ಅಪಘಾತಕ್ಕೀಡಾದ ಹೆಲಿಕಾಪ್ಟರ್ ಅವಶೇಷ ಸಾಗಿಸಿದ 'ಚಿನೂಕ್': ವಿಡಿಯೋ
ರುದ್ರಪ್ರಯಾಗ, ಅಕ್ಟೋಬರ್ 17: ಕೇದಾರನಾಥ ದೇವಸ್ಥಾನದ ಸಮೀಪ 2018ರಲ್ಲಿ ಅಪಘಾತಕ್ಕೀಡಾಗಿದ್ದ ಭಾರತೀಯ ವಾಯುಪಡೆಯ ಎಂಐ-17 ಹೆಲಿಕಾಪ್ಟರ್ ಅವಶೇಷಗಳನ್ನು ಚಿನೂಕ್ ಹೆಲಿಕಾಪ್ಟರ್ ಶನಿವಾರ ತೆರವುಗೊಳಿಸಿತು.
ಎಂಐ-17 ಹೆಲಿಕಾಪ್ಟರ್ 2018ರಲ್ಲಿ ಕೇದಾರನಾಥ ದೇವಸ್ಥಾನದ ಸಮೀಪದ ಹೆಲಿಪ್ಯಾಡ್ನಲ್ಲಿ ಇಳಿಯುವ ವೇಳೆ ಕಬ್ಬಿಣದ ಕಟ್ಟಿಗೆ ಡಿಕ್ಕಿ ಹೊಡೆದು ಬೆಂಕಿ ಹೊತ್ತಿಕೊಂಡ ಪರಿಣಾಮ ಸುಟ್ಟುಹೋಗಿತ್ತು. ಹಾನಿಗೊಳಗಾದ ಹೆಲಿಕಾಪ್ಟರ್ಅನ್ನು ಐಎಎಫ್ ಅಲ್ಲಿಯೇ ಬಿಟ್ಟಿತ್ತು. ಆ ಹೆಲಿಕಾಪ್ಟರ್ನ ಪೈಲಟ್ ಸಣ್ಣಪುಟ್ಟ ಗಾಯಗಳಿಂದ ಪಾರಾಗಿದ್ದರು.
ಕೇದಾರನಾಥದಲ್ಲಿ ನಿರ್ಮಾಣ ಕಾರ್ಯಗಳನ್ನು ವೇಗವಾಗಿ ನಡೆಸಲು ಚಿನೂಕ್ ಹೆಲಿಕಾಪ್ಟರ್ಅನ್ನು ಬಳಸಿಕೊಳ್ಳಲಾಗುತ್ತಿದೆ. ಬಹಳ ತೂಕದ ಸೇನಾ ಹೆಲಿಕಾಪ್ಟರ್ ಚಿನೂಕ್ ಅನ್ನು ಮರು ನಿರ್ಮಾಣ ಕಾರ್ಯಗಳಿಗೆ ಬಳಸಲಾಗುವ ಭಾರಿ ತೂಕದ ಯಂತ್ರಗಳನ್ನು ಸಾಗಿಸಲು ಉಪಯೋಗಿಸಲಾಗುತ್ತದೆ.
#WATCH: A Chinook helicopter takes off from a helipad in Kedarnath shrine with the debris of Indian Air Force's MI-17 helicopter which had met with an accident in 2018. pic.twitter.com/IzsjU6MVXZ
— ANI (@ANI) October 17, 2020
ಇತ್ತೀಚೆಗೆ ಉತ್ತರಾಖಂಡದ ಮುಖ್ಯ ಕಾರ್ಯದರ್ಶಿ ಓಂ ಪ್ರಕಾಶ್ ಅವರು ಕೇದಾರನಾಥದಲ್ಲಿನ ಕಾಮಗಾರಿಗಳ ಪರಿಶೀಲನೆ ನಡೆಸುವಾಗ ಹತ್ತು ದಿನಗಳ ಒಳಗೆ ಹೆಲಿಪ್ಯಾಡ್ ಸಿದ್ಧಪಡಿಸುವಂತೆ ಡಿಡಿಎಂಎಗೆ ಸೂಚಿಸಿದ್ದರು. ಇದರ ಬಳಿಕ ಜಿಲ್ಲಾ ವಿಪತ್ತು ನಿರ್ವಹಣಾ ಪ್ರಾಧಿಕಾರವು (ಡಿಡಿಎಂಎ) ವಾಯುಪಡೆಯ ಚಿನೂಕ್ ಹೆಲಿಕಾಪ್ಟರ್ ಇಳಿಯಲು ಅನುಕೂಲವಾಗುವಂತೆ ಹೆಲಿಪ್ಯಾಡ್ ಅನ್ನು ಸಿದ್ಧಗೊಳಿಸಿತ್ತು.