲಿಯೋ ಕುರಿತು ಯಾವುದೇ ಶಂಕೆ ಹೊಂದಿದ್ದರೆ
- ಪೋಲಿಯೋಕ್ಕೆ ತುತ್ತಾದ ಹಲವು ವರ್ಷಗಳ ನಂತರ ದೌರ್ಬಲ್ಯ ಕಾಣಿಸಿಕೊಂಡರೆ