'ಕಂದು ಕತ್ತೆ'ಗೆ ಸಿಕ್ಕಿತು ಪರೀಕ್ಷಾ ಪ್ರವೇಶ ಪತ್ರ!
ಶ್ರೀನಗರ, ಏಪ್ರಿಲ್ 28: ಸೆಮೆಸ್ಟರ್ ಪೂರ್ತಿ ತರಗತಿಗೆ ಚಕ್ಕರ್ ಹೊಡೆದು ಕೊನೆಗೆ ಹಾಜರಾಗಿ ಕಡಿಮೆಯಾಗಿ ಹಾಲ್ ಟಿಕೆಟ್ಗಾಗಿ ಪ್ರಿನ್ಸಿಪಾಲರನ್ನು ಅಂಗಲಾಚುವ ವಿದ್ಯಾರ್ಥಿಗಳು ಈ ಸುದ್ದಿ ಕೇಳಿದರೆ ದಂಗಾಗುತ್ತಾರೆ. ಕೆಲಸಕ್ಕಾಗಿ ಪ್ರವೇಶ ಪರೀಕ್ಷೆಗಳನ್ನು ಬರೆಯಲು ಅವಕಾಶ ಸಿಗದೆ ಒದ್ದಾಡುವ ಉದ್ಯೋಗಾಕಾಂಕ್ಷಿಗಳು ಬೇಸರಪಟ್ಟುಕೊಳ್ಳಲೂಬಹುದು.
ಜಮ್ಮು ಮತ್ತು ಕಾಶ್ಮೀರದ ಸೇವಾ ಆಯ್ಕೆ ಮಂಡಳಿಯು ತಹಶೀಲ್ದಾರ್ ಹುದ್ದೆಯ ನೇಮಕಾತಿ ಪರೀಕ್ಷೆಗೆ ಕತ್ತೆಯೊಂದಕ್ಕೆ ಹಾಲ್ಟಿಕೆಟ್ ನೀಡಿದೆ.
ಒಳ್ಳೇ ದಿನಗಳು ಬರುತ್ತವೆ: ವೈರಲ್ ಆದ ಅಸಾರಾಮ್ ಫೋನ್ ಇನ್ ಸಂಭಾಷಣೆ
ಅಂದಹಾಗೆ ಆ ಕತ್ತೆಯ ಹೆಸರು "ಕಚೂರ್ ಖಾರ್" (ಕಂದು ಕತ್ತೆ) ಎಂದು. ಈ ಕತ್ತೆ ಶ್ರೀನಗರದ ಖನ್ಯಾರ್ ಗ್ರಾಮದಲ್ಲಿರುವ ಸರ್ಕಾರಿ ಶಾಲೆಯಲ್ಲಿ ಭಾನುವಾರ ಮಧ್ಯಾಹ್ನ ಒಂದು ಗಂಟೆಯಿಂದ ಪರೀಕ್ಷೆ ಬರೆಯಬೇಕಿದೆ!
ಕತ್ತೆಗೆ ನೀರುವ ಪ್ರವೇಶಪತ್ರದ ಚಿತ್ರ ಟ್ವಿಟರ್ ಮತ್ತು ಫೇಸ್ಬುಕ್ಗಳಲ್ಲಿ ವ್ಯಾಪಕವಾಗಿ ಹರಿದಾಡುತ್ತಿದೆ. ಕತ್ತೆಯ ಹೆಸರಿನ ಜತೆ ಅದರ ಫೋಟೊಗ್ರಾಫ್ ಕೂಡ ಬಳಸಲಾಗಿದೆ.
ಈ ಸಂಬಂಧ ಕೆಲವರು ಮಂಡಳಿಗೆ ಕರೆ ಮಾಡಿದರೂ ಅವರಿಂದ ಸೂಕ್ತ ಪ್ರತಿಕ್ರಿಯೆ ಬರಲಿಲ್ಲ.
ಇದು ಕಿಡಿಗೇಡಿಗಳು ತೀಟೆಗಾಗಿ ಮಾಡಿರುವ ಕೃತ್ಯ ಎಂದು ಸಾಮಾಜಿಕ ಜಾಲತಾಣಗಳ ಬಳಕೆದಾರರು ಅಭಿಪ್ರಾಯಪಟ್ಟಿದ್ದಾರೆ. ಈ ರೀತಿ ಹಾಲ್ ಟಿಕೆಟ್ ಸೃಷ್ಟಿಸಿ ಬೇಕೆಂದೇ ಸುದ್ದಿ ಮಾಡುತ್ತಿದ್ದಾರೆ ಎಂದು ಆರೋಪಿಸಿದ್ದಾರೆ.
2015ರಲ್ಲಿ ವೃತ್ತಿಪರ ಪ್ರವೇಶ ಪರೀಕ್ಷಾ ಮಂಡಳಿಯು ಹಸುವೊಂದಕ್ಕೆ ಪರೀಕ್ಷೆ ಬರೆಯಲು ಪ್ರವೇಶಪತ್ರ ನೀಡಿದ್ದು ತೀವ್ರ ಚರ್ಚೆಗೆ ಗ್ರಾಸವಾಗಿತ್ತು. ಈ ಘಟನೆ ಕೂಡ ಜಮ್ಮು ಮತ್ತು ಕಾಶ್ಮೀರದಲ್ಲಿ ನಡೆದಿತ್ತು.