ಪಂಜಾಬ್: ಹುಟ್ಟುಹಬ್ಬದಿನದಂದೇ ಅಮರಿಂದರ್ ಸಿಂಗ್ ಗೆ ಗೆಲುವಿನ ಗಿಫ್ಟ್

ಅಮೃತಸರ, ಮಾರ್ಚ್ 11: ಪಂಚರಾಜ್ಯಗಳ ವಿಧಾನಸಭೆ ಚುನಾವಣೆ ಫಲಿತಾಂಶ ಹೊರಬರಲಿರುವ ಇಂದೇ ಪಂಜಾಬ್ ನಲ್ಲಿ ಕಾಂಗ್ರೆಸ್ ಪಕ್ಷದಿಂದ ಮುಖ್ಯಮಂತ್ರಿ ಅಭ್ಯರ್ಥಿಯಾದ ಕ್ಯಾಪ್ಟನ್ ಅಮರಿಂದರ್ ಸಿಂಗ್ ಅವರು ತಮ್ಮ 75ನೇ ವರ್ಷದ ಹುಟ್ಟುಹಬ್ಬವನ್ನು ಆಚರಿಸಿಕೊಳ್ಳುತ್ತಿದ್ದಾರೆ.

ಅಂದಹಾಗೆ, ಈ ಬಾರಿಯ ಚುನಾವಣೆಯಲ್ಲಿ ಅವರು, ಎರಡು ಕ್ಷೇತ್ರಗಳಿಂದ ಸ್ಪರ್ಧೆಗಿಳಿದಿದ್ದರು. ಪಟಿಯಾಲಾ ಹಾಗೂ ಲಂಬಿ ವಿಧಾನಸಭೆ ಕ್ಷೇತ್ರಗಳಲ್ಲಿ ಸ್ಪರ್ಧಿಸಿದ್ದ ಅವರಿಗೆ, ಒಂದು ಸಿಹಿ ಹಾಗೂ ಮತ್ತೊಂದು ಕಹಿ ಅನುಭವ ಸಿಕ್ಕಿದೆ.

ಪಟಿಯಾಲಾದಲ್ಲಿ ಅವರು ಗೆಲವಿನತ್ತ ದಾಪುಗಾಲು ಹಾಕಿದ್ದರೆ, ಲಂಬಿಯಲ್ಲಿ ಅವರು, ಶಿರೋಮಣಿ ಅಕಾಲಿದಳದ ಅಭ್ಯರ್ಥಿ ಹಾಗೂ ಪಂಜಾಬ್ ನ ಹಾಲಿ ಮುಖ್ಯಮಂತ್ರಿ ಪ್ರಕಾಶ್ ಸಿಂಗ್ ಬಾದಲ್ ಅವರ ಮುಂದೆ ಸೋಲಿನತ್ತ ಮುಖ ಮಾಡಿದ್ದಾರೆ.

ಆದರೂ, ಪರವಾಗಿಲ್ಲ. ಕಾಂಗ್ರೆಸ್ ಪಕ್ಷವು ಈಗಾಗಲೇ ಘೋಷಿಸಿರುವಂತೆ ಕ್ಯಾಪ್ಟನ್ ಅಮರಿಂದರ್ ಸಿಂಗ್ ಅವರೇ ಮುಖ್ಯಮಂತ್ರಿಯಾಗಿ ಅಧಿಕಾರ ಪಡೆಯುವ ಸಾಧ್ಯತೆಗಳು ನಿಚ್ಚಳವಾಗಿವೆ.

ಚುನಾವಣಾ ಪ್ರಚಾರದ ವೇಳೆ, ಪಂಜಾಬ್ ರಾಜ್ಯದ ತುಂಬೆಲ್ಲಾ ಆವರಿಸಿರುವ ಡ್ರಗ್ಸ್ ಮಾಫಿಯಾವನ್ನು ಹತ್ತಿಕ್ಕುವುದನ್ನೇ ಪ್ರಧಾನವಾಗಿ ಹೇಳುತ್ತಾ ಬಂದಿದ್ದ ಕಾಂಗ್ರೆಸ್ ನ ಆಶ್ವಾಸನೆಗಳಿಗೆ ಅಲ್ಲಿನ ಮತದಾರರು ನಂಬಿ ಮತ ನೀಡಿದ್ದಾರೆ.

English summary

The Congress campaign was led by Captain Amarinder Singh, who turns 75 on March 11th, 2017, has been given a gift as he is getting nearer to chief Minister position of Punjab. His Congress party is at the edge of getting power in Punjab.