ಹಣದುಬ್ಬರ ಬಿಕ್ಕಟ್ಟು: ಕರೆನ್ಸಿಯಲ್ಲಿ 5 ಸೊನ್ನೆ ಕಡಿತಗೊಳಿಸಿದ ವೆನಿಜುವೆಲಾ
ಕರಾಕಸ್, ಜುಲೈ 26: ತೀವ್ರ ಹಣದುಬ್ಬರದಿಂದ ತತ್ತರಿಸಿರುವ ವೆನೆಜಿವೆಲಾ, ತನ್ನ ಕರೆನ್ಸಿಯಲ್ಲಿ ಐದು ಸೊನ್ನೆಗಳ ಕಡಿತವನ್ನು ಪ್ರಕಟಿಸಿದೆ.
ದೇಶದ ಹಣದುಬ್ಬರ ಪ್ರಮಾಣದ ಈ ವರ್ಷಾಂತ್ಯದ ವೇಳೆಗೆ ಶೇಕಡ ಒಂದು ಮಿಲಿಯನ್ನಷ್ಟು ಹೆಚ್ಚುವ ಸಾಧ್ಯತೆ ಇದೆ ಎಂದು ಅಂತರರಾಷ್ಟ್ರೀಯ ಹಣಕಾಸು ಸಂಸ್ಥೆ ಹೇಳಿದೆ.
ಹೇರ್ ಕಟ್ಗೆ ಬಾಳೆಹಣ್ಣು, ಟ್ಯಾಕ್ಸಿಗೆ ಸಿಗರೇಟ್ ಪ್ಯಾಕ್: ಇದು ವೆನಿಜುವೆಲಾ ಪರಿಸ್ಥಿತಿ
ಅದರ ನಡುವೆಯೇ ಹಣದುಬ್ಬರ ನಿಯಂತ್ರಿಸುವ ಸಲುವಾಗಿ ಕರೆನ್ಸಿ ಮೌಲ್ಯವನ್ನು ಕಡಿತಗೊಳಿಸಲು ಅಲ್ಲಿನ ಸರ್ಕಾರ ಮುಂದಾಗಿದೆ.
ಅಧ್ಯಕ್ಷ ನಿಕೊಲಸ್ ಮಡುರೊ ನೇತೃತ್ವದ ಸರ್ಕಾರವು ಕರೆನ್ಸಿಯಿಂದ ಮೂರು ಸೊನ್ನೆಗಳನ್ನು ತೆಗೆದುಹಾಕಲು ಉದ್ದೇಶಿಸಿತ್ತು. ಆದರೆ, ಹಣದುಬ್ಬರದ ಪ್ರಮಾಣ ತ್ವರಿತಗತಿಯಲ್ಲಿರುವುದರಿಂದ ಐದು ಸೊನ್ನೆಗಳ ಕಡಿತ ಮಾಡಲು ನಿರ್ಧರಿಸಿದೆ.
ಹಣಕಾಸಿನ ಪುನರ್ಮಾರ್ಪಾಡು ಯೋಜನೆಯನ್ನು ಒಳಗೊಂಡ ಆರ್ಥಿಕ ಸುಧಾರಣೆ ಯೋಜನೆಯು ಆಗಸ್ಟ್ 20ರಿಂದ ಜಾರಿಯಾಗಲಿದೆ ಎಂದು ಮಡುರೊ ಸಂಪುಟ ಸಭೆಯಲ್ಲಿ ಪ್ರಕಟಿಸಿದ್ದಾರೆ.
ಸ್ಥಳೀಯ ಕರೆನ್ಸಿಯನ್ನು ಕಾಪಾಡುವ ಉದ್ದೇಶದಿಂದ ಈ ಕ್ರಮ ಕೈಗೊಂಡಿರುವುದಾಗಿ ಮಡುರೊ ತಿಳಿಸಿದ್ದಾರೆ.
ಇದಕ್ಕೂ ಮೊದಲು ಅವರು, ಹೊಸ ಬೊಲಿವರ್ (ವೆನಿಜುವೆಲಾ ಕರೆನ್ಸಿ) ಬಿಲ್ಗಳು ಆಗಸ್ಟ್ 4ರಂದು ಚಲಾವಣೆಗೆ ಬರಲಿದೆ ಎಂದು ಪ್ರಕಟಿಸಿದ್ದರು. ಆದರೆ, ಬ್ಯಾಂಕ್ಗಳ ಮನವಿ ಮೇರೆಗೆ ಅದನ್ನು ಹಿಂಪಡೆಯಲಾಗಿತ್ತು.