ಈದ್ 2018: ಕೇರಳದಲ್ಲಿ ಶುಕ್ರವಾರ, ಇತರೆಡೆ ಶನಿವಾರ ಆಚರಣೆ
ನವದೆಹಲಿ, ಜೂನ್ 14: ಮುಸ್ಲಿಮರ ಪವಿತ್ರ ಹಬ್ಬ ಈದ್- ಉಲ್ ಫಿತ್ರ್ ವನ್ನು ಕೇರಳದಲ್ಲಿ ಶುಕ್ರವಾರದಂದೇ ಹಬ್ಬ ಆಚರಿಸಿದರೆ, ಭಾರತದ ಉಳಿದೆಡೆ ಶನಿವಾರದಂದು ಹಬ್ಬ ಆಚರಿಸಲಾಗುವುದು ಎಂದು ಜಾಮಾ ಮಸೀದಿಯ ಶಾಹಿ ಇಮಾಮ್ ಸಯದ್ ಅಹ್ಮದ್ ಬುಖಾರಿ ಅವರು ಹೇಳಿದ್ದಾರೆ.
ಕೇರಳದ ರಾಜಧಾನಿ ತಿರುವನಂತಪುರಂನಿಂದ ಸುಮಾರು 370 ಕಿ.ಮೀದಲ್ಲಿರುವ ಕೋಯಿಕ್ಕಾಡ್ ಜಿಲ್ಲೆಯಲ್ಲಿ ಚಂದ್ರ ದರ್ಶನವಾಗಿದ್ದರಿಂದ ಕೇರಳದಲ್ಲಿ ನಾಳೆ ದಿನ ಹಬ್ಬ ಆಚರಿಸಲಾಗುತ್ತದೆ.
ಚಂದ್ರ ದರ್ಶನದ ಮಾಹಿತಿ ಸಿಕ್ಕ ಬಳಿಕ ಜಾಮಾ ಮಸೀದಿಯ ಶಾಹಿ ಇಮಾಮ್ ಅವರು ಸಭೆ ನಡೆಸಿ, ಹಬ್ಬ ಆಚರಣೆ ಕುರಿತಂತೆ, ಅಧಿಕೃತ ಪ್ರಕಟಣೆ ಹೊರಡಿಸಿದ್ದಾರೆ.
ರಮ್ಜಾನ್ ತಿಂಗಳ ಅಂತ್ಯದಲ್ಲಿ ಈದ್ -ಉಲ್ ಫಿತ್ರ್ ಆಚರಿಸಲಾಗುತ್ತದೆ. ಒಂದು ತಿಂಗಳ ಅತ್ಯಂತ ಶ್ರದ್ಧೆಯ ಉಪವಾಸ ವ್ರತ (ರೋಜಾ) ತೆರೆಬಿದ್ದಿದೆ. ಸೂರ್ಯೋದಯದ ನಂತರ ಮತ್ತು ಸೂರ್ಯಾಸ್ತವಾಗುವ ಮೊದಲು ಹನಿ ನೀರು ಕೂಡ ಹೊಟ್ಟೆಗಿಳಿಸದಂತಹ ಕಠಿಣ ವ್ರತ ಪಾಲನೆ ಸುಲಭವಲ್ಲ. ಒಂದು ತಿಂಗಳ ರೋಜಾ ನಂತರ ವಿಶ್ವದೆಲ್ಲೆಡೆ ಈದ್ ಉಲ್ ಫಿತ್ರ್ ಆಚರಣೆ ಅಂಗವಾಗಿ ವಿಶೇಷ ಪ್ರಾರ್ಥನೆ ಸಲ್ಲಿಸಲಾಗುತ್ತದೆ.