ಪಾಕ್ ಪ್ರಧಾನಿ ನವಾಜ್ ಷರೀಫ್ ಗೆ ಬಂಧನದ ಭೀತಿ?
ಅಕ್ರಮ ಆಸ್ತಿ ಆರೋಪ ಸಾಬೀತು ಹಿನ್ನೆಲೆ. ಪಾಕಿಸ್ತಾನದ ಪ್ರಧಾನಿ ನವಾಜ್ ಷರೀಫ್ ಅವರ ಬಂಧನಕ್ಕೆ ಪಾಕಿಸ್ತಾನದ ಜಂಟಿ ತನಿಖಾ ಸಮಿತಿ ಆಗ್ರಹ. ಸುಪ್ರೀಂ ಕೋರ್ಟ್ ನಿಂದ ನೇಮಕಗೊಂಡಿದ್ದ ಜಂಟಿ ತನಿಖಾ ಸಮಿತಿ.
ಇಸ್ಲಾಮಾಬಾದ್, ಜುಲೈ 10: ಅಕ್ರಮ ಆಸ್ತಿ ಆರೋಪಗಳಿಗೆ ಸಂಬಂಧಿಸಿದಂತೆ ಪಾಕಿಸ್ತಾನದ ಪ್ರಧಾನಿ ನವಾಜ್ ಷರೀಫ್ ಅವರನ್ನು ಬಂಧಿಸುವಂತೆ ಅಲ್ಲಿನ ಸರ್ಕಾರಿ ನೇಮಿತ ಜಂಟಿ ತನಿಖಾ ಸಮಿತಿ (ಜೆಐಟಿ) ತನ್ನ ವರದಿಯಲ್ಲಿ ಉಲ್ಲೇಖಿಸಿದ್ದು, ಷರೀಫ್ ಗೆ ಈಗ ಬಂಧನ ಭೀತಿ ಆವರಿಸಿದೆ.
ಕಳೆದ ವರ್ಷ, ವಿಶ್ವದ ನಾನಾ ದೇಶಗಳ ರಾಜಕೀಯ ವಲಯಗಳನ್ನೇ ಅಲುಗಾಡಿಸಿದ್ದ 'ಪನಾಮಾ ಪೇಪರ್ಸ್' ತನಿಖಾ ವರದಿಯಲ್ಲಿ, ಪಾಕಿಸ್ತಾನದ ಪ್ರಧಾನಿ ನವಾಜ್ ಷರೀಫ್ ಹಾಗೂ ಅವರ ಪುತ್ರರು ಅಕ್ರಮ ದಾರಿಗಳಿಂದ ಆಸ್ತಿ ಮಾಡಿಕೊಂಡಿರುವ ಬಗ್ಗೆ ಹೇಳಲಾಗಿತ್ತು.
ಈ ಹಿನ್ನೆಲೆಯಲ್ಲಿ, ಸುಪ್ರೀಂ ಕೋರ್ಟ್ ಜಂಟಿ ಸಮಿತಿಯೊಂದನ್ನು ನೇಮಿಸಿ, ಆ ಆರೋಪಗಳ ಕುರಿತಂತೆ ತನಿಖೆ ನಡೆಸಲು ಆದೇಶಿಸಿತ್ತು. ಷರೀಫ್ ಹಾಗೂ ಅವರ ಪುತ್ರರಾದ ಹುಸೇನ್ ಹಾಗೂ ಹಸನ್ ನವಾಜ್ ಅವರ ವಿರುದ್ಧದ ಅಕ್ರಮ ಆಸ್ತಿ ಪ್ರಕರಣಗಳ ತನಿಖೆ ಕೈಗೆತ್ತಿಕೊಂಡಿತ್ತು.
ಇದೀಗ, ತನಿಖೆ ಮುಗಿಸಿರುವ ಅದು ಸುಪ್ರೀಂ ಕೋರ್ಟ್ ಗೆ ತನ್ನ ವರದಿಯನ್ನು ಸಲ್ಲಿಸಿದ್ದು, ಅದರಲ್ಲಿ ಷರೀಫ್ ಹಾಗೂ ಅವರ ಪುತ್ರರು ಭ್ರಷ್ಟಾಚಾರ ಮಾರ್ಗಗಳ ಮೂಲಕ ಅಕ್ರಮ ಆಸ್ತಿ ಸಂಪಾದಿಸಿರುವುದು ಸಾಬೀತಾಗಿದ್ದು, ಷರೀಫ್ ಹಾಗೂ ಅವರ ಪುತ್ರರನ್ನು ಬಂಧಿಸಬಹುದೆಂದು ತನ್ನ ವರದಿಯಲ್ಲಿ ಉಲ್ಲೇಖಿಸಿದೆ.