ಇರಾಕ್‌ನಲ್ಲಿನ ಅಮೆರಿಕ ರಾಯಭಾರಿ ಕಚೇರಿ ಮೇಲೆ ಮತ್ತೆ ರಾಕೆಟ್ ದಾಳಿ

ಬಾಗ್ದಾದ್, ಜನವರಿ 21: ಇರಾಕ್ ರಾಜಧಾನಿ ಬಾಗ್ದಾದ್‌ನಲ್ಲಿನ ಸರ್ಕಾರಿ ಹಾಗೂ ರಾಜತಾಂತ್ರಿಕ ಕಚೇರಿಗಳಿರುವ ಸಂಕೀರ್ಣದ ಬಳಿ ಇರಾನ್ ಮತ್ತೆ ರಾಕೆಟ್ ದಾಳಿ ನಡೆಸಿದೆ.

ಅಮೆರಿಕ ರಾಯಭಾರಿ ಕಚೇರಿ ಬಳಿ 3 ರಾಕೆಟ್‌ಗಳು ದಾಳಿ ನಡೆಸಿದ್ದು, ಯಾವುದೇ ಪ್ರಾಣಾಪಾಯವಾಗಿಲ್ಲ ಅಥವಾ ಕಟ್ಟಡಗಳೂ ನಾಶವಾಗಿಲ್ಲ. ಆದರೆ ಈ ದಾಳಿ ಉದ್ದೇಶವೇನಾಗಿತ್ತು ಎಂದು ತಿಳಿದುಬಂದಿಲ್ಲ.

ಎರಡು ರಾಕೆಟ್‌ಗಳು ದಾಳಿ ನಡೆಸುತ್ತಿದ್ದಂತೆ ಬಾಗ್ದಾದ್‌ನಲ್ಲಿ ಮತ್ತೆ ಹೈ ಅಲರ್ಟ್ ಘೋಷಿಸಲಾಗಿದೆ. ರಾಕೆಟ್ ಲ್ಯಾಂಡ್ ಆಗುತ್ತಿದ್ದಂತೆ ಸೈರನ್‌ಗಳು ಕೂಗಿಕೊಂಡಿದ್ದರಿಂದ ಜನರಲ್ಲಿ ಕೆಲಕಾಲ ಆತಂಕ ಮನೆ ಮಾಡಿತ್ತು.

ಇರಾನ್ ಸೇನಾ ಮುಖ್ಯಸ್ಥ ಖಾಸಿಮ್ ಸುಲೈಮಾನಿಯನ್ನು ಅಮೆರಿಕ ಹತ್ಯೆ ನಡೆಸಿದ ಬಳಿಕ ಇರಾಕ್ ನಲ್ಲಿನ ಅಮೆರಿಕ ರಾಜತಾಂತ್ರಿಕ ಕಚೇರಿ ಬಳಿ ಸತತ ದಾಳಿ ನಡೆಯುತ್ತಲೇ ಇದೆ.

ಈಗಾಗಲೇ ನಾಲ್ಕಕ್ಕೂ ಹೆಚ್ಚು ಬಾರಿ ಇರಾನ್ ಸೇನೆಯು ಅಮೆರಿಕ ರಾಯಭಾರಿ ಕಚೇರಿ ಮೇಲೆ ದಾಳಿ ನಡೆಸಿದೆ.

ಈ ಹಿಂದೆ ಬಾಗ್ದಾದ್‌ನ ಸೆಲೆಬ್ರೇಶನ್ ಸ್ಕ್ವೇರ್ ಮತ್ತು ಜದ್ರಿಯಾ ಪ್ರದೇಶ , ಸಲಾಹುದ್ದೀನ್ ಪ್ರಾಂತ್ಯದ ಬುಲಾದ್ ವಾಯುನೆಲೆಯ ಮೇಲೆ ಕೆಲವು ರಾಕೆಟ್‌ಗಳು ಅಪ್ಪಳಿಸಿವೆ.

ಯಾವುದೇ ಜೀವಹಾನಿ ಸಂಭವಿಸಿರಲಿಲ್ಲ.ಅಮೆರಿಕ ರಾಯಭಾರಿ ಕಚೇರಿಯಿರುವ ಗ್ರೀನ್‌ ಜೋನ್‌ ಮತ್ತು ಅಮೆರಿಕ ಸೇನಾಪಡೆಯಿರುವ ವಾಯುನೆಲೆಯ ಮೇಲೆ ದಾಳಿ ನಡೆದಿತ್ತು.

English summary

Three Rockets have landed near the US Embassy in Baghdad located in the heavily fortified Green Zone, reported Al Arabia citing security forces.