ಶಿಮ್ಲಾದಲ್ಲಿ ಕಳೆದ 13 ವರ್ಷಗಳಲ್ಲೇ ಕಾಣದ ದಾಖಲೆಯ ಮಳೆ
ಶಿಮ್ಲಾ, ಜು.3: ಕಳೆದ ಮೂರು ತಿಂಗಳಿನಿಂದ ಬಿಸಿಲ ಬೇಗೆಯಲ್ಲಿ ಬೆಂದಿದ್ದ, ನೀರಿಗೂ ಪರಿತಪಿಸುತ್ತಿದ್ದ ಹಿಮಾಚಲ ಪ್ರದೇಶದ ಶಿಮ್ಲಾ ಜನತೆಗೆ ವರುಣನ ಆಗಮನದಿಂದ ಆನಂದವಾಗಿದೆ. ಜತೆಗೆ ಈ ಬಾರಿ 13 ವರ್ಷಗಳಲ್ಲೇ ಆಗದ ದಾಖಲೆ ಮಳೆಯಾಗಿದೆ.
ಶಿಮ್ಲಾದಲ್ಲಿ ಕಳೆದ ಮೂರು ತಿಂಗಳಿನಿಂದ ಬೇಸಿಗೆಯಲ್ಲಿ ನೀರಿಗೆ ಹಾಹಾಕಾರ ಉಂಟಾಗಿತ್ತು, ಒಂದು ವಾರಕ್ಕೊಮ್ಮೆ ನೀರು ಸರಬರಾಜು ಮಾಡಲಾಗುತ್ತಿತ್ತು.ಕಿಲೋಮೀಟರ್ಗಳಷ್ಟು ದೂರ ನಡೆದು ನೀರನ್ನು ಹೊತ್ತು ಮನೆಗೆ ಬರಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿತ್ತು. ಇದೀಗ ಮಳೆ ಬಂದು ಜತೆಗೆ ಅನಾಹುತವನ್ನೂ ತಂದಿದೆ.
ಉಡುಪಿ, ಉತ್ತರ ಕನ್ನಡ, ದಕ್ಷಿಣ ಕನ್ನಡದಲ್ಲಿ ಭಾರೀ ಮಳೆ ಸಂಭವ
ಕಳೆದ 24 ಗಂಟೆಯೊಳಗ್ಗೆ ಬರೋಬ್ಬರಿ 118 ಮಿ.ಮೀ ಮಳೆಯಾಗಿದೆ. 2005ರಲ್ಲಿ 118.4 ಮಿ.ಮೀನಷ್ಟು ಮಳೆಯಾಗಿತ್ತು ಎಂದು ಹವಾಮಾನ ಇಲಾಖೆ ತಿಳಿಸಿದೆ. ಅರೇಬಿಯನ್ ಸಮುದ್ರ ಹಾಗೂ ಬೇ ಆಫ್ ಬೆಂಗಾಲ್ನಲ್ಲಿ ದಟ್ಟ ಮೋಡ ಆವರಿಸಿಕೊಂಡಿರುವುದು ಇಲ್ಲಿಯ ಮಳೆಗೆ ಕಾರಣವಾಗಿದೆ.
ನೈಋತ್ಯ ಮುಂಗಾರು ರಾಜ್ಯದಲ್ಲಿ ಚುರುಕಾಗಿದ್ದು, ಶಿಮ್ಲಾ, ಬಿಲಾಸ್ಪುರ್, ಸೋಲನ್, ಊನಾ ಜಿಲ್ಲೆಗಳಲ್ಲಿ ಅತಿ ಹೆಚ್ಚು ಮಳೆಯಾಗುತ್ತಿದೆ. ಬಿಲಾಸ್ಪುರ ಹಾಗೂ ಮಂಡಿ 65 ಹಾಗೂ 45ಮಿ.ಮೀನಷ್ಟು ಮಳೆಯಾಗಿದೆ. ಗುರುವಾರದವರೆಗೂ ಭಾರಿ ಮಳೆ ಮುಂದುವರೆಯಲಿದೆ.