43 ದೇಶಗಳ ಪ್ರವಾಸಿಗರಿಗೆ ಇ ವೀಸಾ ಸೌಲಭ್ಯ

ನವದೆಹಲಿ, ನ. 27: ಯುಎಸ್, ಜರ್ಮನಿ, ಇಸ್ರೇಲ್, ಆಸ್ಟ್ರೇಲಿಯಾದ ಸೇರಿದಂತೆ 43 ರಾಷ್ಟ್ರಗಳ ಪ್ರವಾಸಿಗರಿಗೆ ಗುರುವಾರದಿಂದ ವೀಸಾ ಆನ್ ಅರೈವಲ್ ಸೌಲಭ್ಯ ಸಿಗಲಿದೆ ಎಂದು ಗೃಹ ಸಚಿವ ರಾಜನಾಥ್ ಸಿಂಗ್ ಘೋಷಿಸಿದ್ದಾರೆ.ಗೃಹ ಸಚಿವ ರಾಜನಾಥ್ ಸಿಂಗ್ ಮತ್ತು ಪ್ರವಾಸೋದ್ಯಮ ಸಚಿವ ಡಾ.ಮಹೇಶ್ ಶರ್ಮಾ ದೆಹಲಿಯಲ್ಲಿ ಇ ವೀಸಾ ಸೌಲಭ್ಯವನ್ನು ಲೋಕಾರ್ಪಣೆ ಮಾಡಿದ್ದಾರೆ.

ಎಲೆಕ್ಟ್ರಾನಿಕ್ ಟ್ರಾವೆಲ್ ಅಥರೈಜೈಷನ್(ಈಟಿಎ) ಸೌಲಭ್ಯದ ಮೂಲಕ ಪ್ರವಾಸಿ ವೀಸಾವನ್ನು 43 ರಾಷ್ಟ್ರಗಳ ನಾಗರಿಕರು ಪಡೆದುಕೊಳ್ಳಬಹುದು. ಮೊದಲ ಹಂತದಲ್ಲಿ ಭಾರತದ 9 ವಿಮಾನ ನಿಲ್ದಾಣಗಳಲ್ಲಿ ಇ ವೀಸಾ ಸೌಲಭ್ಯ ಲಭ್ಯವಿರುತ್ತದೆ. ದೆಹಲಿ, ಮುಂಬೈ, ಕೋಲ್ಕತ್ತಾ, ಚೆನ್ನೈ, ಬೆಂಗಳೂರು, ಹೈದರಾಬಾದ್, ಕೊಚ್ಚಿ, ತಿರುವನಂತಪುರ ಹಾಗೂ ಗೋವಾದಲ್ಲಿ ಸುಮಾರು 76 ಪ್ರತ್ಯೇಕ ಕೌಂಟರ್ ಗಳನ್ನು ತೆರೆಯಲಾಗಿದೆ.

ಅರ್ಜಿ ಸಲ್ಲಿಸುವುದು ಹೇಗೆ? : ವಿದೇಶಿ ಪ್ರವಾಸಿಗರು ಆನ್ ಲೈನ್ ಮೂಲಕ ಅರ್ಜಿ ಸಲ್ಲಿಸಿ, ತಮ್ಮ ಭಾವಚಿತ್ರ, ಪಾಸ್ ಪೋರ್ಟ್ ವಿವರಗಳನ್ನು ದಾಖಲಿಸಬೇಕು, ಶುಲ್ಕವನ್ನು ಆನ್ ಲೈನ್ ಮೂಲಕವೇ ಪಾವತಿಸಬಹುದು. ಅರ್ಜಿ ಸಲ್ಲಿಸಿದ 72 ಗಂಟೆಗಳ ನಂತರ ಈಟಿಎನಿಂದ ಇಮೇಲ್ ಕಳಿಸಲಾಗುತ್ತದೆ.

ಏನೇನು ಅನುಮತಿ ಸಿಗಲಿದೆ: ಪ್ರವಾಸಿ ವೀಸಾ ಮೂಲಕ ದೇಶದ ಪ್ರವಾಸಿ ತಾಣಗಳ ವೀಕ್ಷಣೆ, ಗೆಳೆಯರು, ಆಪ್ತ ಬಳಗವನ್ನು ಭೇಟಿ ಮಾಡುವುದು, ಕಡಿಮೆ ಅವಧಿಯ ವೈದ್ಯಕೀಯ ನೆರವು ಪಡೆದುಕೊಳ್ಳುವುದು, ಸಣ್ಣಪುಟ್ಟ ವ್ಯಾಪಾರ ವಹಿವಾಟಿಗೂ ಅನುಮತಿ ಸಿಗಲಿದೆ.

ಮೊದಲ ಹಂತದಲ್ಲಿ ಇಸ್ರೇಲ್, ಪ್ಯಾಲೆಸ್ಟೈನ್, ಜರ್ಮನಿ, ಯುಎಸ್, ಆಸ್ಟ್ರೇಲಿಯಾ ಸೇರಿದಂತೆ 40ಕ್ಕೂ ಅಧಿಕ ದೇಶದ ನಾಗರಿಕರಿಗೆ ಇವೀಸಾ ಸೌಲಭ್ಯ ಸಿಗಲಿದೆ. [40 ದೇಶದ ಪ್ರವಾಸಿಗರಿಗೆ ಇ-ವೀಸಾ ಭಾಗ್ಯ]

ಮುಂದಿನ ಹಂತದ ಯೋಜನೆ: ಮುಂದಿನ ಹಂತದಲ್ಲಿ ಇ ವೀಸಾ ಸೌಲಭ್ಯವನ್ನು ಮೆಕ್ಸಿಕೋ, ಕೀನ್ಯಾ, ಫಿಜಿ ಮುಂತಾದ ದೇಶಗಳಿಗೆ ನೀಡಲಾಗುವುದು ಎಂದು ಗೃಹ ಇಲಾಖೆ ಹೇಳೀದೆ. ಪ್ರವಾಸೋದ್ಯಮ, ಶಿಕ್ಷಣ, ಸಾಂಸ್ಕೃತಿಕ ವಿನಿಯಮ ಹೆಚ್ಚಳಕ್ಕೆ ಈ ಸೌಲಭ್ಯ ಅನುಕೂಲಕರ ಎಂದು ಇಂಡಿಯನ್ ಅಸೋಸಿಯೇಷನ್ ಆಫ್ ಟೂರ್ ಅಪರೇಟರ್ಸ್ ಅಧ್ಯಕ್ಷ ಸುಭಾಷ್ ಗೋಯಲ್ ಪ್ರತಿಕ್ರಿಯಿಸಿದ್ದಾರೆ. ಕಳೆದ ಹತ್ತು ತಿಂಗಳಿನಲ್ಲಿ ಭಾರತ ಸುಮಾರು 51.79 ಲಕ್ಷಕ್ಕೂ ಅಧಿಕ ವಿದೇಶಿ ಪ್ರವಾಸಿಗರನ್ನು ಕಂಡಿದೆ.

ವೀಸಾ ಆನ್ ಅರೈವಲ್ : ಈಗಾಗಲೇ ದಕ್ಷಿಣ ಕೊರಿಯಾ, ಜಪಾನ್, ಫಿನ್ ಲ್ಯಾಂಡ್, ಸಿಂಗಪುರ, ನ್ಯೂಜಿಲೆಂಡ್, ಇಂಡೋನೇಷಿಯಾ, ಮ್ಯಾನ್ಮಾರ್, ವಿಯೆಟ್ನಾಂ ಹಾಗೂ ಲಾವೋಸ್ ದೇಶಗಳಿಗೆ ವೀಸಾ ಆನ್ ಅರೈವಲ್(VoA) ಸೌಲಭ್ಯ ಸಿಕ್ಕಿದೆ. ಈಗ ಇದರ ಜೊತೆಗೆ ಇ ವೀಸಾ ಸೌಲಭ್ಯವೂ ಲಭಿಸಲಿದೆ.

ಇ ವೀಸಾ ವಂಚಿತ ರಾಷ್ಟ್ರಗಳು: ಪಾಕಿಸ್ತಾನ, ಸೂಡನ್, ಅಫ್ಘಾನಿಸ್ತಾನ, ಇರಾನ್, ಇರಾಕ್, ನೈಜೀರಿಯಾ, ಶ್ರೀಲಂಕಾ, ಸೋಮಾಲಿಯಾ ದೇಶಗಳಿಗೆ ಸದ್ಯಕ್ಕೆ ಇ ವೀಸಾ ಸೌಲಭ್ಯ ನೀಡಲಾಗಿಲ್ಲ.

English summary

Visitors from over 40 countries, including Germany, the US, Israel and Palestine, will soon be able to avail the much-awaited electronic visa facility which is launched on November 27 by Home Minister Rajnath Singh.