ರೈಲ್ವೆ ಆನ್ ಲೈನ್ ಸೇವೆಗಳಿಗೆ ಡೆಬಿಟ್ ಕಾರ್ಡ್ ನಿರ್ಬಂಧವಿಲ್ಲ
ನವದೆಹಲಿ, ಸೆಪ್ಟೆಂಬರ್ 23: ಆನ್ ಲೈನ್ ಮೂಲಕ ರೈಲ್ವೆ ಸೇವೆಗಳ ಹಣ ಪಾವತಿಸಲು ಕೆಲವು ಬ್ಯಾಂಕ್ ಗಳ ಕ್ರೆಡಿಟ್ ಅಥವಾ ಡೆಬಿಟ್ ಕಾರ್ಡ್ ಗಳ ಬಳಕೆಯನ್ನು ಭಾರತೀಯ ರೈಲ್ವೆ ಕ್ಯಾಟೆರಿಂಗ್ ಹಾಗೂ ಪ್ರವಾಸೋದ್ಯಮ ನಿಗಮ (ಐಆರ್ ಸಿಟಿಸಿ) ನಿರ್ಬಂಧಿಸಿದೆ ಎಂಬ ವರದಿಗಳನ್ನು ಐಆರ್ ಸಿಟಿಸಿ ತಳ್ಳಿಹಾಕಿದೆ.
ರೈಲ್ವೆ ಮುಂಗಡ ಟಿಕೆಟ್ ಬುಕಿಂಗ್, ರೈಲಿನಲ್ಲಿ ಆಹಾರ ಖರೀದಿ ಸೇರಿದಂತೆ, ಭಾರತೀಯ ರೈಲ್ವೆಯ ಯಾವುದೇ ಸೇವೆಗಳನ್ನು ಆನ್ ಲೈನ್ ಮೂಲಕ ಪಡೆಯುವ ಗ್ರಾಹಕರು ಬಳಸುವ ಕೆಲ ಬ್ಯಾಂಕ್ ಗಳ ಡೆಬಿಟ್ ಕಾರ್ಡ್ ಗಳ ಮೇಲೆ ಭಾರತೀಯ ರೈಲ್ವೆ ನಿರ್ಬಂಧ ಹೇರಿದೆ ಎಂದು ಸೆ. 22ರಂದು ಕೆಲ ಮಾಧ್ಯಮಗಳಲ್ಲಿ ವರದಿಯಾಗಿತ್ತು.
ಸೆ. 23ರಂದು ಈ ಬಗ್ಗೆ ಸ್ಪಷ್ಟನೆ ಕೊಟ್ಟಿರುವ ಐಆರ್ ಸಿಟಿಸಿ, ರೈಲ್ವೆ ಸೇವೆಗಳಿಗೆ ಯಾವುದೇ ಬ್ಯಾಂಕ್ ಗಳ ಡೆಬಿಟ್ ಕಾರ್ಡ್ ಗಳನ್ನು ಉಪಯೋಗಿಸಬಹುದಾಗಿದೆ. ವೀಸಾ ಹಾಗೂ ಮಾಸ್ಟರ್ ಕಾರ್ಡ್ ಲೋಗೋ ಇರುವ ಯಾವುದೇ ಕಾರ್ಡ್ ಆಗಲೀ, ಅದರ ಮೂಲಕ ವ್ಯವಹರಿಸಲು ಈಗಲೂ ಅವಕಾಶವಿದೆ ಎಂದು ಹೇಳಿದೆ.
ಇದೇ ವೇಳೆ, ಕೆಲವಾರು ಬ್ಯಾಂಕ್ ಗಳ ಜತೆಗೆ ರೈಲ್ವೆ ಇಲಾಖೆಯು ಒಪ್ಪಂದ ಮಾಡಿಕೊಂಡಿದ್ದು, ಆಯಾ ಬ್ಯಾಂಕ್ ಗಳ ವೆಬ್ ಸೈಟ್ ಗಳ ಮೂಲಕ ವ್ಯಾಲ್ಯೂ ಆ್ಯಡೆಡ್ ಸೇವೆಗಳಿಗೆ ಅನುವು ಮಾಡಿಕೊಡಲಾಗಿದೆ. ಇದರಿಂದ ಆ ಬ್ಯಾಂಕ್ ಗ್ರಾಹಕರು ರೈಲ್ವೆ ಸೇವೆಗಳನ್ನು ತ್ವರಿತವಾಗಿ ಪಡೆಯಲು ಸಾಧ್ಯವಾಗುತ್ತದೆ ಎಂದು ಐಆರ್ ಸಿಟಿಸಿ ತಿಳಿಸಿದೆ.