ಬಜರಂಗ ದಳ ನಿಷೇಧ: ಫೇಸ್ಬುಕ್ ಸುಳ್ಳು ಹೇಳುತ್ತಿದೆಯೇ ಎಂದು ರಾಹುಲ್ ಗಾಂಧಿ ಪ್ರಶ್ನೆ
ನವದೆಹಲಿ, ಡಿಸೆಂಬರ್ 18: ಬಲಪಂಥೀಯ ಸಂಘಟನೆ ಬಜರಂಗದಳದ ಮೇಲೆ ಸಾಮಾಜಿಕ ಜಾಲತಾಣದಲ್ಲಿ ನಿಷೇಧ ಹೇರಲು ಅಗತ್ಯವಾದ ಯಾವುದೇ ಪುರಾವೆಗಳು ಕಂಡುಬಂದಿಲ್ಲ ಎಂದು ಸಂಸದೀಯ ಸಮಿತಿಗೆ ಫೇಸ್ಬುಕ್ ಇಂಡಿಯಾ ಹೇಳಿಕೆ ನೀಡಿದೆ. ಇದಕ್ಕೆ ಪ್ರತಿಯಾಗಿ, ಸಾಮಾಜಿಕ ಮಾಧ್ಯಮ ದಿಗ್ಗಜ ಸಂಸ್ಥೆಯ ಸುರಕ್ಷತಾ ತಂಡವು ಮಾಡಿರುವ ಶಿಫಾರಸಿನ ಕುರಿತಾದ ಅಮೆರಿಕದ ಮಾಧ್ಯಮ ವರದಿಯೊಂದನ್ನು ಉಲ್ಲೇಖಿಸಿರುವ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ, ಭಾರತ ಮತ್ತು ಅದರ ಸಂಸತ್ಗೆ ಫೇಸ್ಬುಕ್ ಸುಳ್ಳು ಹೇಳುತ್ತಿದೆಯೇ? ಎಂದು ಪ್ರಶ್ನಿಸಿದ್ದಾರೆ.
ಬುಧವಾರ ಸಂಸದೀಯ ಸಮಿತಿ ಮುಂದೆ ಹೇಳಿಕೆ ನೀಡಿದ್ದ ಫೇಸ್ಬುಕ್ ಇಂಡಿಯಾದ ಮುಖ್ಯಸ್ಥ ಅಜಿತ್ ಮೋಹನ್, ಬಜರಂಗ ದಳವನ್ನು ಸಾಮಾಜಿಕ ಜಾಲತಾಣದಲ್ಲಿ ನಿಷೇಧಿಸುವ ಸಂಬಂಧ ಅಗತ್ಯವಾದ ಯಾವುದೇ ಅಂಶಗಳು ಫೇಸ್ಬುಕ್ ಸತ್ಯಪರಿಶೋಧನಾ ತಂಡಕ್ಕೆ ಕಂಡುಬಂದಿಲ್ಲ ಎಂದು ಹೇಳಿದ್ದರು.
ಗೂಗಲ್ ನಂತರ ಫೇಸ್ಬುಕ್ಗೆ ಎದುರಾಯ್ತು ಗಂಡಾಂತರ
ಕಾಂಗ್ರೆಸ್ ಮುಖಂಡ ಶಶಿ ತರೂರ್ ಅಧ್ಯಕ್ಷತೆಯ ಮಾಹಿತಿ ತಂತ್ರಜ್ಞಾನ ಸಂಸದೀಯ ಸ್ಥಾಯಿ ಸಮಿತಿ ಮುಂದೆ ಅಜಿತ್ ಮೋಹನ್ ಹಾಜರಾಗಿದ್ದರು. ನಾಗರಿಕರ ದತ್ತಾಂಶ ಸುರಕ್ಷತೆ ವಿಚಾರವಾಗಿ ಸಮಿತಿಯು ಅವರನ್ನು ಕರೆಸಿತ್ತು.
ದಾಖಲೆಯ ಸಂಖ್ಯೆಯಲ್ಲಿ ಫೇಸ್ಬುಕ್ ಬಳಕೆದಾರರ ಡೇಟಾ ಕೇಳಿದ ಭಾರತ ಸರ್ಕಾರ
ಬಜರಂಗ ದಳವನ್ನು ತನ್ನ ವೇದಿಕೆಯಿಂದ ನಿಷೇಧಿಸಬೇಕು ಎಂಬ ಫೇಸ್ಬುಕ್ ಸುರಕ್ಷತಾ ತಂಡದ ಅಭಿಪ್ರಾಯವನ್ನು ಒಳಗೊಂಡಿದ್ದ ವಾಲ್ ಸ್ಟ್ರೀಟ್ ಜರ್ನಲ್ ಪತ್ರಿಕೆಯ ವರದಿಯನ್ನು ಹಂಚಿಕೊಂಡಿರುವ ರಾಹುಲ್ ಗಾಂಧಿ, 'ಬಜರಂಗ ದಳದ ಪೋಸ್ಟ್ಗಳಲ್ಲಿನ ಅಂಶಗಳು ಆಕ್ರಮಣಕಾರಿಯಾಗಿದ್ದು, ಅದನ್ನು ನಿಷೇಧಿಸಬೇಕು ಎಂದು ಅಮೆರಿಕ ಫೇಸ್ಬುಕ್ ಹೇಳುತ್ತದೆ. ಬಜರಂಗ ದಳದ ಪೋಸ್ಟ್ಗಳು ಆಕ್ರಮಣಕಾರಿಯಾಗಿಲ್ಲ ಎಂದು ನಮ್ಮ ಸಂಸದೀಯ ಸಮಿತಿಗೆ ಫೇಸ್ಬುಕ್ ಇಂಡಿಯಾ ಹೇಳುತ್ತದೆ. ಭಾರತ ಮತ್ತು ಅದರ ಸಂಸತ್ತಿಗೆ ಫೇಸ್ಬುಕ್ ಸುಳ್ಳು ಹೇಳುತ್ತಿದೆಯೇ?' ಎಂದು ಪ್ರಶ್ನಿಸಿದ್ದಾರೆ.