ಅಚ್ಚರಿ : ಚಾಮರಾಜನಗರದ ಮಹಿಳೆ ತಲೆಯಲ್ಲಿ ಕೊಂಬು!
ಚಾಮರಾಜನಗರ, ಮಾರ್ಚ್ 24 : ದನದ ಕರುಗಳಿಗೆ ಕೊಂಬುಗಳು ಮೂಡಿ ಬರುವುದನ್ನು ನಾವೆಲ್ಲರೂ ನೋಡಿರುತ್ತೇವೆ. ಕೆಲವರಿಗೆ 'ಅಹಂಕಾರ'ದ ಕೊಂಬು ಬಂದಿರುವುದನ್ನೂ ನೋಡಿದ್ದೇವೆ. ಆದರೆ, ಈ ಮಹಿಳೆಯ ಮೇಲೆ ಬೆಳೆಯುತ್ತಿರುವ ಕೊಂಬಿದೆಯಲ್ಲ, ಅದು ತಲೆನೋವಿನ ಕೊಂಬು!
ಹೌದು, ಇದು ಅಚ್ಚರಿಯಾದರೂ ಸತ್ಯ. ಚಾಮರಾಜನಗರ ಜಿಲ್ಲೆಯ ಪುಣಜನೂರು ಸಮೀಪದ ಹೊಸಪೋಡು ಕಾಲೋನಿಯಲ್ಲಿ ವಾಸವಿರುವ ಮಹಿಳೆಯ ತಲೆಮೇಲೆ ಕೊಂಬು ಕಾಣಿಸಿಕೊಂಡಿದ್ದು, ಮಹಿಳೆ ಮತ್ತು ಕುಟುಂಬದವರಿಗೆ ಭಾರೀ ತಲೆನೋವಾಗಿ ಪರಿಣಮಿಸಿದೆ. [ಬೆತ್ತಲಾದಳು ಚಾಮರಾಜನಗರದ ಗುರುಬಸವಿ!]
ಚಾಮರಾಜನಗರ ತಾಲೂಕಿನ ಪುಣಜನೂರು ಗ್ರಾಮ ಪಂಚಾಯಿತಿಗೆ ಸೇರಿದ ಹೊಸಪೋಡು ಕಾಲೋನಿಯಲ್ಲಿ ವಾಸ ಮಾಡುತ್ತಿರುವ ಸೋಲಿಗ ಮಾದಮ್ಮರವರ ತಲೆಯಲ್ಲಿ ಕಳೆದ ಐದಾರು ವರ್ಷಗಳಿಂದ ಕೊಂಬು ಬೆಳೆದು ಬಳಿಕ ಉದುರಿ ಬೀಳುತ್ತದೆಯಂತೆ. ಮತ್ತೆ ಪುನಃ ಬೆಳೆಯುತ್ತದೆಯಂತೆ. ಈ ವಿಚಿತ್ರ ಘಟನೆ ನಿರಂತರವಾಗಿ ನಡೆಯುತ್ತಲೇ ಇದೆಯಂತೆ.
ಮೂಲತಃ ಬೇಡಗುಳಿ ನಿವಾಸಿಯಾಗಿರುವ ಮಾದಮ್ಮ ಕಳೆದ ಕೆಲ ವರ್ಷಗಳಿಂದ ಬೇಡಗುಳಿಯಿಂದ ಹೊಸಪೋಡಿಗೆ ಬಂದು ಸಂಸಾರ ಸಾಗಿಸುತ್ತಿದ್ದಾರೆ. ತಲೆಯಲ್ಲಿ ಕೊಂಬು ಮೂಡುತ್ತಿದ್ದಾಗ ತಲೆ ನೋವು ಆರಂಭವಾಗುತ್ತದೆ. ಕೊಂಬು ತಲೆಯಲ್ಲಿ ಇರುವ ತನಕ ವಿಪರೀತ ತಲೆನೋವು ಇರುತ್ತದೆಯಂತೆ. [ಚಾಮರಾಜನಗರದಲ್ಲಿ ಕಾವಲುಗಾರನನ್ನು ಬೇಟೆಯಾಡಿದ ಹುಲಿ]
ತುಂಬು ಸಂಸಾರದ ಮಧ್ಯೆ ಜೀವನ ನಡೆಸುತ್ತಿರುವ ಮಾದಮ್ಮನಿಗೆ ಸದಾ ತಲೆಯ ಕೊಂಬಿನದೇ ಚಿಂತೆಯಾಗಿದೆ. ಆರೇಳು ತಿಂಗಳಿಗೊಮ್ಮೆ ಬೆಳೆಯುವ ಈ ಕೊಂಬು ಬಳಿಕ ಉದುರಿ ಬೀಳುತ್ತದೆ. ಬಡತನದಲ್ಲಿರುವ ಕಾರಣ ಮಹಿಳೆ ಯಾವುದೇ ಆಸ್ಪತ್ರೆಗೆ ತೆರಳಿಲ್ಲ.
ಒಂದು ವೇಳೆ ಯಾರಾದರೂ ಈ ಬಗ್ಗೆ ಅಧ್ಯಯನ ಮಾಡಿಯೋ ಅಥವಾ ಶಸ್ತ್ರಚಿಕಿತ್ಸೆ ನಡೆಸಿ ಕೊಂಬು ಬೆಳೆಯುವ ತೊಂದರೆಯಿಂದ ರಕ್ಷಿಸಬಹುದಾ ಎಂದು ಅವರು ಕಾಯುತ್ತಿದ್ದಾರೆ. ಆದರೂ ಇದೊಂದು ರೀತಿಯಲ್ಲಿ ವೈದ್ಯಕೀಯ ಲೋಕಕ್ಕೆ ಸವಾಲಾಗಿ ಪರಿಣಮಿಸಿದೆ.