ಅಮೆರಿಕದ ಜನಪ್ರಿಯ ಅಧ್ಯಕ್ಷರಲ್ಲಿ ಒಬಾಮಗೆ 12ನೇ ಸ್ಥಾನ
ಸಮೀಕ್ಷೆಯಲ್ಲಿ ಅಬ್ರಹಾಂ ಲಿಂಕನ್ ಅವರಿಗೆ ಮೊದಲ ಸ್ಥಾನ, ಜಾರ್ಜ ಡಬ್ಲ್ಯೂ ಬುಷ್ ಅವರಿಗೆ 36ನೇ ಸ್ಥಾನ.
ವಾಷಿಂಗ್ಟನ್, ಫೆಬ್ರವರಿ 18: ಸಿ-ಸ್ಪಾನ್ ಎಂಬ ಸರ್ಕಾರೇತರ ಸಂಸ್ಥೆಯೊಂದು ನಡೆಸಿರುವ ಸಮೀಕ್ಷೆಯಲ್ಲಿ ಅಮೆರಿಕದ ಮಾಜಿ ಅಧ್ಯಕ್ಷ ಬರಾಕ್ ಒಬಾಮ, ಈವರೆಗಿನ ಅಮೆರಿಕ ಅಧ್ಯಕ್ಷರಲ್ಲಿ 12ನೇ ಶ್ರೇಷ್ಠ ಆಡಳಿತಗಾರನಾಗಿ ಹೊರಹೊಮ್ಮಿದ್ದಾರೆ.
ಈ ಪಟ್ಟಿಯಲ್ಲಿ, ಅಬ್ರಹಾಂ ಲಿಂಕನ್ ಗೆ ಮೊದಲ ಸ್ಥಾನ ಬಂದಿದ್ದರೆ, ಜಾರ್ಜ್ ಡಬ್ಲ್ಯೂ. ಬುಷ್ ಅವರು, 36ನೇ ಸ್ಥಾನ ಪಡೆದಿದ್ದಾರೆ.
ನಾನಾ ದೇಶಗಳ 91 ರಾಜಕೀಯ ವಿಶ್ಲೇಷಕರ ಮತದಾನದ ಮೂಲಕ ಅಮೆರಿಕದ ಜನಪ್ರಿಯ ಅಧ್ಯಕ್ಷರ ಪಟ್ಟಿಯನ್ನು ಸಿ-ಸ್ಪಾನ್ ಸಂಸ್ಥೆ ತಯಾರಿಸಿದೆ.
ಅದರಲ್ಲಿ, ಅಬ್ರಹಾಂ ಲಿಂಕನ್ (ಅಧ್ಯಕ್ಷಾವಧಿ: 1861ರಿಂದ 1865), ಮೊದಲ ಸ್ಥಾನದಲ್ಲಿದ್ದರೆ, ಅಮೆರಿಕದ ಮೊದಲ ರಾಷ್ಟ್ರಾಧ್ಯಕ್ಷ ಜಾರ್ಜ್ ವಾಷಿಂಗ್ಟನ್ (1789-1797), ಫ್ರಾಂಕ್ಲಿನ್ ಡಿ. ರೂಸ್ ವೆಲ್ಟ್ (1933-1945) ಮೂರನೇ ಸ್ಥಾನದಲ್ಲಿದ್ದಾರೆ.
ಆನಂತರದ ಸ್ಥಾನಗಳಲ್ಲಿ ಥಿಯೋಡೋರ್ ರೂಸ್ ವೆಲ್ಟ್ (1901-1909), ಡ್ವಿಲೈಟ್ ಈಸೆನ್ ಹೋವರ್ (1953-1961), ಹ್ಯಾರಿ ಟ್ರುಮನ್ (1945-1953), ಥಾಮಸ್ ಜೆಫರ್ಸನ್ (1801-1809), ಜಾನ್ ಎಫ್. ಕೆನಡಿ (1961-1963), ರೊನಾಲ್ಡ್ ರೀಗನ್ (1981-1989) ಹಾಗೂ ಲಿಂಡನ್ ಜಾನ್ಸನ್ (1963- 1969) ಇದ್ದಾರೆ.