ನವವಿವಾಹಿತರಿಗೆ ಯೋಗಿ ಸರ್ಕಾರದಿಂದ 'ನಿಯಂತ್ರಣ' ಗಿಫ್ಟ್
ಲಕ್ನೋ, ಜುಲೈ 06: ಉತ್ತರ ಪ್ರದೇಶದ ಯೋಗಿ ಆದಿತ್ಯನಾಥ್ ಸರ್ಕಾರ ಮತ್ತೊಂದು ಹೊಸ ಯೋಜನೆ ಪ್ರಕಟಿಸಿದೆ. ಜನನ ನಿಯಂತ್ರಣಕ್ಕಾಗಿ ಜಾರಿಗೆ ಬರಲಿರುವ ಈ ಯೋಜನೆಯಂತೆ ನವ ವಿವಾಹಿತರಿಗೆ ಶಗುನ್ (ಉಡುಗೊರೆ) ದೊರೆಯಲಿದೆ. ಯೋಗಿ ಅವರು ನೀಡಲಿರುವ ಶಗುನ್ ಬೇರೇನೂ ಅಲ್ಲ, ಕಾಂಡೋಮ್ ಹಾಗೂ ಜನಸಂಖ್ಯಾ ನಿಯಂತ್ರಣ ಮಾಹಿತಿಯ ಕಿಟ್.
ಕುಟುಂಬ ಯೋಜನೆಯ ಅಗತ್ಯ ಹಾಗೂ ಎರಡು ಮಕ್ಕಳ ನಡುವೆ ಇರಬೇಕಾದ ಅಂತರ ಮುಂತಾದ ಮಾಹಿತಿಗಳುಳ್ಳ ಕಿಟ್ ವಿತರಣೆ ಮಾಡಲು ಸರ್ಕಾರ ಮುಂದಾಗಿದೆ. ಜುಲೈ 11ರಂದು ಆಚರಿಸಲಾಗುವ ವಿಶ್ವ ಜನಸಂಖ್ಯಾ ದಿನದಂದು ಈ ಗಿಫ್ಟ್ ಯೋಜನೆ ಜಾರಿಗೊಳ್ಳಲಿದೆ.
30 ದಿನಗಳಲ್ಲಿ ವಿವಾಹ ನೋಂದಾಯಿಸಿ, ಇಲ್ಲವೇ ದಂಡ ಕಟ್ಟಿ!
ಕಿಟ್ ನಲ್ಲಿ ಏನಿರಲಿದೆ?: ರಾಜ್ಯದ ಆಶಾ ಕಾರ್ಯಕರ್ತೆಯರು ಕುಟುಂಬ ಯೋಜನೆಯ ಸಂದೇಶ, ಕಾಂಡೋಂಗಳು, ಸಾಮಾನ್ಯ ಗರ್ಭನಿರೋಧಕ, ತುರ್ತು ಗರ್ಭನಿರೋಧಕ ಮಾತ್ರೆಗಳು ಹಾಗೂ ನವವಧುವರರಿಗೆ ಅಗತ್ಯವಾದ ಇತರ ವಸ್ತುಗಳಾದಂತಹ ಟವೆಲ್ ಗಳು, ಕರ್ಚೀಫ್, ನೈಲ್ ಕಟ್ಟರ್, ಬಾಚಣಿಗೆ, ಕನ್ನಡಿ ಮುಂತಾದವುಗಳನ್ನೊಳಗೊಡ ಕಿಟ್ ಒಂದನ್ನು ಅವರಿಗೆ ನೀಡಲಿದ್ದಾರೆ.
ಒಂದು ವೇಳೆ ನವವಿವಾಹಿತರು ಅನಕ್ಷರಸ್ಥರಾಗಿದ್ದರೆ ಹಾಗೂ ಆರೋಗ್ಯ ಇಲಾಖೆಯ ಪತ್ರವನ್ನು ಓದಲು ಅಸಮರ್ಥರಾದರೆ, ಚಿಂತಿಸಬೇಕಾಗಿಲ್ಲ. ಆಶಾ ಕಾರ್ಯಕರ್ತರೇ ತಿಳಿ ಹೇಳಿ, ನೆರವು ನೀಡಲಿದ್ದಾರೆ.
ಲೈಂಗಿಕ ಶಿಕ್ಷಣ ಅಷ್ಟೊಂದು ಮಹತ್ವ ಪಡೆಯದ ರಾಜ್ಯವೊಂದರಲ್ಲಿ ಆರಂಭಗೊಳ್ಳುವ ಮಿಶನ್ ಪರಿವಾರ್ ವಿಕಾಸ್ ಯೋಜನೆ ಸ್ವಾಗತಾರ್ಹ ಎಂದು ಹಲವು ಸಾಮಾಜಿಕ ಕಾರ್ಯಕರ್ತರು ಹೇಳಿಕೊಂಡಿದ್ದಾರೆ