ಆಕ್ಸಿಸ್ ಬ್ಯಾಂಕ್ ನ 20 ನಕಲಿ ಖಾತೇಲಿ 60 ಕೋಟಿ ಪತ್ತೆ
ನೋಟು ನಿಷೇಧ ಘೋಷಣೆ ನಂತರ ಆಕ್ಸಿಸ್ ಬ್ಯಾಂಕ್ ನ ಶಾಖೆಗಳಲ್ಲಿ ಪದೇಪದೇ ಅವ್ಯವಹಾರ ಕಂಡುಬರುತ್ತಿದೆ. ಚಾಂದಿನಿ ಚೌಕ್ ಶಾಖೆಯ ನಕಲಿ ಖಾತೆಗಳಲ್ಲಿ ನೂರು ಕೋಟಿ ಪತ್ತೆಯಾಗಿತ್ತು. ಈಗ ನೋಯಿಡಾದಲ್ಲಿ ಅರವತ್ತು ಕೋಟಿಯಷ್ಟು ಸಿಕ್ಕಿ ಹಾಕಿಕೊಂಡಿದೆ
ನೋಯಿಡಾ, ಡಿಸೆಂಬರ್ 15: ಆಕ್ಸಿಸ್ ಬ್ಯಾಂಕ್ ಶಾಖೆಯಲ್ಲಿ ನಡೆದಿರುವ ಮತ್ತೊಂದು ಹಗರಣ ಬೀದಿಗೆ ಬಂದಿದೆ. ಇಪ್ಪತ್ತು ನಕಲಿ ಖಾತೆಗಳನ್ನು ಮಾಡಿ, ಅದರಲ್ಲಿ ಹಾಕಿದ್ದ 60 ಕೋಟಿ ರುಪಾಯಿಯನ್ನು ಪತ್ತೆ ಹಚ್ಚಿದ್ದಾರೆ ಆದಾಯ ತೆರಿಗೆ ಇಲಾಖೆ ಅಧಿಕಾರಿಗಳು. ಈ ಹಗರಣ ಪತ್ತೆಯಾಗಿರುವುದು ಗುರುವಾರ, ಆಕ್ಸಿಸ್ ಬ್ಯಾಂಕ್ ನ ನೋಯಿಡಾ ಶಾಖೆಯಲ್ಲಿ.
ಈ ಖಾತೆಗಳಲ್ಲಿ ಕ್ರಮಬದ್ಧವಾಗಿ ಹಣ ತುಂಬಲಾಗಿದೆ. ಆದರೆ ಈ ಖಾತೆಗಳು ಇದ್ದಿದ್ದು ಕಡಿಮೆ ಆದಾಯದ ನೌಕರರು ಹಾಗೂ ಕೆಲಸಗಾರರ ಹೆಸರಿನಲ್ಲಿ. ಈ ಖಾತೆಗಳ ಬಗ್ಗೆ ಆದಾಯ ತೆರಿಗೆ ಇಲಾಖೆ ಗೆ ಗುಮಾನಿ ಬಂದಿದ್ದು ಕೂಡ ಆಸಕ್ತಿಕರವಾಗಿದೆ. ನೋಯಿಡಾದ ಆಭರಣ ವ್ಯಾಪಾರಿಯೊಬ್ಬರು ನವೆಂಬರ್ 8ರ ನಂತರ 600 ಕೋಟಿ ಮೊತ್ತದ ಚಿನ್ನ ಮಾರಿದ್ದರು. ಆ ಹಣವನ್ನು ಇದೇ ನೋಯಿಡಾ ಶಾಖೆಯಲ್ಲಿ ತುಂಬಿದ್ದರು.[ಆಕ್ಸಿಸ್ ಬ್ಯಾಂಕ್ ಪರವಾನಗಿ ರದ್ದು ಸುದ್ದಿ ರದ್ದಿ]
ಸಾಂದರ್ಭಿಕ ಚಿತ್ರ
ಮಧ್ಯಾಹ್ನ 12.30ರ ವೇಳೆಯಲ್ಲೂ ಪರಿಶೀಲನೆ ಮುಂದುವರಿದಿತ್ತು. ಬ್ಯಾಂಕ್ ಶಾಖೆ ಹೊರಭಾಗದಲ್ಲಿ ಭಾರೀ ಸಂಖ್ಯೆಯಲ್ಲಿ ಜನ ಸೇರಿದ್ದರು. ಮುಂಜಾಗ್ರತಾ ಕ್ರಮವಾಗಿ ಪೊಲೀಸ್ ಸಿಬ್ಬಂದಿಯನ್ನು ಹಾಕಲಾಗಿತ್ತು. ಕೆಲ ದಿನಗಳ ಹಿಂದೆ ಚಾಂದಿನಿ ಚೌಕ್ ನ ಆಕ್ಸಿಸ್ ಬ್ಯಾಂಕ್ ಶಾಖೆಯ ನಲವತ್ನಾಲ್ಕು ಅನುಮಾನಾಸ್ಪದ ಖಾತೆಗಳಲ್ಲಿ ನೂರು ಕೋಟಿ ರುಪಾಯಿ ಪತ್ತೆ ಹಚ್ಚಲಾಗಿತ್ತು.[ಚಾಂದಿನಿ ಚೌಕ್ ಶಾಖೆ ಬ್ಯಾಂಕ್ ನಕಲಿ ಖಾತೆಗಳಲ್ಲಿ ಸಿಕ್ಕಿದ್ದು 100 ಕೋಟಿ!]
ನೋಟು ಬದಲಾವಣೆ ವೇಳೆ ಆಕ್ಸಿಸ್ ಬ್ಯಾಂಕ್ ನಲ್ಲಿ ಪದೇ ಪದೇ ಇಂಥ ನಿಯಮಬಾಹಿರ ಸಂಗತಿಗಳು ನಡೆಯುತ್ತಿರುವುದರಿಂದ, 'ಎಲ್ಲವೂ ಸರಿಯಾಗಿ ಇರೋ ಹಾಗೆ ನೋಡಿಕೊಳ್ಳಿ' ಎಂದು ಸರಕಾರ ಆ ಬ್ಯಾಂಕ್ ಗೆ ಎಚ್ಚರಿಕೆ ನೀಡಿದೆ.