ಕಾಬೂಲ್: ಆತ್ಮಾಹುತಿ ದಾಳಿಗೆ ಹಲವಾರು ಮಂದಿ ಸಾವು
ಕಾಬೂಲ್, ಫೆಬ್ರಾರಿ 11: ಸರ್ಕಾರಿ ಸ್ವಾಮ್ಯದ ರಕ್ಷಣಾ ಕಚೇರಿಗಳನ್ನು ಗುರಿಯಾಗಿಸಿಕೊಂಡು ಆತ್ಮಾಹುತಿ ದಾಳಿ ನಡೆದಿದೆ. ಈ ದುರ್ಘಟನೆಯಲ್ಲಿ ಐವರು ಮೃತಪಟ್ಟಿದ್ದಾರೆ. ಸಾವಿನ ಸಂಖ್ಯೆ ಹೆಚ್ಚಾಗುವ ಸಾಧ್ಯತೆಯಿದೆ. ಇತ್ತೀಚೆಗೆ ಅಫ್ಘಾನಿಸ್ತಾನ ರಾಜಧಾನಿಯಲ್ಲಿ ಸಂಭವಿಸಿದ ದೊಡ್ಡ ದಾಳಿ ಇದಾಗಿದೆ.
ಮಿಲಿಟರಿ ಸಿಬ್ಬಂದಿ ಸೇರಿದಂತೆ ಇಬ್ಬರು ನಾಗರಿಕರು ಮೃತಪಟ್ಟಿದ್ದಾರೆ ಎಂದು ಆಂತರಿಕ ಭದ್ರತಾ ಸಚಿವಾಲಯದ ವಕ್ತಾರರಾದ ನಸ್ರತ್ ರಹಿಮಿ ತಿಳಿಸಿದ್ದಾರೆ. ಈ ಘಟನೆಯಲ್ಲಿ 12 ಮಂದಿ ಗಾಯಗೊಂಡಿದ್ದು, ಈ ಪೈಕಿ ಐವರು ನಾಗರಿಕರಿದ್ದಾರೆ. ಗಾಯಗೊಂಡವರಿಗೆ ಸಮೀಪದ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಕೊಡಿಸಲಾಗುತ್ತಿದೆ.
ಮರ್ಷಲ್ ಫಹೀಂ ಮಿಲಿಟರಿ ಅಕಾಡೆಮಿ ಮುಖ್ಯದ್ವಾರದ ಬಳಿ ಬಾಂಬ್ ಸ್ಫೋಟ ಸಂಭವಿಸಿದೆ ಎಂದು ರೈಟರ್ಸ್ ವರದಿ ಮಾಡಿದೆ.
ಪಶ್ಚಿಮ ಕಾಬೂಲ್ ನಲ್ಲಿ ನಡೆದ ಈ ಘಟನೆಯ ಪ್ರತ್ಯಕ್ಷದರ್ಶಿಗಳೂ ಪ್ರತಿಕ್ರಿಯಿಸಿ, ದೊಡ್ಡ ಮಟ್ಟದ ಸ್ಫೋಟದ ಸದ್ದು ಕೇಳಿಸಿತು. ನಂತರ ಗುಂಡಿನ ಚಕಮಕಿಯ ಸದ್ದು ಹೆಚ್ಚಾಯಿತು, ಆಂಬುಲೆನ್ಸ್ ಗಳು ಹೆಚ್ಚು ಓಡಾಡತೊಡಗಿದವು ಎಂದು ಸಮೀಪದ ನಿವಾಸಿ ಸಮೀಯುಲ್ಲಾ ಹೇಳಿದ್ದಾರೆ.