ಕ್ಯಾಲಿಫೋರ್ನಿಯಾ ಗಡಿಯಲ್ಲಿ ಭಾರೀ ಕಾಳ್ಗಿಚ್ಚು, ಮಾರ್ಗಗಳು ಬಂದ್
ಅಮೆರಿಕದ ಪಶ್ಚಿಮ ಭಾಗದಲ್ಲಿ ಭಾರೀ ಕಾಳ್ಗಿಚ್ಚು ಕಾಣಿಸಿಕೊಂಡಿದೆ. ಅಧಿಕಾರಿಗಳು ನೀಡಿದ ಮಾಹಿತಿ ಪ್ರಕಾರ, ಕ್ಯಾಲಿಫೋರ್ನಿಯಾದ ಗಡಿಯಾದ ಒರೆಗಾನ್ ದಕ್ಷಿಣದ I 5 ಅನ್ನು ದಾಟಿ ಕಾಳ್ಗಿಚ್ಚು ಹಬ್ಬಿದೆ. ಈ ಪ್ರದೇಶದ ದಕ್ಷಿಣ ಭಾಗದ ಮಾರ್ಗಗಳನ್ನು ಮುಚ್ಚಲಾಗಿದೆ.
ಒರೆಗಾನ್ ಸಾರಿಗೆ ಇಲಾಖೆ ಮಾಹಿತಿ ಪ್ರಕಾರ, ಒರೆಗಾನ್, ಆಶ್ ಲ್ಯಾಂಡ್ ನ ದಕ್ಷಿಣ ಭಾಗದ ಮಾರ್ಗಗಳು ಇನ್ನೂ ಕೆಲ ಕಾಲ ಮುಚ್ಚಿರಲಿವೆ. ಎಷ್ಟು ಸಮಯ ಮುಚ್ಚಿರಲಿವೆ ಎಂಬ ಬಗ್ಗೆ ತಿಳಿಸಿಲ್ಲ. ಒರೆಗಾನ್ ನಿಂದ ಕ್ಯಾಲಿಫೋರ್ನಿಯಾಕ್ಕೆ ತಲುಪಬೇಕಾದ ವಾಹನ ಪ್ರಯಾಣಿಕರು ಒರೆಗಾನ್ 58 ಅಥವಾ 140ರ ಮೂಲಕ ಯುಎಸ್ 97 ತಲುಪುವಂತೆ ಸೂಚಿಸಲಾಗಿದೆ.
ಈ ಕಾಳ್ಗಿಚ್ಚನ್ನು ಕ್ಲಮಥಾನ್ ಎಂದು ಕರೆಯಲಾಗಿದ್ದು, ಗುರುವಾರ ಮಧ್ಯಾಹ್ನದಿಂದ ಆರಂಭವಾಗಿದೆ. ಇದರಿಂದ ಕ್ಯಾಲಿಫೋರ್ನಿಯಾದ ಹಾರ್ನ್ ಬ್ರೂಕ್ ನಿಂದ ಸಾವಿರಾರು ಮಂದಿಯನ್ನು ಸ್ಥಳಾಂತರ ಮಾಡಲಾಗಿದೆ. ಈ ಕಾಳ್ಗಿಚ್ಚಿನಿಂದ ಇಪ್ಪತ್ತು ಚದರ ಕಿಲೋಮೀಟರ್ ವ್ಯಾಪ್ತಿಯಷ್ಟು ಸುಟ್ಟು ಹೋಗಿದೆ. ಹಲವು ಬಗೆಯಲ್ಲಿ ಹಾನಿಯಾಗಿದೆ.
ಜನರಿಗೆ ಹಾಗೂ ಆಸ್ತಿಗೆ ಹಾನಿಯಾಗಬಹುದು ಎಂಬ ಮುನ್ನೆಚ್ಚರಿಕೆಯಿಂದ ಕ್ಯಾಲಿಫೋರ್ನಿಯಾದ ಗವರ್ನರ್ ಜೆರಿ ಬ್ರೌನ್ ತುರ್ತು ಪರಿಸ್ಥಿತಿ ಘೋಷಣೆ ಮಾಡಿದ್ದಾರೆ.