ವಾಹನ ಚಾಲಕರಿಗೆ ಇಲ್ಲೊಂದು ಸಿಹಿ ಸುದ್ದಿ
ಎಲ್ ಎಲ್ ಅನ್ನು ಆನ್ ಲೈನ್ ಮೂಲಕವೇ ಪಡೆಯಬಹುದಾದ ವ್ಯವಸ್ಥೆಯೊಂದನ್ನು ಕೇಂದ್ರ ಸರ್ಕಾರ ಜಾರಿಗೆ ತರುತ್ತಿದೆ.
ನವದೆಹಲಿ, ಏಪ್ರಿಲ್ 1: ವಾಹನ ಚಾಲನೆಯನ್ನು ಕಲಿಯುತ್ತಿರುವವರಿಗೆ ಇಲ್ಲೊಂದು ಸಿಹಿಸುದ್ದಿಯಿದೆ. ಲರ್ನಿಂಗ್ ಲೈಸೆನ್ಸ್ ಅನ್ನು ಪಡೆಯಲು ಇನ್ನು ಮುಂದೆ ಆರ್ ಟಿ ಒ ಆಫೀಸ್ ಗಳ ಮುಂದೆ ಸಾಲುಗಟ್ಟುವ ಅಗತ್ಯವಿರೋಲ್ಲ, ಯಾಕಂದ್ರೆ ಎಲ್ ಎಲ್ ಅನ್ನು ಆನ್ ಲೈನ್ ಮೂಲಕವೇ ಪಡೆಯಬಹುದಾದ ವ್ಯವಸ್ಥೆಯೊಂದನ್ನು ಕೇಂದ್ರ ಸರ್ಕಾರ ಜಾರಿಗೆ ತರುತ್ತಿದೆ.
ಮಾರ್ಚ್ 31 ರಂದು ನಡೆದ ಮಂತ್ರಿಮಂಡಲ ಸಭೆಯ ನಂತರ ಮಾಧ್ಯಮವನ್ನುದ್ದೇಶಿಸಿ ಮಾತನಾಡಿದ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವ ನಿತಿನ್ ಗಡ್ಕರಿ, ಈ ವ್ಯವಸ್ಥೆ ದೇಶದಾದ್ಯಂತ ಲಭ್ಯವಿದ್ದು, ಇದರಿಂದಾಗಿ ನಕಲಿ ವಾಹನ ಪರವಾನಗಿಯ ಪ್ರಕರಣಗಳು ನಿಯಂತ್ರಣಕ್ಕೆ ಬರಲಿವೆ ಎಂದಿದ್ದಾರೆ.
ಮೋಟಾರ್ ವೆಹಿಕಲ್ ಬಿಲ್ -2016 ಅನ್ನು ಕೇಂದ್ರ ಸರ್ಕಾರ ತಿದ್ದುಪಡಿ ಮಾಡಿದ್ದು, ಇದರ ಅನ್ವಯ ಆಧಾರ್ ಸಂಖ್ಯೆಯ ಮೂಲಕವೇ ಆನ್ ಲೈನ್ ನಲ್ಲಿ ವಾಹನ ಚಾಲನಾ ಪರವಾನಗಿ(ಡ್ರೈವಿಂಗ್ ಲೈಸೆನ್ಸ್) ಅರ್ಜಿ ಸಲ್ಲಿಸಬಹುದು. ಮತ್ತು ಲರ್ನಿಂಗ್ ಲೈಸೆನ್ಸ್ ಅನ್ನು ಪಡೆಯುವುದಕ್ಕೆ ಆರ್ ಟಿ ಒ ಕಚೇರಿಗೆ ತೆರಳುವ ಅಗತ್ಯವಿಲ್ಲ. ವಾಹನದ ದಾಖಲಾತಿ ಸಂಖ್ಯೆಗೂ ಆಧಾರ್ ಲಿಂಕ್ ಮಾಡುವುದರಿಂದ ವಾಹನ ಕಳ್ಳರಿಗೂ ಶಾಸ್ತಿಯಾಗಲಿದೆ ಎಂದು ಗಡ್ಕರಿ ಹೇಳಿದ್ದಾರೆ.