ಆನೆಗಳ ಸಂಖ್ಯೆಯಲ್ಲಿ ಕರ್ನಾಟಕ ದೇಶಕ್ಕೆ ನಂಬರ್ 1
ಬೆಂಗಳೂರು, ಆಗಸ್ಟ್ 21: ಈಗ ದೇಶದಲ್ಲೇ ಅತೀ ಹೆಚ್ಚು ಆನೆಗಳಿರುವುದು ನಮ್ಮ ಕರ್ನಾಟಕದಲ್ಲಿ. ಹುಲಿಗಳ ನಂತರ ಇದೀಗ ಕರ್ನಾಟಕದಲ್ಲೇ ಅತೀ ಹೆಚ್ಚಿನ ಆನೆಗಳಿವೆ. 'ಆನೆ ಗಣತಿ 2017'ರ ಅಂಕಿ ಅಂಶಗಳಲ್ಲಿ ಇದು ಬಯಲಾಗಿದೆ.
ಐರಾವತಿ ಹಡೆದಿದ್ದಾಳೆ, ತಾಯಿ ಮಗು ಆರೋಗ್ಯವಾಗಿದ್ದಾರೆ
ಗಣತಿ ಪ್ರಕಾರ ಕರ್ನಾಟಕದಲ್ಲಿ 6,049 ಆನೆಗಳಿದ್ದರೆ ಎರಡನೇ ಸ್ಥಾನದಲ್ಲಿರುವ ಅಸ್ಸಾಂನಲ್ಲಿ 5,719 ಆನೆಗಳಿವೆ. ಮೂರನೇ ಸ್ಥಾನದಲ್ಲಿ ಕೇರಳ ಇದ್ದು, ಅಲ್ಲಿ 3,054 ಆನೆಗಳಿವೆ.
ಒಟ್ಟಾರೆ ದಕ್ಷಿಣ ಭಾರತದಲ್ಲಿ 11,960 ಆನೆಗಳಿದ್ದು ದೇಶದ್ಲಲೇ ಮೊದಲ ಸ್ಥಾನದಲ್ಲಿದೆ. ಈಶಾನ್ಯ ಭಾರತದಲ್ಲಿ 10,139, ಮಧ್ಯ ಪೂರ್ವ ಭಾಗದಲ್ಲಿ 3,128 ಮತ್ತು ಉತ್ತರ ಭಾಗದಲ್ಲಿ 2,085 ಆನೆಗಳಿವೆ.
ಕೊಡಗಿನಲ್ಲಿ ಕೃಷಿಕರಿಗೆ ಸಂಕಷ್ಟ ತಂದೊಡ್ಡುತ್ತಿರುವ ಕಾಡಾನೆಗಳು
ರಾಜ್ಯದ ನಾಗರಹೊಳೆ, ಬಂಡೀಪುರ ಮತ್ತು ಭದ್ರಾ ಅಭಯಾರಣ್ಯಗಳಲ್ಲಿ ಹೆಚ್ಚಿನ ಆನೆಗಳಿರುವುದು ತಿಳಿದು ಬಂದಿದೆ. ಜತೆಗೆ ಎಲ್ಲಾ ಅರಣ್ಯ ವಲಯಗಳಲ್ಲೂ ಆನೆಗಳ ಸಂಖ್ಯೆ ಗಣನೀಯವಾಗಿ ಹೆಚ್ಚಿದೆ ಎಂಬುದು ಈ ಬಾರಿಯ 7ನೇ ಆನೆ ಗಣತಿಯಿಂದ ತಿಳಿದು ಬಂದಿದೆ.
ಆನೆಗಳ ಸಂಖ್ಯೆ ಹೆಚ್ಚಾಗಿರುವುದು ಅರಣ್ಯ ಇಲಾಖೆ ಶ್ಲಾಘನೆಗೆ ಪಾತ್ರವಾಗಿದೆ. ಮೇಲಿಂದ ಮೇಲೆ ಕಾಡ್ಗಿಚ್ಚು, ಮಾನವ ಮತ್ತು ಆನೇಗಳ ಸಂಘರ್ಷ, ಹಲವು ಆನೆಗಳ ನಿಗೂಢ ಸಾವಿನ ಮಧ್ಯೆಯೂ ಆನೆಗಳ ಸಂಖ್ಯೆ ಹೆಚ್ಚಾಗಿರುವುದು ನಿಸರ್ಗಪ್ರಿಯರ ಮೆಚ್ಚುಗೆ ಗಳಿಸಿದೆ.
ಈ ಹಿಂದೆ ಹುಲಿ ಗಣತಿಯಲ್ಲೂ ಕರ್ನಾಟಕದಲ್ಲಿ ಅತೀ ಹೆಚ್ಚಿನ ಹುಲಿಗಳು ಕಂಡು ಬಂದಿತ್ತು.