ಮಹಾಮಾರಿ ಕೊರೊನಾ ಸೋಂಕಿನಿಂದ 14 ತಿಂಗಳ ಮಗು ಸಾವು
ಅಹಮದಾಬಾದ್, ಏಪ್ರಿಲ್ 8: ಜಗತ್ತನ್ನೇ ಅರಿಯದ 14 ತಿಂಗಳ ಹಸುಗೂಸು ಕೊರೊನಾ ವೈರಸ್ ಮಹಾಮಾರಿಗೆ ಬಲಿಯಾಗಿರುವ ಘಟನೆ ಗುಜರಾತ್ನ ಜಾಮ್ನಗರದಲ್ಲಿ ನಡೆದಿದೆ. ಕಳೆದ ಎರಡು ದಿನದಿಂದ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ ಮಗು, ಚಿಕಿತ್ಸೆಗೆ ಸ್ಪಂದಿಸಿದ ಬಹುಅಂಗಾಂಗ ವೈಫಲ್ಯದಿಂದ ಸಾವನ್ನಪ್ಪಿದೆ.
ಉತ್ತರ ಪ್ರದೇಶದ ಮೂಲದ ವಲಸೆ ಕಾರ್ಮಿಕರೊಬ್ಬರ ಗಂಡು ಮಗು ಇದಾಗಿದ್ದು, ಯಾವುದೇ ವಿದೇಶಿ ಪ್ರಯಾಣದ ಇತಿಹಾಸ ಹಾಗೂ ಸೋಂಕಿತ ವ್ಯಕ್ತಿಗಳ ಸಂಪರ್ಕದ ಬಗ್ಗೆ ಮಾಹಿತಿ ಇಲ್ಲ.ಲ. ಆದರೂ ಏಪ್ರಿಲ್ 5 ರಂದು ಮಗುವಿಗೆ ಕೊರೊನಾ ಸೋಂಕು ತಗುಲಿರುವುದು ದಢೃವಾಗಿತ್ತು. ಐಸೋಲೇಶನ್ ವಾರ್ಡ್ನಲ್ಲಿರಿಸಿ ಚಿಕಿತ್ಸೆ ನೀಡಿದರೂ ಮಗು ಬದುಕುಳಿಯಲಿಲ್ಲ.
ಎಲ್ಲೂ ಹೋಗದ 14 ತಿಂಗಳ ಕಂದಮ್ಮನಿಗೆ ಕೊರೊನಾ ಬಂದಿದ್ದು ಹೇಗೆ.?
ಈ ಕುರಿತು ಪಿಟಿಐ ಮತ್ತು ಎಎನ್ಐ ಸುದ್ದಿ ಸಂಸ್ಥೆಗಳು ಅಧಿಕೃತಗೊಳಿಸಿದೆ. ಈ ಮೂಲಕ ವೃದ್ಧರು, ಮಧ್ಯವಯಸ್ಸಿನವರಿಗೆ ಹಾಗೂ ಯುವಕರಿಗೆ ಮಾತ್ರ ಕೊರೊನಾ ಸೋಂಕು ಅಪಾಯ ಎಂದು ನಂಬಿಕೊಂಡಿದ್ದವರಿಗೆ ಈ ಸಾವು ಆತಂಕ ಹೆಚ್ಚಿಸಿದೆ.
ಗುಜರಾತ್ನಲ್ಲಿ ಇದುವರೆಗೂ ಮೃತಪಟ್ಟವರ ಪೈಕಿ ಇದು ಅತ್ಯಂತ ಕಡಿಮೆ ವಯಸ್ಸಿನ ಮಗು ಎಂದು ವರದಿಯಾಗಿದೆ. ರಾಜ್ಯದಲ್ಲಿ ಒಟ್ಟು ಸಾವಿನ ಸಂಖ್ಯೆ 16ಕ್ಕೆ ಏರಿದೆ. ರಾಜ್ಯದಲ್ಲಿ ಇದುವರೆಗೂ 175 ಜನರಲ್ಲಿ ಕೊವಿಡ್ 19 ಸೋಂಕು ಪತ್ತೆಯಾಗಿದೆ.
ಅಂದ್ಹಾಗೆ, ಆ ಮಗುವಿನ ಪೋಷಕರಲ್ಲಿ ಕೊರೊನಾ ವೈರಸ್ಗೆ ಸಂಬಂಧಪಟ್ಟ ಯಾವುದೇ ರೋಗಲಕ್ಷಣಗಳು ಕಂಡು ಬಂದಿಲ್ಲ. ಆದರೂ ಮುಂಜಾಗ್ರತೆ ಕ್ರಮವಾಗಿ ಅವರನ್ನು ಕ್ವಾರೆಂಟೈನ್ ಮಾಡಲಾಗಿದೆ ಎಂದು ಜಿಲ್ಲಾಡಳಿತ ತಿಳಿಸಿದೆ.