ಬಲೋಚಿಸ್ತಾನದ 5 ಸ್ಟಾರ್ ಹೋಟೆಲಿನ ಮೇಲೆ ಉಗ್ರರ ದಾಳಿ
ನವದೆಹಲಿ, ಮೇ 11 : ಪಾಕಿಸ್ತಾನದ ಬಲೋಚಿಸ್ತಾನದ ಗ್ವಾದಾರ್ ನಲ್ಲಿ ಭಯೋತ್ಪಾದಕರು 5 ಸ್ಟಾರ್ ಹೋಟೆಲಿನ ಮೇಲೆ ದಾಳಿ ಮಾಡಿದ್ದು, ಅಲ್ಲಿ ಗುಂಡಿನ ಮೊರೆತ ಕೇಳಿಬಂದಿದೆ. ಪ್ರಾಥಮಿಕ ಮಾಹಿತಿಯ ಪ್ರಕಾರ, ಹೋಟೆಲಿಗೆ ಶನಿವಾರ ಮೂವರು ಉಗ್ರರು ನುಗ್ಗಿದ್ದಾರೆ.
ಪಾಕಿಸ್ತಾನದ ಮಾಧ್ಯಮಗಳ ಪ್ರಕಾರ, ಬಲೋಚ್ ಲಿಬರೇಷನ್ ಆರ್ಮಿ ಈ ದಾಳಿಯ ಹೊಣೆಯನ್ನು ಹೊತ್ತಿದೆ. ಭಾರೀ ಪ್ರಮಾಣದಲ್ಲಿ ಶಸ್ತ್ರಾಸ್ತ್ರ ಹೊಂದಿದ್ದ ಉಗ್ರರು ಪರ್ಲ್ ಕಾಂಟಿನೆಂಟಲ್ ಹೋಟೆಲಿನ ಮೇಲೆ ದಾಳಿ ಮಾಡಿದ್ದಾರೆ. ಉಗ್ರರು ಮತ್ತು ಭದ್ರತಾ ಸಿಬ್ಬಂದಿ ನಡುವೆ ಗುಂಡಿನ ಚಕಮಕಿ ನಡೆದಿದೆ.
ಈ ದಾಳಿಯ ಹೊಣೆ ಹೊತ್ತಿರುವ ಬಗ್ಗೆ ಬಲೋಚ್ ಲಿಬರೇಷನ್ ಆರ್ಮಿ ಈಮೇಲ್ ಸಂದೇಶವನ್ನು ಕಳುಹಿಸಿದೆ. ಆದರೆ, ಈ ಕುರಿತು ಪಾಕಿಸ್ತಾನ ಸರಕಾರ ಯಾವುದೇ ಹೇಳಿಕೆಯನ್ನು ನೀಡಿಲ್ಲ. ಈ ದಾಳಿಕೋರರು ಮಜೀದ್ ಬ್ರಿಗೇಡ್ ನ ಸ್ವಾತಂತ್ರ್ಯ ಹೋರಾಟಗಾರರು ಎಂದು ಕರೆದುಕೊಳ್ಳುತ್ತಾರೆ. ಬಲೋಚಿಸ್ತಾನವನ್ನು ಪಾಕಿಸ್ತಾನದಿಂದ ಸ್ವತಂತ್ರ ಮಾಡಬೇಕೆಂದು ಹೋರಾಟ ಮಾಡುತ್ತಿದ್ದಾರೆ.
ನಮ್ಮ ಹೋರಾಟಗಾರರು ಚೀನಾ ಮತ್ತು ವಿದೇಶಿ ಹೂಡಿಕೆದಾರರ ಮೇಲೆ ಎಂದು ಬಲೋಚ್ ಲಿಬರೇಷನ್ ಆರ್ಮಿ ಹೇಳಿದೆ. ಈ ಚೀನಿ ಹೂಡಿಕೆದಾರರು ಪರ್ಲ್ ಕಾಂಟಿನೆಂಟರ್ ಹೋಟೆಲಿನಲ್ಲಿ ವಾಸ್ತವ್ಯ ಹೂಡಿದ್ದಾರೆ.
ದಾಳಿಕೋರರ ಹತ್ಯೆ : ದಾಳಿ ಮಾಡಿದ ಎಲ್ಲ ಉಗ್ರರನ್ನು ಗುಂಡಿಕ್ಕಿ ಹತ್ಯೆ ಮಾಡಲಾಗಿದೆ. ಆದರೆ, ಇವರು ಹೋಟೆಲನ್ನು ಪ್ರವೇಶಿಸುವ ಮುನ್ನ ಅವರನ್ನು ತಡೆಯಲು ಯತ್ನಿಸಿದ ಸೆಕ್ಯುರಿಟಿ ಗಾರ್ಡ್ ನನ್ನು ಉಗ್ರರು ಹತ್ಯೆ ಮಾಡಿದ್ದಾರೆ. ಹೋಟೆಲಿನಲ್ಲಿರುವ ಎಲ್ಲ ಚೀನಿ ಅತಿಥಿಗಳು ಸುರಕ್ಷಿತವಾಗಿದ್ದಾರೆ.