ಸರಕಾರೀ ಪರೀಕ್ಷೆ: ಪ್ರಶ್ನೆ ಪತ್ರಿಕೆಯಲ್ಲಿ ಏನಿತ್ತು ಗೊತ್ತಾ!
ಕೊಚ್ಚಿ, ಜು 21: ಪಠ್ಯ ಪುಸ್ತಕ, ಸಾಮಾನ್ಯ ಜ್ಞಾನದ ಬಗ್ಗೆ ಓದಿ ಪರೀಕ್ಷೆಗೆ ತಯಾರಾಗುವ ವಿದ್ಯಾರ್ಥಿಗಳು ಇನ್ನು ಯಾವ ಯಾವ ಕೋನಗಳಲ್ಲಿ ವಿಷಯಗಳನ್ನು ಅರಿತಿರಬೇಕೋ?
ಕೇರಳ ಸರಕಾರ ನಡೆಸುವ ಪರೀಕ್ಷೆಯೊಂದರ ಪ್ರಶ್ನೆ ಪತ್ರಿಕೆಯಲ್ಲಿ ಬಂದಿದ್ದ ಪ್ರಶ್ನೆಯನ್ನು ನೋಡಿ ವಿದ್ಯಾರ್ಥಿಗಳು ಒಂದು ಕ್ಷಣ ಅಚ್ಚರಿಗೊಳಗಾದರಂತೆ.
ಸ್ಟಾಫ್ ಸಿಲೆಕ್ಷನ್ ಕಮಿಷನ್ ನಡೆಸುವ ಜಂಟಿ ಪದವಿ ಪರೀಕ್ಷೆಯೊಂದರಲ್ಲಿ 'ಈ ನಾಲ್ವರು ನಟಿಯರ ಪೈಕಿ ಯಾರು ಅತಿ ಎತ್ತರ' ಎನ್ನುವ ಪ್ರಶ್ನೆ ಬಂದಿತ್ತಂತೆ. ಜೊತೆಗೆ ಅದಕ್ಕೆ ಆಯ್ಕೆಯನ್ನೂ ಕೊಟ್ಟಿದ್ದರಂತೆ.
ಪ್ರೀತಿ ಜಿಂಟಾ, ದೀಪಿಕಾ ಪಡುಕೋಣೆ, ಕತ್ರಿನಾ ಕೈಫ್ ಮತ್ತು ಹುಮಾ ಕ್ವರೇಶಿ ಈ ನಾಲ್ವರು ಆಯ್ಕೆಯಲ್ಲಿದ್ದರಂತೆ. ಪರೀಕ್ಷೆ ಹಾಲಿನಲ್ಲಿ ಈ ಪ್ರಶ್ನೆ ನೋಡಿ ವಿದ್ಯಾರ್ಥಿಗಳು ಮುಸಿಮುಸಿ ನಗಲು ಆರಂಭಿಸಿ, ಗೊಂದಲಕ್ಕೊಳಗಾಗಿದ್ದಂತೂ ನಿಜ.
ಕೊನೆಗೆ ದೀಪಿಕಾ ಪಡುಕೋಣೆ ಇದಕ್ಕೆ ಸರಿಯಾದ ಉತ್ತರವೆಂದು ಬರೆದು ಪರೀಕ್ಷಾ ಕೊಠಡಿಯಿಂದ ಹೊರಬಂದೆವು ಎಂದು ಪರೀಕ್ಷೆ ಬರೆಯಲು ಬಂದಿದ್ದ ವಿದ್ಯಾರ್ಥಿಯೊಬ್ಬರು ತನ್ನ ಅನುಭವದ ಮಾತನ್ನು ಬಿಚ್ಚಿಟ್ಟಿದ್ದಾರೆ. (ಮಾಹಿತಿ: ಟೈಮ್ಸ್ ಆಫ್ ಇಂಡಿಯಾ)