ಐರ್ಲೆಂಡ್ ಪ್ರಧಾನಿಯಾದ ಭಾರತೀಯ ಮೂಲದ 'ಸಲಿಂಗಿ' ಲಿಯೋ
ಐರ್ಲೆಂಡ್, ಜೂನ್ 14: ಭಾರತೀಯ ಮೂಲದ ಲಿಯೋ ವಾರಾಡ್ಕರ್ ಐರ್ಲೆಂಡ್ ನ ಪ್ರಧಾನಿಯಾಗಿ ನೇಮಕಗೊಂಡಿದ್ದಾರೆ. 38 ವರ್ಷಕ್ಕೇ ಪ್ರಧಾನಿ ಹುದ್ದೆಗೇರುವ ಮೂಲಕ, ಐರ್ಲೆಂಡ್ ದೇಶದ ಅತ್ಯಂತ ಕಿರಿಯ ವಯಸ್ಸಿನ ಪ್ರಧಾನಿಯೆಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಲಿಯೋ ಅವರು ಐರ್ಲೆಂಡ್ ನ ಪ್ರಧಾನಿ ಪಟ್ಟಕ್ಕೇರಿದ ಮೊಟ್ಟ ಮೊದಲ ಸಲಿಂಗಿಯಾಗಿದ್ದಾರೆ.ಲಿಯಾ ವಾರಾಡ್ಕರ್ ತಂದೆ ಅಶೋಕ್ ಎಂಬುವರು ಸುಮಾರು 47 ವರ್ಷಗಳ ಹಿಂದೆ (1970ರಲ್ಲಿ) ಐರ್ಲೆಂಡ್ ಗೆ ಹೋಗಿ ನೆಲೆಸಿದ್ದರು. ಇದೀಗ, ಅವರ ಕಿರಿಯ ಪುತ್ರ ಈಗ ಆ ದೇಶದ ಪ್ರಧಾನಿಯಾಗಿ ನೇಮಕಗೊಂಡು ಭಾರತೀಯರಿಗೆ ಹೆಮ್ಮೆ ತರುವಂಥ ಸಾಧನೆ ಮಾಡಿದ್ದಾರೆ.
ವಾರಾಡ್ಕರ್ ಅವರು 2007ರಲ್ಲಿ ಮೊದಲ ಬಾರಿಗೆ ಐರ್ಲೆಂಡ್ ಸಂಸತ್ತಿಗೆ ಚುನಾಯಿತರಾಗಿದ್ದರು. ಇದೀಗ, ಆ ದೇಶದ ಹಾಲಿ ಪ್ರಧಾನಿ ಎಂಡಾ ಕೆನ್ನಿ ಅವರ ಅಧಿಕಾರಾವಧಿಯು ಶೀಘ್ರದಲ್ಲೇ ಮುಗಿದಿದೆ.
ಅಧಿಕಾರ ಗದ್ದುಗೆ ಹಿಡಿದಿರುವ ಫೈನ್ ಗಾಯೆಲ್ ಪಕ್ಷದ ಪ್ರಧಾನಿ ಅಭ್ಯರ್ಥಿಯಾಗಿ ವಾರಾಡ್ಕರ್ ಅವಿರೋಧವಾಗಿ ಆಯ್ಕೆಯಾಗಿದ್ದಾರೆ. ಸದ್ಯಕ್ಕೆ ಎಂಡಾ ಕೆನ್ನಿ ಅವರ ಸರ್ಕಾರದಲ್ಲಿ ಸಚಿವರಾಗಿ ಕೂಡಾ ಕರ್ತವ್ಯ ನಿರ್ವಹಿಸುತ್ತಿದ್ದರು.