ಕೋವಿಡ್ ಚಿಕಿತ್ಸೆಗೆ ನೆರವಾಗಲಿದೆ ಆರೋಗ್ಯ ಸಂಜೀವಿನಿ ಪಾಲಿಸಿ

ಬೆಂಗಳೂರು, ಆಗಸ್ಟ್ 28: ಕರ್ನಾಟಕದಲ್ಲಿ ಗುರುವಾರ 9386 ಹೊಸ ಕೋವಿಡ್ ಪ್ರಕರಣಗಳು ದಾಖಲಾಗಿವೆ. ರಾಜ್ಯದಲ್ಲಿನ ಒಟ್ಟು ಸೋಂಕಿತರ ಸಂಖ್ಯೆ 309792ಕ್ಕೆ ಏರಿಕೆಯಾಗಿದೆ. ಸಕ್ರಿಯ ಪ್ರಕರಣಗಳ ಸಂಖ್ಯೆ 84,987.

ರಾಜ್ಯದಲ್ಲಿ ಕೋವಿಡ್ ಸೋಂಕಿತರ ಸಂಖ್ಯೆ ಹೆಚ್ಚಾದಂತೆ ಚಿಕಿತ್ಸೆ ಬಗ್ಗೆಯೂ ಚರ್ಚೆಗಳು ನಡೆಯುತ್ತಿವೆ. ಕೋವಿಡ್ ಸೋಂಕಿತರ ಚಿಕಿತ್ಸಾ ವೆಚ್ಚಗಳು ಹೆಚ್ಚಾಗುತ್ತಿವೆ. ಅದರಲ್ಲಿಯೂ ಖಾಸಗಿ ಆಸ್ಪತ್ರೆಗಳಲ್ಲಿ ವೆಚ್ಚ ಅಧಿಕವಾಗುತ್ತಿದೆ.

ಕೋವಿಡ್ ಸೋಂಕಿತರು ಕೊರೊನಾ ಕವಚ ಮತ್ತು ಆರೋಗ್ಯ ಸಂಜೀವಿನಿ ವಿಮೆ ಪಾಲಿಸಿಗಳ ಮೂಲಕ ಚಿಕಿತ್ಸಾ ವೆಚ್ಚವನ್ನು ಭರಿಸಬಹುದಾಗಿದೆ. ಆರೋಗ್ಯ ಇಲಾಖೆಯೇ ಈ ಕುರಿತು ಟ್ವೀಟ್ ಮಾಡಿದೆ.

ಆರೋಗ್ಯ ಸಂಜೀವಿನಿ ವಿಮೆ ಪಾಲಿಸಿಯನ್ನು ಯಾರು ಪಡೆಯಬಹುದು?. ಎಷ್ಟು ವೆಚ್ಚದ ಚಿಕಿತ್ಸೆ ಲಭ್ಯವಿದೆ?. ಯಾವ-ಯಾವ ಆಸ್ಪತ್ರೆಗಳು ಈ ವ್ಯಾಪ್ತಿಗೆ ಬರುತ್ತವೆ ಎಂಬ ಮಾಹಿತಿ ಇಲ್ಲಿದೆ.

ಯಾರು ವಿಮೆ ಪಡೆಯಬಹುದು?

ಆರೋಗ್ಯ ಸಂಜೀವಿನಿ ಪಾಲಿಸಿಯನ್ನು 18 ರಿಂದ 25 ವರ್ಷದೊಳಗಿನ ಜನರು ಪಡೆಯಬಹುದಾಗಿದೆ. ಈ ಪಾಲಿಸಿಯಿಂದಾಗಿ ವೈಯಕ್ತಿಕ ಭದ್ರತೆ ದೊರೆಯಲಿದೆ. ತಂದೆ-ತಾಯಿ, ಪತಿ-ಪತ್ನಿ, ಅತ್ತೆ-ಮಾವ, 25 ವರ್ಷದೊಳಗಿನ ಅವಲಂಬಿತ ಮಕ್ಕಳು ಇದರ ಪ್ರಯೋಜನ ಪಡೆಯಬಹುದಾಗಿದೆ.

ಕೊರೊನಾ ಕವಚ

ಕೊರೊನಾ ಕವಚದ ಮೂಲಕ ವೈಯಕ್ತಿಕ ಅಥವ ಕುಟುಂಬ ಸಹಿತ ವಿಮೆ ಯೋಜನೆಯನ್ನು ಆಯ್ದುಕೊಳ್ಳಿ. ಕೊವಿಡ್ 19 ಕಾರಣದಿಂದ ಆಸ್ಪತ್ರೆಗೆ ದಾಖಲಾದಲ್ಲಿ ಮೂಲ ವೆಚ್ಚವನ್ನು ಸುಭದ್ರತೆಯ ಆಧಾರದಲ್ಲಿ ಭರಿಸಲಾಗುತ್ತದೆ ಅಥವ ಆಸ್ಪತ್ರೆಯ ಪ್ರತಿ ದಿನದ ವೆಚ್ಚ ಐಚ್ಛಿಕ ಭದ್ರತೆಯನ್ನು ಲಾಭದಾಯಕವಾಗಿ ಭರಿಸಲಾಗುವುದು. ವಿಮೆಯ ಮೊತ್ತ 50,000 ರಿಂದ 5,00,000.

ಯಾವ-ಯಾವ ವಿಮಾ ಕಂಪನಿ

ಕೊರೊನಾ ಕವಚ ಮತ್ತು ಆರೋಗ್ಯ ಸಂಜೀವಿನಿ ಪಾಲಿಸಿಗಳನ್ನು ಮಾರುಕಟ್ಟೆಗೆ ತರಲು ಐಆರ್‌ಡಿಎಐ 30 ಸಾಮಾನ್ಯ ಮತ್ತು ಆರೋಗ್ಯ ವಿಮಾನ ಕಂಪನಿಗಳಿಗೆ ಅನುಮತಿ ನೀಡಿದೆ. ಅವುಗಳ ವಿವರಗಳು ಚಿತ್ರದಲ್ಲಿವೆ ನೋಡಿ.

ವಿಮಾ ಕಂಪನಿಗಳ ವಿವರ

ಕೋವಿಡ್ ಸೋಂಕಿತರು ಕೊರೊನಾ ಕವಚ ಮತ್ತು ಆರೋಗ್ಯ ಸಂಜೀವಿನಿ ವಿಮೆ ಪಾಲಿಸಿಗಳ ಮೂಲಕ ಚಿಕಿತ್ಸಾ ವೆಚ್ಚವನ್ನು ಭರಿಸಬಹುದಾಗಿದೆ. ವಿಮೆ ಮಾಡಿಸಲು ಈ ಕಂಪನಿಗಳನ್ನು ಸಂಪರ್ಕಿಸಬೇಕಾಗುತ್ತದೆ.

English summary

Know About Arogya Sanjeevani Policy. People in the Karnataka can pay COVID treatment expenses via Arogya Sanjeevani policy.