ಸೊಮಾಲಿಯಾ ಕಡಲ್ಗಳ್ಳರಿಂದ ಭಾರತದ ಹಡಗು ಹೈಜಾಕ್
ಈ ಹಡಗಿನ ಹೆಸರನ್ನು 'ಅಲ್ ಕೌಶರ್' ಎಂದು ಗುರುತಿಸಲಾಗಿದ್ದು, ದುಬೈನಿಂದ ಹೊರಟಿದ್ದ ಈ ಹಡಗು, ಯೆಮನ್ ಅಲ್ ಮುಕಾಲಾ ಬಂದರಿನ ಕಡೆಗೆ ಸಾಗುತ್ತಿತ್ತು.
ಬೊಸಾಸೊ (ಸೊಮಾಲಿಯಾ), ಏಪ್ರಿಲ್ 3: ಕಡಲ್ಗಳ್ಳತನಕ್ಕೆ ಕುಖ್ಯಾತಿ ಪಡೆದಿರುವ ಸೊಮಾಲಿಯಾ ದೇಶದ ಕಡಲುಗಳ್ಳರಿಂದ ಭಾರತದ ವಾಣಿಜ್ಯ ಹಡಗೊಂದು ಅಪಹರಣಗೊಂಡಿರುವ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ. ಏಪ್ರಿಲ್ 1ರಂದು ಈ ಹಡಗನ್ನು ಅಪಹರಿಸಲಾಗಿದೆ ಎಂದು ಹೇಳಲಾಗಿದೆ.
ಈ ಹಡಗಿನ ಹೆಸರನ್ನು 'ಅಲ್ ಕೌಶರ್' ಎಂದು ಗುರುತಿಸಲಾಗಿದ್ದು, ದುಬೈನಿಂದ ಹೊರಟಿದ್ದ ಈ ಹಡಗು, ಯೆಮನ್ ಅಲ್ ಮುಕಾಲಾ ಬಂದರಿನ ಕಡೆಗೆ ಸಾಗುತ್ತಿತ್ತು.
ಅಪಹರಣದ ಸಂದರ್ಭದಲ್ಲಿ ಹಡಗಿನಲ್ಲಿ ಮುಂಬೈನ ಮಾಂಡವಿ ಮೂಲದ 11 ಸಿಬ್ಬಂದಿಗಳಿದ್ದರು. ಅಪಹರಣಕಾರರು ಹಡಗನ್ನು ವಶಪಡಿಸಿಕೊಳ್ಳುವಷ್ಟರಲ್ಲಿ ಹಡಗಿನ ಕ್ಯಾಪ್ಟನ್ ಈ ಸುದ್ದಿಯನ್ನು ದುಬೈನ ಬಂದರು ಹಾಗೂ ಹಡಗಿನ ಮಾಲೀಕರಿಗೆ ಸುದ್ದಿ ಮುಟ್ಟಿಸುವಲ್ಲಿ ಸಫಲನಾಗಿದ್ದಾನೆ ಎಂದು ಮೂಲಗಳು ತಿಳಿಸಿವೆ.
ಹದಿನೈದು ದಿನಗಳ ಹಿಂದೆ (ಮಾರ್ಚ್ 15) ಯೂರೋಪ್ ಒಕ್ಕೂಟಕ್ಕೆ ಸೇರಿದ ಇಂಧನ ಹೊತ್ತೊಯ್ಯುತ್ತಿದ್ದ ಹಡಗೊಂದನ್ನು ಇದೇ ರೀತಿ ಅಪಹರಿಸಿದ್ದ ಸೊಮಾಲಿಯಾದ ಕಡಲ್ಗಳ್ಳರು, ಅದರ ಹಡಗು ಹಾಗೂ ಸಿಬ್ಬಂದಿಯನ್ನು ಬಂಧಿಯಾಗಿಸಿರಿ ಅಪಾರ ಮೊತ್ತದ ಒತ್ತೆ ಹಣವನ್ನು ಕೇಳಿದ್ದನ್ನು ಇಲ್ಲಿ ಸ್ಮರಿಸಿಕೊಳ್ಳಬಹುದು.