ಗೋಧ್ರಾದಲ್ಲಿ 2002ರ ನಂತರ ಮೊದಲ ಬಾರಿಗೆ ಬಿಜೆಪಿ ಗೆಲುವು
ಗೋಧ್ರಾ, ಡಿಸೆಂಬರ್ 18: 2002ರ ಬಳಿಕ ಮೊದಲ ಬಾರಿಗೆ ಗುಜರಾತ್ ನ ಗೋಧ್ರಾ ಕ್ಷೇತ್ರದಲ್ಲಿ ಬಿಜೆಪಿ ಗೆಲುವು ಸಾಧಿಸಿದೆ.
2002ರಲ್ಲಿ ನಡೆದಿದ್ದ ಗೋಧ್ರಾ ಹತ್ಯಾಕಾಂಡ ಹಾಗೂ ಆ ನಂತರದ ಉಂಟಾದ ಗಲಭೆಗಳ ನಂತರ ಆ ಕ್ಷೇತ್ರದಲ್ಲಿ ಬಿಜೆಪಿಗೆ ಗೆಲುವು ಮರೀಚಿಕೆಯಾಗಿತ್ತು. ಆದರೆ ಈ ಬಾರಿ ಸೋಲಿನ ಸರಣಿಯನ್ನು ಕಳಚಿಕೊಂಡಿರುವ ಬಿಜೆಪಿ ಗೋಧ್ರಾದಲ್ಲಿ ಗೆಲುವು ಸಾಧಿಸಿದೆ.
ಗುಜರಾತ್ : 99ಕ್ಕೆ ಬಿಜೆಪಿ ಸುಸ್ತು, 80ಕ್ಕೆ ಕಾಂಗ್ರೆಸ್ ಮಸ್ತು
ಗೋಧ್ರಾ ಕ್ಷೇತ್ರದಿಂದ ಸ್ಪರ್ಧಿಸಿದ್ದ ಬಿಜೆಪಿ ಸಿ.ಕೆ.ರೌಲ್ಜಿ ಅಲ್ಪ ಮತಗಳ ಅಂತರದಿಂದಾದರೂ ಬಿಜೆಪಿಗೆ ಗೆಲುವು ತಂದಿತ್ತಿದ್ದಾರೆ. ತಮ್ಮ ಸಮೀಪದ ಪ್ರತಿಸ್ಪರ್ಧಿ ಕಾಂಗ್ರೆಸ್ ನ ಲಾಲಾಬಾಯ್ ಅವರನ್ನು 258 ಮತಗಳ ಅಂತರದಿಂದ ಸೋಲಿಸಿದ್ದಾರೆ.
ಭಾರಿ ಕುತೂಹಲ ಕೆರಳಿಸಿದ್ದ ಈ ಕ್ಷೇತ್ರದಲ್ಲಿ ಕೊನೆಯ ಸುತ್ತಿನವರೆಗೆ ಗೆಲುವು ಚಂಚಲೆಯಾಗಿತ್ತು, ಆದರೆ ಅಂತಿಮವಾಗಿ ಬಿಜೆಪಿ ಪಾಲಿಗೆ ಜಯ ಒಲಿಯಿತು. ಆ ಮೂಲಕ 15 ವರ್ಷಗಳ ಸೋಲಿನ ಸರಪಣಿಯನ್ನು ಬಿಜೆಪಿ ಕಡಿದುಹಾಕಿತು.
ಗುಜರಾತ್ -ಹಿಮಾಚಲ: ಯಾರು ಗೆದ್ದರು? ಯಾರು ಬಿದ್ದರು?
ಅಯೋಧ್ಯೆಯಿಂದ ಸಾಬರಮತಿ ಎಕ್ಸ್ಪ್ರೆಸ್ ರೈಲಿನಲ್ಲಿ ವಾಪಾಸಾಗುತ್ತಿದ್ದ ಕರಸೇವಕರನ್ನು ಗೋಧ್ರಾದಲ್ಲಿ ಜೀವಂತವಾಗಿ ಸುಟ್ಟುಹಾಕಲಾಗಿತ್ತು. ಈ ಘಟನೆ ನಂತರ ಗುಜರಾತ್ನಲ್ಲಿ ಕೋಮು ಗಲಭೆಗಳು ಹುಟ್ಟಿಕೊಂಡಿತ್ತು. ಸರ್ಕಾರಿ ಅಂಕಿ ಸಂಖ್ಯೆಗಳ ಪ್ರಕಾರ 739 ಮುಸ್ಲಿಂರು ಹಾಗೂ 254 ಮಂದಿ ಹಿಂದೂಗಳು ಗಲಭೆಯಲ್ಲಿ ಪ್ರಾಣ ಕಳೆದುಕೊಂಡಿದ್ದರು.