ವಿಪಕ್ಷಗಳನ್ನು ಕಾಗೆ, ಕೋತಿ, ನರಿ ಎಂದ ಅನಂತಕುಮಾರ್ ಹೆಗಡೆ
ಶಿರಸಿ, ಜೂನ್ 29: "ಒಂದು ಕಡೆ ಕಾಗೆ, ಕೋತಿ, ನರಿಗಳು ಒಂದಾಗಿವೆ, ಇನ್ನೊಂದೆಡೆ ನಮ್ಮೊಂದಿಗೆ 'ಹುಲಿ' ಇದೆ. 2019 ರಲ್ಲಿ ಹುಲಿಯನ್ನು ಆರಿಸಬೇಕೋ, ಇತರರನ್ನೋ ಎಂದು ಯೋಚಿಸಿ" ಎಂದು ಉತ್ತರ ಕನ್ನಡ ಸಂಸದ ಅನಂತ ಕುಮಾರ್ ಹೆಗಡೆ ಹೇಳಿದ್ದಾರೆ.
ಹೆಗಡೆ ಅವರಿಗೂ ವಿವಾದಕ್ಕೂ ಅವಿನಾಭಾವ ಸಂಬಂಧ. ಸದಾ ಒಂದಿಲ್ಲೊಂದು ವಿವಾದಾತ್ಮಕ ಹೇಳಿಕೆ ನೀಡುವ ಅನಂತ ಕುಮಾರ್ ಹೆಗಡೆ ಇದೀಗ ವಿಪಕ್ಷಗಳನ್ನು ಕಾಗೆ, ಕೋತಿ, ನರಿಗಳಿಗೆ ಹೋಲಿಸಿರುವುದು ವಿಪಕ್ಷಗಳ ಕಣ್ಣನ್ನು ಕೆಂಪಾಗಿಸಿದೆ.
ಅನಂತ್ಕುಮಾರ್ ಹೆಗಡೆ ವಿರುದ್ಧ ಜೆಡಿಎಸ್ನ 'ಪುಟಗೋಸಿ' ಪ್ರತಿಭಟನೆ
ಅಷ್ಟೇ ಅಲ್ಲ, ಸಭೆಯಲ್ಲಿ ಮಾತನಾಡುತ್ತಿದ್ದ ಅವರು ಜನರನ್ನುದ್ದೇಶಿ. 'ನೀವೆಲ್ಲ ಈಗ ಪ್ಲಾಸ್ಟಿಕ್ ಖುರ್ಚಿಯಲ್ಲಿ ಕುಳಿತಿದ್ದೀರಾ. ಅಲ್ಲವೇ? ಅದಕ್ಕೆ ಕಾರಣ 70 ವರ್ಷಗಳ ಕಾಂಗ್ರೆಸ್ ಆಡಳಿತ. 70 ವರ್ಷಗಳಿಂದ ನಾವು ಆಡಳಿತ ನಡೆಸಿದ್ದರೆ ನೀವೀಗ ಬೆಳ್ಳಿ ಖುರ್ಚಿಯ ಮೇಲೆ ಕುಳಿತಿರುತ್ತಿದ್ದಿರಿ' ಎಂದು ಅವರು ಹೇಳಿದ್ದಾರೆ.
ಇತ್ತೀಚೆಗಷ್ಟೇ, 'ಜೆಡಿಎಸ್ ಒಂದು ಪುಟಗೋಸಿ ಪಕ್ಷ' ಎನ್ನುವ ಮೂಲಕ ಹೆಗಡೆ ವಿವಾದ ಸೃಷ್ಟಿಸಿದ್ದರು.
On one side crows, monkeys, foxes and others have come together, On the other side we have a tiger. In 2019, choose to elect the tiger: Ananthkumar Hegde,Union Minister in Karnataka's Karwar (28.6.18) pic.twitter.com/6V6G3iCfAa
— ANI (@ANI) June 29, 2018
'ಕಾಂಗ್ರೆಸ್ ಒಂದು ನಾಟಕದ ಕಂಪನಿ', 'ರಾಹುಲ್ ಗಾಂಧಿ ಒಬ್ಬ ಕೋಟಾ ಹಿಂದುತ್ವವಾದಿ' ಎಂಬಿತ್ಯಾದಿ ವಿವಾದಾತ್ಮಕ ಹೇಳಿಕೆಗಳೂ ಹೆಗಡೆ ಅವರ ಬತ್ತಳಿಕೆಯಿಂದ ಉದುರಿದ್ದವು!