ಕರ್ನಾಟಕದಿಂದ ಮೀರಾ ಕುಮಾರ್ ಗೆ ಭರ್ಜರಿ ಮತ ಚಲಾವಣೆ
ನವದೆಹಲಿ, ಜುಲೈ 20: ರಾಜ್ಯವಾರು ರಾಷ್ಟ್ರಪತಿಗಳಿಗೆ ಮತ ಚಲಾಯಿಸಿದ ಲೆಕ್ಕ ಬಹಿರಂಗವಾಗಿದೆ. ಪಶ್ಚಿಮ ಬಂಗಾಳ ಬಿಟ್ಟರೆ ವಿಪಕ್ಷಗಳ ಅಭ್ಯರ್ಥಿ ಮೀರಾ ಕುಮಾರ್ ರನ್ನು ಕರ್ನಾಟಕದಲ್ಲೇ ಹೆಚ್ಚಾಗಿ ಬೆಂಬಲಿಸಿದ್ದಾರೆ. ರಾಜ್ಯದಲ್ಲಿ ಕಾಂಗ್ರೆಸ್ ಆಡಳಿತವಿರುವುದೂ ಇದಕ್ಕೆ ಕಾರಣ.
ನೂತನ ರಾಷ್ಟ್ರಪತಿ ಸೇರಿದಂತೆ ಈವರೆಗಿನ ರಾಷ್ಟ್ರಾಧ್ಯಕ್ಷರ ಪರಿಚಯ
224 ಶಾಸಕರಲ್ಲಿ ರಾಜ್ಯದ 222 ಎಂಎಲ್ಎಗಳು ಮತ ಚಲಾಯಿಸಿದ್ದು ಇವರಲ್ಲಿ 163 ಶಾಸಕರು ಮೀರಾ ಕುಮಾರ್ ಪರ ಮತದಾನ ಮಾಡಿದ್ದಾರೆ. ಪ್ರತಿ ಮತದ ಮೌಲ್ಯ 131 ಆಗಿದ್ದು ಒಟ್ಟು 21,353 ಮೌಲ್ಯದ ಮತಗಳು ಮೀರಾ ಕುಮಾರ್ ಪರ ಚಲಾವಣೆಯಾಗಿವೆ. ಜೆಡಿಎಸ್ ಕೂಡಾ ಮೀರಾ ಕುಮಾರ್ ಅವರನ್ನೇ ಬೆಂಬಲಿಸಿದ್ದರಿಂದ ವಿಪಕ್ಷಗಳ ಅಭ್ಯರ್ಥಿ ಪರ ಭರ್ಜರಿ ಮತ ಚಲಾವಣೆಯಾಗಿದೆ.
ಇನ್ನು ರಾಮ್ ನಾಥ್ ಕೋವಿಂದ್ ಪರ ಕರ್ನಾಟಕದಲ್ಲಿ ಕೇವಲ 56 ಮತಗಳು ಚಲಾವಣೆಯಾಗಿದ್ದು ಮತಗಳ ಮೌಲ್ಯ 7,336 ಆಗಿದೆ. ಒಟ್ಟು 3 ಶಾಸಕರ ಮತಗಳು ಅಸಿಂಧುವಾಗಿವೆ. ಇನ್ನು ಜೆಡಿಎಸ್ ನ ವೈ.ಎಸ್.ವಿ ದತ್ತಾ ಹಾಗೂ ಚಲುವರಾಯಸ್ವಾಮಿ ಮತ ಚಲಾಯಿಸಿರಲಿಲ್ಲ.
ರೈತನ ಮಗ 14ನೇ ರಾಷ್ಟ್ರಪತಿ ರಾಮನಾಥ್ ಕೋವಿಂದ್
ಒಟ್ಟು ಶಾಸಕರು - 224
ಚಲಾವಣೆಯಾದ ಮತಗಳು - 222
ಪ್ರತೀ ಮತಗಳ ಮೌಲ್ಯ - 131
ಮೀರಾ ಕುಮಾರ್ ಪರ ಚಲಾವಣೆಯಾದ ಮತಗಳು -163, ಮೌಲ್ಯ21,353
ರಾಮ್ ನಾಥ್ ಕೋವಿಂದ್ ಪರ ಚಲಾವಣೆಯಾದ ಮತಗಳು - 56, ಮೌಲ್ಯ 7,336
ತಿರಸ್ಕೃತ ಮತಗಳು - 3, ಮೌಲ್ಯ 393
ಇನ್ನು ಕರ್ನಾಟಕಕ್ಕಿಂತ ಹೆಚ್ಚು ಪಶ್ಚಿಮ ಬಂಗಾಳದಲ್ಲಿ ಮೀರಾ ಕುಮಾರ್ ಪರ ಮತಚಲಾವಣೆಯಾಗಿದೆ. ಪಶ್ಚಿಮ ಬಂಗಾಳದಲ್ಲಿ 41,223 ಮೌಲ್ಯದ ಮತಗಳು ಮೀರಾ ಪರ ಚಲಾವಣೆಯಾಗಿವೆ. ನಂತರದ ಸ್ಥಾನದಲ್ಲಿ ಕರ್ನಾಟಕ ಇದ್ದು ಮೂರನೇ ಸ್ಥಾನದಲ್ಲಿ ಕೇರಳ ಇದೆ. ಇಲ್ಲಿ 20,973 ಮೌಲ್ಯದ ಮತಗಳು ಮೀರಾ ಕುಮಾರ್ ಗೆ ಬಿದ್ದಿವೆ.
ಇನ್ನು ಬಿಜೆಪಿ ಪರ ಅತೀ ಹೆಚ್ಚಿನ 69,680 ಮೌಲ್ಯದ ಮತಗಳು ಉತ್ತರ ಪ್ರದೇಶವೊಂದರಲ್ಲೇ ಚಲಾವಣೆಯಾಗಿವೆ. ಇನ್ನು ಆಂಧ್ರ ಪ್ರದೇಶದಲ್ಲಿ ಒಂದೇ ಒಂದು ಮತಗಳು ಮೀರಾ ಕುಮಾರ್ ಪರವಾಗಿ ಬಿದ್ದಿಲ್ಲ. ಇಲ್ಲಿ ಎಲ್ಲಾ ಮತಗಳು ಕೋವಿಂದ್ ರಿಗೇ ಬಿದ್ದಿವೆ.