ವರಸೆ ಬದಲಿಸಿದ ಪಾಕಿಸ್ತಾನ, F-16 ಯುದ್ಧ ವಿಮಾನ ಬಳಕೆ ಬಗ್ಗೆ ಹೇಳಿಕೆ
ಇಸ್ಲಾಮಾಬಾದ್, ಏಪ್ರಿಲ್ 1: ಭಾರತದ ವಿರುದ್ಧವಾಗಿ ಅಮೆರಿಕ ನಿರ್ಮಿತ F-16 ಯುದ್ಧ ವಿಮಾನವನ್ನು ಬಳಸಿಲ್ಲ ಎಂದು ಹೇಳಿಕೊಂಡು ಬಂದಿದ್ದ ಪಾಕಿಸ್ತಾನದ ಸೇನೆ ಸೋಮವಾರ ತನ್ನ ವರಸೆ ಬದಲಿಸಿದೆ. ತನ್ನ ನ್ಯಾಯಬದ್ಧವಾದ ಸ್ವ ರಕ್ಷಣೆಗೆ ಯಾವುದೇ ಯುದ್ಧ ವಿಮಾನವಾದರೂ ಬಳಸುವ ಹಕ್ಕು ತನಗಿದೆ ಎಂದು ಹೇಳಿದೆ.
ಲೋಕಸಭಾ ಚುನಾವಣೆ 2019 : ವಿಶೇಷ ಪುಟ | ಗ್ಯಾಲರಿ
ಭಾರತದ ವಾಯು ಸೇನೆ ವಿರುದ್ಧ ಚೀನಾ ನಿರ್ಮಿತ JF17 ಯುದ್ಧ ವಿಮಾನವನ್ನು ಮಾತ್ರ ಪಾಕ್ ಬಳಸಿತ್ತು ಎಂದು ಹೇಳಿಕೊಂಡು ಬರುತ್ತಿತ್ತು. ಅದು ಅಮೆರಿಕ ನಿರ್ಮಿತ F-16 ಯುದ್ಧ ವಿಮಾನವಲ್ಲ ಎಂದು ವಾದಿಸುತ್ತಿತ್ತು. ಜತೆಗೆ ಭಾರತದ ಎರಡು ಯುದ್ಧ ವಿಮಾನಗಳನ್ನು ಹೊಡೆದು ಉರುಳಿಸಿದ್ದಾಗಿ ಹೇಳಿಕೊಂಡು ಬರುತ್ತಿತ್ತು. ಈ ಎರಡೂ ಅಂಶಗಳನ್ನು ಭಾರತ ಅಲ್ಲಗಳೆಯುತ್ತಾ ಬಂದಿತ್ತು.
ಭಾರತದ ವಿರುದ್ಧ ಪಾಕಿಸ್ತಾನ ಎಫ್-16 ಯುದ್ಧ ವಿಮಾನ ಬಳಸಿದ್ದು ಸತ್ಯ?
ಸೋಮವಾರ ಸಂಜೆ ಪಾಕಿಸ್ತಾನ ಸೇನೆ ಪತ್ರಿಕಾ ಹೇಳಿಕೆ ಬಿಡುಗಡೆ ಮಾಡಿದೆ. ಭಾರತದ ಎರಡು ಯುದ್ಧ ವಿಮಾನಗಳು ಎಲ್ ಒಸಿ ದಾಟಿ ಬಂದಾಗ ಪಾಕ್ ವಾಯು ಸೇನೆ ಹೊಡೆದುರುಳಿಸಿತು. ಅದು JF17 ಅಥವಾ F-16 ಯಾವುದು ಅನ್ನೋದು ವಿಷಯ ಅಲ್ಲ. ಪಾಕಿಸ್ತಾನವು ತನ್ನ ರಕ್ಷಣೆಗಾಗಿ ಭಾರತದ ಎರಡು ಯುದ್ಧ ವಿಮಾನ ಹೊಡೆದುರುಳಿಸಿದೆ ಎಂದು ತಿಳಿಸಲಾಗಿದೆ.
ಒಂದು ವೇಳೆ F-16 ಯುದ್ಧ ವಿಮಾನವನ್ನು ಬಳಸಿದ್ದೇ ಆದರೆ ಅದು ಅಮೆರಿಕ ವಿಧಿಸಿದ ಷರತ್ತು ಉಲ್ಲಂಘಿಸಿದಂತಾಗುತ್ತದೆ. ಈ ಯುದ್ಧ ವಿಮಾನವನ್ನು ಭಯೋತ್ಪಾದಕರ ಮೇಲೆ ದಾಳಿ ನಡೆಸುವುದಕ್ಕೆ ಮಾತ್ರ ಬಳಸಬೇಕು, ಬೇರೆ ಯಾವುದೇ ದೇಶದ ವಿರುದ್ಧ ಆಲ್ಲ ಎಂದಿತ್ತು. ಯಾವಾಗ ಭಾರತ, ಅಮೆರಿಕದಿಂದ ಪ್ರಬಲ ಸಾಕ್ಷ್ಯಾಧಾರ ನೀಡಲು ಆರಂಭಿಸಿದಾಗ ಪಾಕಿಸ್ತಾನ ಒತ್ತಡಕ್ಕೆ ಸಿಲುಕಿಕೊಂಡು, ಈ ಹೇಳಿಕೆ ನೀಡಿದೆ ಎಂದು ವಿಶ್ಲೇಷಿಸಲಾಗುತ್ತಿದೆ.