ಎಚ್ 1ಬಿ ವೀಸಾ ಕೇಳಿದರೆ, 15 ವರ್ಷಗಳ ಹಿಂದಿನ ಜೀವನ ಜಾಲಾಡ್ತಾರೆ!
ವಾಷಿಂಗ್ಟನ್, ಮೇ 5: ಉದ್ಯೋಗದ ನಿಮಿತ್ತ ಅಮೆರಿಕಕ್ಕೆ ತೆರಳುತ್ತಿದ್ದ ವಿದೇಶಿಗರ ಮೇಲೆ ಅಲ್ಲಿನ ಡೊನಾಲ್ಡ್ ಟ್ರಂಪ್ ಸರ್ಕಾರ ಬಿಗಿ ನಿಲುವು ತಳೆದ ನಂತರ, ಅಮೆರಿಕದ ವೀಸಾ (ಎಚ್ 1 ಬಿ) ಈಗ ದೇವರ ಪ್ರಸಾದ ಎನ್ನುವಂತಾಗಿದೆ.
ಅದರ ಜತೆಗೆ, ಈಗ ವೀಸಾಕ್ಕಾಗಿ ಅರ್ಜಿ ಸಲ್ಲಿಸುವ ಉದ್ಯೋಗಿಗಳಿಗೆ, ಅಮೆರಿಕದ ತನಿಖಾಧಿಕಾರಿಗಳು ವಿಚಾರಣೆಗೊಳಪಡಿಸುವ ಹೊಸ ಪದ್ಧತಿಯೊಂದು ಶೀಘ್ರದಲ್ಲೇ ಆರಂಭವಾಗಲಿದ್ದು ಅರ್ಜಿದಾರರ ಕಳೆದ 15 ವರ್ಷಗಳ ಜೀವನವನ್ನು ಜಾಲಾಡಲಿದ್ದಾರೆಂದು ಮೂಲಗಳು ತಿಳಿಸಿವೆ.[2018ನೇ ವರ್ಷದ ಎಚ್- 1ಬಿ ವೀಸಾಕ್ಕಾಗಿ ಏ. 3ರಿಂದ ಅರ್ಜಿ ಆಹ್ವಾನ]
ಶೀಘ್ರವೇ ಈ ನಿಟ್ಟಿನಲ್ಲಿ ಹೊಸ ನಿಯಮಗಳು ಜಾರಿಗೆ ಬರಲಿವೆ. ಅಷ್ಟೇ ಅಲ್ಲ, ಅರ್ಜಿದಾರರ ಟ್ವಿಟರ್, ಫೇಸ್ ಬುಕ್ ಸೇರಿದಂತೆ ಅನೇಕ ಅರ್ಜಿದಾರರು ಚಟುವಟಿಕೆಯಿಂದ ತೊಡಗಿಕೊಳ್ಳುವ ಯಾವುದೇ ಸಾಮಾಜಿಕ ಜಾಲತಾಣಗಳ ವಿವರಗಳನ್ನು ಪಡೆದುಕೊಳ್ಳಲು ಅಮೆರಿಕದ ಗೃಹ ಸಚಿವಾಲಯ ನಿರ್ಧರಿಸಿದೆ.[ಎಚ್1ಬಿ ವೀಸಾ : ಭಾರತದ ಐಟಿ ಇಂಡಸ್ಟ್ರಿಗೆ ಕೆಟ್ಟ ಸುದ್ದಿ]
ಇದಲ್ಲದೆ, ವೈಯಕ್ತಿಕ ಇ-ಮೇಲ್ ಐಡಿಗಳನ್ನೂ ಪಡೆದು ಅವನ್ನೂ ಪರಿಶೀಲನೆಗೊಳಪಡಿಸಲಾಗುತ್ತದೆ. ಈ ಹೊಸ ಕ್ರಮಗಳ ಔಚಿತ್ಯದ ಬಗ್ಗೆ ಪ್ರತಿಕ್ರಿಯಿಸಿರುವ ಅಮೆರಿಕದ ಗೃಹ ಸಚಿವಾಲಯ, ಅಮೆರಿಕದ ಭದ್ರತೆಗಾಗಿ ಇದೆಲ್ಲವೂ ಅನಿವಾರ್ಯ ಎಂದು ಹೇಳಿದೆ.