ಮುಸ್ಲಿಂ ಬ್ರದರ್‌ಹುಡ್‌ಗೆ ಆರೆಸ್ಸೆಸ್ ಹೋಲಿಸಿದ ಕಾಂಗ್ರೆಸ್ ನಾಯಕಿ ರಮ್ಯಾ

ಬೆಂಗಳೂರು, ಆಗಸ್ಟ್ 30: ಮುಸ್ಲಿಂ ಕೋಮುವಾದವನ್ನು ಪ್ರಚೋದಿಸುವ ಮುಸ್ಲಿಂ ಬ್ರದರ್‌ಹುಡ್‌ ಸಂಘಟನೆಗೂ ಆರ್ಎಸ್‌ಎಸ್‌ಗೂ ಅನೇಕ ಸಾಮ್ಯತೆಗಳಿವೆ ಎಂದು ಕಾಂಗ್ರೆಸ್ ನಾಯಕಿ ರಮ್ಯಾ ಟ್ವೀಟ್ ಮಾಡಿದ್ದಾರೆ.

ಕಾಂಗ್ರೆಸ್ ಅಧ್ಯಕ್ಷ ರಾಹುಲ್ ಗಾಂಧಿ ಇತ್ತೀಚೆಗೆ ಈ ಎರಡೂ ಸಂಘಟನೆಗಳು ಒಂದೇ ರೀತಿಯದ್ದಾಗಿವೆ ಎಂದು ಹೋಲಿಕೆ ಮಾಡಿದ್ದರು.

ಅದನ್ನು ಅನುಮೋದಿಸುವಂತೆ ರಮ್ಯಾ, ಮುಸ್ಲಿಂ ಬ್ರದರ್‌ಹುಡ್ ಮತ್ತು ಆರೆಸ್ಸೆಸ್ ನಡುವೆ ಹೋಲಿಕೆಗಳಿವೆ ಎಂದು ಟ್ವೀಟ್ ಮಾಡಿದ್ದಾರೆ. ಇವೆರಡೂ ಕಾಕತಾಳೀಯವೇ ಅಥವಾ ತಂತ್ರವೇ ಎಂಬ ಪ್ರಶ್ನೆಯನ್ನು ಮುಂದಿಟ್ಟಿದ್ದಾರೆ.

ಮುಸ್ಲಿಂ ಬ್ರದರ್‌ಹುಡ್ ಸ್ಥಾಪನೆಯಾಗಿದ್ದು 1920ರಲ್ಲಿ. ಆರೆಸ್ಸೆಸ್ ಕೂಡ 1920ರಲ್ಲಿ ಸ್ಥಾಪನೆಯಾಗಿದ್ದು. ಎರಡೂ ಸಂಘಟನೆಗಳು ಜಾತ್ಯತೀತ ದೇಶವನ್ನು ಆಕ್ರಮಿಸಲು ಬಯಸುತ್ತಿವೆ.

2011ರಲ್ಲಿ ಮಧ್ಯಪ್ರಾಚ್ಯ ಮತ್ತು ಉತ್ತರ ಆಫ್ರಿಕಾಗಳಲ್ಲಿ ನಡೆದ ಪ್ರತಿಭಟನೆಗಳು ಮುಸ್ಲಿಂ ಬ್ರದರ್‌ಹುಡ್‌ಗೆ ಉತ್ತೇಜನ ನೀಡಿ ಮೋರ್ಸಿಯನ್ನು ಅಧಿಕಾರಕ್ಕೆ ತಂದೆ, 2011ರಲ್ಲಿ ಅಣ್ಣಾ ಹಜಾರೆ ಚಳವಳಿ ಆರೆಸ್ಸೆಸ್‌ಗೆ ಪ್ರೋತ್ಸಾಹ ನೀಡಿ ಮೋದಿಯನ್ನು ಅಧಿಕಾರಕ್ಕೆ ತಂದಿತು.

ದೇಶದ ಮೇಲೆ ನಿಯಂತ್ರಣ ಸಾಧಿಸಲು ಬ್ರದರ್‌ಹುಡ್‌ ಬಯಸುತ್ತದೆ, ಅದೇ ರೀತಿ ಆರೆಸ್ಸೆಸ್ ಕೂಡ ನಿಯಂತ್ರಣಕ್ಕೆ ಬಯಸುತ್ತದೆ ಎಂದು ರಮ್ಯಾ ಟ್ವೀಟ್ ಮಾಡಿದ್ದಾರೆ.

ರಮ್ಯಾ ಅವರ ಟ್ವೀಟ್‌ಗೆ ತೀಕ್ಷ್ಣವಾದ ಪ್ರತಿಕ್ರಿಯೆಗಳು ಬಂದಿದ್ದು, ಈ ಹೋಲಿಕೆಯನ್ನು ಕಟುವಾಗಿ ಟೀಕಿಸಿದ್ದಾರೆ. ಇನ್ನು ಕೆಲವರು ರಮ್ಯಾ ಅವರನ್ನು ಸಮರ್ಥಿಸಿಕೊಂಡಿದ್ದಾರೆ.

pic.twitter.com/5a4kgRqXp9

— Divya Spandana/Ramya (@divyaspandana) 29 August 2018

ಆರೆಸ್ಸೆಸ್ ಹುಟ್ಟಿದ್ದು 1925ರಲ್ಲಿ ಸ್ಥಾಪನೆಯಾಗಿದ್ದೇ ಹೊರತು 1920ರಲ್ಲಿ ಅಲ್ಲ ಎಂದು ಅನೇಕರು ಹೇಳಿದ್ದಾರೆ. ಅರಬ್ ಪ್ರತಿಭಟನೆಗೂ ಅಣ್ಣಾ ಹಜಾರೆ ಅವರ ಹೋರಾಟಕ್ಕೂ ಹೋಲಿಕೆ ಮಾಡಿದ್ದನ್ನು ಕೆಲವರು ಖಂಡಿಸಿದ್ದಾರೆ.

ಅಲ್ಲದೆ, ಈಜಿಪ್ಟ್‌ನ ಅಧ್ಯಕ್ಷ ಮೋರ್ಸಿ ಅವರೊಂದಿಗೆ ಮನಮೋಹನ್ ಸಿಂಗ್ ದ್ವಿಪಕ್ಷೀಯ ಮಾತುಕತೆ ನಡೆಸಿದ್ದ ಸಂದರ್ಭವನ್ನು ಅವರಿಗೆ ನೆನಪಿಸಿದ್ದಾರೆ.

English summary

Congress leader Ramya Divya Spandana compared RSS with Muslim Brotherhood in twitter.