ಆನ್ ಲೈನ್ ನಕಲಿ ವರರಿಗೆ ಮನೇಕಾ ಗಾಂಧಿ ಬರೆ
ನವದೆಹಲಿ, ನ. 7: ಮದುವೆಯಾಗಿದ್ದರೂ ಮದುವೆಯಾಗಿಲ್ಲ ವಧು ಬೇಕು ಎಂದು ಮ್ಯಾಟ್ರಿಮೋನಿಯಲ್ ವೆಬ್ಸೈಟ್ ನಲ್ಲಿ ಪ್ರೋಪೈಲ್ ಹಾಕಿಕೊಳ್ಳುವವರಿಗೆ ಬ್ರೇಕ್ ಹಾಕಲು ಕೇಂದ್ರದ ಮಕ್ಕಳ ಕಲ್ಯಾಣ ಸಚಿವೆ ಮನೇಕಾ ಗಾಂಧಿ ಮುಂದಾಗಿದ್ದಾರೆ.
ವೆಬ್ಸೈಟ್ ಮೂಲಕ ಸುಳ್ಳು ಹೇಳಿ ಹೆಣ್ಣು ಮಕ್ಕಳನ್ನು ವಂಚಿಸುತ್ತಿರುವವರ ಸಂಖ್ಯೆ ಪ್ರತಿದಿನ ಹೆಚ್ಚಾಗುತ್ತಿರುವ ಹಿನ್ನೆಲೆಯಲ್ಲಿ ಈ ಕ್ರಮ ತೆಗೆದುಕೊಳ್ಳಲಾಗಿದೆ. ಭಾರತ್ ಮ್ಯಾಟ್ರಿಮನಿ, ಜೀವನ್ಸಾಥಿ ಡಾಟ್ ಕಾಂನಂತಹ ವೆಬ್ಸೈಟ್ಗಳ ಪ್ರತಿನಿಧಿಗಳೊಂದಿಗೆ ಮನೇಕಾ ಸಭೆ ನಡೆಸಿ ಯಾವ ಯಾವ ಮುಂಜಾಗೃತಾ ಕ್ರಮ ತೆಗೆದುಕೊಳ್ಳಬೇಕು ಎಂದು ಸೂಚಿಸಿದ್ದಾರೆ.[ಹುಡಗಿ ಐಕ್ಯೂ ನೋಡಿ ಮದವಿ ಆಗ್ರೀಪಾ ಮತ್ತ!]
ವೆಬ್ಸೈಟ್ಗಳಲ್ಲಿ ಭದ್ರತಾ ಅಂಶಗಳನ್ನು ಸೇರಿಸಬೇಕು. ಅಲ್ಲದೇ ನೋಂದಣಿ ಮಾಡಿಕೊಳ್ಳುವ ಮೊದಲು ಆಧಾರ್ ಕಾರ್ಡ್ ಕಡ್ಡಾಯ ಎಂಬ ನಿಯಮ ಜಾರಿ ಮಾಡಬೇಕು. ಇದರಿಂದ ವ್ಯಕ್ತಿಗಳನ್ನು ಸುಲಭವಾಗಿ ಗುರುತಿಸಲು ಸಾಧ್ಯವಾಗುತ್ತದೆ ಎಂದು ಮನೇಕಾ ಗಾಂಧಿ ಹೇಳಿದ್ದಾರೆ.[ಮದುವೆಗೆ ಮುಂಚೆ ಈ ಪರೀಕ್ಷೆ ಬೇಕೆ?]
ವಿವಾಹ ವೆಬ್ಸೈಟ್ಗಳಿಗೆ ನೋಂದಣಿ ಮಾಡಿಕೊಳ್ಳಲು ಮೊಬೈಲ್ ಸಂಖ್ಯೆ ಸಾಕು ಎಂಬ ನಿಯಮ ಈಗ ಚಾಲ್ತಿಯಲ್ಲಿದೆ. ಆದರೆ ಇದರಿಂದ ವ್ಯಕ್ತಿ ಮದುವೆಯಾಗಿದ್ದಾನೋ? ಇಲ್ಲವೋ? ಎಂಬುದನ್ನು ಕಂಡು ಹಿಡಿಯಲು ಅಸಾಧ್ಯ. ಹಾಗಾಗಿ ಆಧಾರ್ ಸಂಖ್ಯೆ ಬಳಸಿಕೊಳ್ಳಬೇಕು ಎಂದು ಮನೇಕಾ ಸಲಹೆ ನೀಡಿದ್ದಾರೆ.