ಅತ್ಯಾಚಾರ ಸಂತ್ರಸ್ಥೆಯ ಮೇಲೆ ನಾಲ್ಕನೇ ಬಾರಿ ಆಸಿಡ್ ದಾಳಿ!
ಲಕ್ನೋ, ಜುಲೈ 3: ಇದೆಂಥ ಅಮಾನವೀಯ ಕೃತ್ಯ! ಅತ್ಯಾಚಾರ ಸಂತ್ರಸ್ಥೆಯಾಗಿ ಕತ್ತಲಲ್ಲೇ ಬದುಕು ಸವೆಸುತ್ತಿದ್ದ 35 ವರ್ಷದ ಮಹಿಳೆಯೊಬ್ಬರ ಮೇಲೆ ನಾಲ್ಕನೇ ಬಾರಿ ಆಸಿಡ್ ದಾಳಿ ನಡೆದಿರುವುದು ದೇಶ ತಲೆತಗ್ಗಿಸಬೇಕಾಕಾದ ವಿಷಯವೇ ಸರಿ!
ಘಟನೆ ನಡೆದಿದ್ದು, ಜು.1 ರ ಸಂಜೆ ಉತ್ತರ ಪ್ರದೇಶದ ಲಕ್ನೋದ ಅಲಿಗಂಜ್ ಎಂಬ ಸ್ಥಳದಲ್ಲಿ. ಸಂಜೆ 8-9 ಗಂಟೆಯ ಸಮಯದಲ್ಲಿ ನೀರು ತುಂಬಿಸಿಕೊಂಡು ತಾನಿದ್ದ ಹಾಸ್ಟೆಲ್ ನತ್ತ ಹೊರಟಿದ್ದ ಯುವತಿಯ ಮೇಲೆ ಆಸಿಡ್ ದಾಳಿ ನಡೆದಿದ್ದು, ದಾಳಿ ನಡೆಸಿದ್ದು ಯಾರ ಎಂಬ ಬಗ್ಗೆ ಮಾಹಿತಿ ದೊರೆತಿಲ್ಲ.
ಮಾಜಿ ಪ್ರಿಯಕರನ ಮೇಲೆ ಆಸಿಡ್ ದಾಳಿ ನಡೆಸಿದ ಮುಂಬೈನ ಯುವತಿ
ಆಸಿಡ್ ದಾಳಿಯಿಂದಾಗಿ ಯುವತಿಯ ಮುಖದ ಒಂದು ಪಾರ್ಶ್ವ ಸಂಪೂರ್ಣ ಸುಟ್ಟಿದ್ದು, ಆಕೆ ಪ್ರಜ್ಞಾಹೀನ ಸ್ಥಿತಿಯಲ್ಲಿದ್ದು, ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾಳೆ.
ಲಂಡನ್ ಕ್ಲಬ್ ನಲ್ಲಿ ಹನ್ನೆರಡು ಮಂದಿ ಮೇಲೆ Acid ದಾಳಿ
ಆಕೆಯ ಮೇಲೆ ಈ ಮೊದಲು ಮೂರು ಬಾರಿ ಆಸಿಡ್ ದಾಳಿ ನಡೆದಿದ್ದ ಕಾರಣ, ಆಕೆಗೆ ವಿಶೇಷ ಭದ್ರತೆ ನೀಡಲಾಗಿತ್ತು. ಆದರೂ ಈ ದಾಳಿ ನಡೆದಿದ್ದು ಆಶ್ಚರ್ಯದ ಸಂಗತಿ, ನಾವು ಈ ಬಗ್ಗೆ ಹೆಚ್ಚಿನ ನಿಗಾ ವಹಿಸಿ ತನಿಗೆ ನಡೆಸುವುದಾಗಿ, ಉತ್ತರ ಪ್ರದೇಶ ಮಹಿಳಾ ಕಲ್ಯಾಣ ಸಚಿವರಾದ ರಿತಾ ಬಹುಗುಣ ಜೋಶಿ ಹೇಳಿದ್ದಾರೆ.
ಅತ್ಯಾಚಾರದ ಕಹಿನೆನಪು
ಇಬ್ಬರು ಮಕ್ಕಳ ತಾಯಿಯಾಗಿದ್ದ ಆಕೆಯ ಮೇಲೆ ಉತ್ತರ ಪ್ರದೇಶದ ಗ್ರಾಮವೊಂದರಲ್ಲಿ 2008 ರಲ್ಲೇ ಸಾಮೂಹಿಕ ಅತ್ಯಾಚಾರ ನಡೆದಿತ್ತು. ಘಟನೆಗೆ ಸಂಬಂಧಿಸಿದಂತೆ ಇಲ್ಲಿನ ಪೊಲೀಸರು ಇಬ್ಬರನ್ನು ಬಂಧಿಸಿದ್ದರು. ಅದರ ವಿಚಾರಣೆ ಈಗಲೂ ನಡೆಯುತ್ತಿದೆ.
ನಾಲ್ಕು ಬಾರಿ ಆಸಿಡ್ ದಾಳಿ
ಅತ್ಯಾಚಾರದ ಅಸಹನೀಯ ನೋವು ಸಾಲದು ಎಂಬಂತೆ, ಆಕೆಯ ಮೇಲೆ 2011, 2013 ಮತ್ತು 2017ರಲ್ಲಿ ಎರಡು ಬಾರಿ ಆಸಿಡ್ ದಾಳಿ ನಡೆಯಿತು. ಈ ವರ್ಷ ಮಾರ್ಚ್ ನಲ್ಲಿ ಆಕೆಯ ಮೇಲೆ ಆಸಿಡ್ ದಾಳಿ ನಡೆದ ನಂತರ, ಆಕೆ ಚಿಕಿತ್ಸೆ ಪಡೆಯುತ್ತಿದ್ದ ಆಸ್ಪತ್ರೆಗೆ ತೆರಳಿ, ಉತ್ತರ ಪ್ರದೇಶ ಮುಖ್ಯಮಂತ್ರಿ ಯೋಗಿ ಆದಿತ್ಯನಾಥ್ ಸಾಂತ್ವನ ಹೇಳಲಿದ್ದರಲ್ಲದೆ, ಆಕೆಯ ಕುಟುಂಬಕ್ಕೆ ಪರಿಹಾರವನ್ನೂ ಘೋಷಿಸಿದ್ದರು.
ಈ ವಿಕೃತಿಗೂ ರಾಜಕೀಯ ಬಣ್ಣ
ಆ ಹುಡುಗಿ ಸಾವು ಬದುಕಿನ ನಡುವೆ ಹೋರಾಡುತ್ತ, ನೋವನುಭವಿಸುತ್ತ ಆಸ್ಪತ್ರೆಯಲ್ಲಿ ಮಲಗಿದ್ದರೆ, ಇತ್ತ ರಾಜಕೀಯ ಪಕ್ಷಗಳ ಕೆಸರೆರಚಾಟ ಶುರುವಾಗಿದೆ. ಯೋಗಿ ಸರ್ಕಾರದಲ್ಲಿ ಕಾನೂನು ಸುವ್ಯವಸ್ಥೆ ಹದಗೆಟ್ಟಿದೆ ಎಂದು ಕಾಂಗ್ರೆಸ್, ಸಮಾಜವಾದಿ, ಬಹುಜನ ಸಮಾಜವಾದಿ ಪಕ್ಷದ ನಾಯಕರು ಗುಡುಗುತ್ತಿದ್ದಾರೆ.
ದೇಶ ತಲೆತಗ್ಗಿಸುವ ವಿಚಾರ
ಈ ಆಸಿಡ್ ದಾಳಿ ದೇಶ ತಲೆತಗ್ಗಿಸುವ ವಿಚಾರ ಎಂದೇ ಎಲ್ಲೆಡೆಯಿಂದ ಆಕ್ರೋಶ ವ್ಯಕ್ತವಾಗುತ್ತಿದ್ದು, ಆರೋಪಿಗಳನ್ನು ಶೀಘ್ರ ಬಂಧಿಸುವಂತೆ ಒತ್ತಾಯಿಸಲಾಗುತ್ತಿದೆ. ಆರೋಪಿಗಳ ಸುಳಿವಿಗಾಗಿ ಹರಸಾಹಸ ಪಡುತ್ತಿರುವ ಲಕ್ನೋ ಪೊಲೀಸರು ಅತಿ ಶೀಘ್ರವಾಗಿ ಅವರನ್ನು ಪತ್ತೆ ಮಾಡುವುದಾಗಿ ಭರವಸೆ ನೀಡಿದ್ದಾರೆ.