ಪಂಜಾಬ್ ನಲ್ಲಿ 8 ಉಗ್ರರು, ಗುಪ್ತಚರ ಇಲಾಖೆಯಿಂದ ದಾಳಿಯ ಎಚ್ಚರಿಕೆ

ಚಂಡೀಗಢ, ಆಗಸ್ಟ್ 31: ಪಂಜಾಬ್ ರಾಜ್ಯದಲ್ಲಿ 8 ಜೈಷ್ ಎ ಮೊಹಮ್ಮದ್ ಉಗ್ರರು ಅಡಗಿಕೊಂಡಿದ್ದಾರೆ. ಜಮ್ಮು ಮತ್ತು ಕಾಶ್ಮೀರದ ಪೂಂಛ್ ಭಾಗದಿಂದ ಗಡಿ ದಾಟಿ ಈ ಉಗ್ರರು ಭಾರತದೊಳಕ್ಕೆ ಒಳನುಸುಳಿದ್ದು ಸದ್ಯ ಪಂಜಾಬ್ ನಲ್ಲಿದ್ದಾರೆ. ಇವರೆಲ್ಲಾ ಪಠಾಣ್ ಕೋಟ್ ರೀತಿಯ ದಾಳಿಗೆ ಯೋಜನೆ ರೂಪಿಸಿದ್ದಾರೆ ಎಂದು ಗುಪ್ತಚರ ಇಲಾಖೆ ಮುನ್ನೆಚ್ಚರಿಕೆ ನೀಡಿದೆ.

ವಿಶೇಷವೆಂದರೆ ಈ 8 ಜನ ಉಗ್ರರು ಕಳೆದ ವಾರ ಪುಲ್ವಾಮದಲ್ಲಿ ದಾಳಿ ನಡೆಸಿದ 11 ಜನರ ತಂಡದ ಒಂದು ಭಾಗ ಎಂದು ತಿಳಿದು ಬಂದಿದೆ. ಪುಲ್ವಾಮಾ ದಾಳಿಯಲ್ಲಿ 8 ಸೈನಿಕರು ಅಸುನೀಗಿದ್ದರು.

ಪಂಜಾಬ್ ನಲ್ಲಿ ಉಗ್ರರು ಇರುವ ಬಗ್ಗೆ ಪೊಲೀಸರಿಗೆ ಮುನ್ನೆಚ್ಚರಿಕೆ ನೀಡಲಾಗಿದ್ದು ಭದ್ರತೆಯನ್ನು ಬಲಗೊಳಿಸುವಂತೆ ಸೂಚನೆ ನೀಡಲಾಗಿದೆ. ಇನ್ನು ಉಗ್ರರು ಗುರುದಾಸ್ ಪುರದತ್ತ ಹೊರಟಿದ್ದಾರೆ ಎಂದು ಗುಪ್ತಚರ ಇಲಾಖೆ ಸ್ಪಷ್ಟ ಸಂದೇಶ ನೀಡಿದೆ.

ಸದ್ಯ ಪಾಕಿಸ್ತಾನ ಜೈಷ್ ಎ ಮೊಹಮ್ಮದ್ ಉಗ್ರರನ್ನೇ ಭಾರತಕ್ಕೆ ಕಳುಹಿಸುತ್ತಿದೆ ಎನ್ನಲಾಗಿದೆ. ಪಠಾನ್ ಕೋಟ್, ಸಂಸತ್ ದಾಳಿಯಂಥ ಪ್ರಮುಖ ದಾಳಿಯನ್ನು ಈ ಸಂಘಟನೆ ನಡೆಸುತ್ತಾ ಬಂದಿದ್ದು, ಜೈಷ್ ಎ ಮೊಹಮ್ಮದ್ ದೊಡ್ಡ ದೊಡ್ಡ ದಾಳಿಗಳಿಗೆ ಹೆಸರುವಾಸಿಯಾಗಿದೆ.

English summary

A very high alert has been sounded by the Intelligence Bureau after inputs suggested the presence of 8 Jaish-e-Mohammad terrorists in Punjab. The 8 terrorists who infiltrated into India through the Line of Control at Poonch, Jammu and Kashmir managed to slip into Punjab and could be attempting an attack on the scale of Pathankot, the IB has also said.