ನ್ಯೂ ಜೆರ್ಸಿಯಲ್ಲಿ ಭಾರತೀಯ ಟೆಕ್ಕಿಯ ಕೊಲೆ
ಶುಕ್ರವಾರ ಮನೆಯಿಂದಲೇ ಕಂಪನಿಯ ಸೇವೆಯಲ್ಲಿ ತೊಡಗಿದ್ದಾಗ ಶಶಿಕಲಾ ಕೊಲೆಯಾಗಿದ್ದಾರೆಂದು ನ್ಯೂ ಜೆರ್ಸಿ ಪೊಲೀಸರು ತಿಳಿಸಿದ್ದಾರೆ.
ನ್ಯೂಜೆರ್ಸಿ, ಮಾರ್ಚ್ 25: ಆಂಧ್ರಪ್ರದೇಶ ಮೂಲದವರಾದ ಮಹಿಳಾ ಟೆಕ್ಕಿ ಹಾಗೂ ಅವರ 7 ವರ್ಷದ ಪುತ್ರನನ್ನು ದುಷ್ಕರ್ಮಿಗಳು ಅವರ ಮನೆಯಲ್ಲೇ ಹತ್ಯೆ ಮಾಡಿರುವ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ.
ಎನ್. ಶಶಿಕಲಾ (38) ತಮ್ಮ ಪತಿ ಎನ್. ಹನುಮಂತ ರಾವ್ ಜತೆ ನ್ಯೂಜೆರ್ಸಿಯಲ್ಲಿ ವಾಸವಾಗಿದ್ದರು. ಗುರುವಾರ (ಮಾರ್ಚ್ 23) ರಾತ್ರಿ ಸುಮಾರು 9 ಗಂಟೆ ಹೊತ್ತಿಗೆ ಕಂಪನಿಯಿಂದ ಮನೆಗೆ ಹನುಮಂತ ರಾವ್ ಅವರು ಮನೆಗೆ ಹಿಂದಿರುಗಿದಾಗ ಘಟನೆ ಬೆಳಕಿಗೆ ಬಂದಿದೆ.
ಅಂದು ಶಶಿಕಲಾ ಕಂಪನಿಗೆ ಹೋಗಿರಲಿಲ್ಲ. ಮನೆಯಿಂದಲೇ ಕೆಲಸ ಮಾಡುವ ಸೌಲಭ್ಯದಲ್ಲಿ (ವರ್ಕ್ ಫ್ರಂ ಹೋಮ್) ಕೆಲಸ ಮಾಡಿದ್ದರು. ಆ ವೇಳೆ, ಅವರ ಹಾಗೂ ಅವರ ಮಗನ ಕೊಲೆಯಾಗಿದೆ ಎಂದು ಹೇಳಲಾಗಿದೆ.
ಈ ಕೊಲೆಗಳನ್ನು ಭಾರತೀಯರ ವಿರೋಧಿ ಕುಕೃತ್ಯ ಎಂದು ಪರಿಗಣಿಸಲಾಗದು ಎಂದು ಅಲ್ಲಿನ ಪೊಲೀಸರು ತಿಳಿಸಿದ್ದಾರೆ. ಮೇಲ್ನೋಟಕ್ಕೆ ಇದು ಬೇರೆಯದ್ದೇ ಕಾರಣಕ್ಕಾಗಿ ನಡೆದಿರುವ ಕೊಲೆಗಳು ಎಂಬುದು ಸ್ಪಷ್ಟವಾಗಿದೆ ಎಂದು ಅಲ್ಲಿನ ಪೊಲೀಸರು ಹೇಳಿದ್ದಾರೆಂದು ಮೂಲಗಳು ತಿಳಿಸಿವೆ.
ಏತನ್ಮಧ್ಯೆ, ಭಾರತದಲ್ಲಿರುವ ಶಶಿಕಲಾ ಅವರ ತಂದೆ- ತಾಯಿ, ಹನುಮಂತ ರಾವ್ ಮೇಲೆಯೇ ಅನುಮಾನ ಪಟ್ಟಿದ್ದಾರೆ. ಹನುಮಂತ ರಾವ್ ಗೆ ನ್ಯೂಜೆರ್ಸಿಯ ಸ್ಥಳೀಯ ಮಹಿಳೆಯೊಬ್ಬರ ಜತೆ ಅನೈತಿಕ ಸಂಬಂಧವಿದ್ದು, ತಮ್ಮ ಮಗಳ ಹಾಗೂ ಮೊಮ್ಮಗನ ಹತ್ಯೆಗೆ ಅವರ ಆ ಸಂಬಂಧವೇ ಮೂಲ ಕಾರಣವಾಗಿದೆ ಎಂದು ದೂರಿದ್ದಾರೆ.
ದಂಪತಿಗಳು, ಕಳೆದ 12 ವರ್ಷಗಳಿಂದ ಅಮೆರಿಕದಲ್ಲೇ ನೆಲೆಸಿದ್ದರು ಎಂದು ಹೇಳಲಾಗಿದೆ.