177 ಬಂದೂಕುಗಳೊಂದಿಗೆ ಶರಣಾದರು 644 ಉಗ್ರರು
ಗುವಾಹತಿ, ಜನವರಿ 23: ಎಂಟು ನಿಷೇಧಿತ ಉಗ್ರಗಾಮಿ ಸಂಘಟನೆಯ 644 ಮಂದಿ ಉಗ್ರಗಾಮಿಗಳು ಇಂದು ಒಂದೇ ದಿನ ಶರಣಾಗಿದ್ದಾರೆ.
ಒಟ್ಟು 177 ಬಂದೂಕುಗಳು ಸೇರಿ ಇತರ ಶಸ್ತ್ರಾಸ್ತ್ರಗಳ ಸಮೇತ ಈ ಉಗ್ರಗಾಮಿಗಳು ಶರಣಾಗಿದ್ದು, ಇಷ್ಟು ದೊಡ್ಡ ಸಂಖ್ಯೆಯಲ್ಲಿ ಉಗ್ರಗಾಮಿಗಳು ಶರಣಾಗಿರುವುದು ದೇಶದಲ್ಲಿ ಇದೇ ಮೊದಲು.
ಅಸ್ಸಾಂ ರಾಜಧಾನಿ ಗುವಾಹತಿಯಲ್ಲಿ ನಡೆದ ಕಾರ್ಯಕ್ರಮವೊಂದರಲ್ಲಿ ಮುಖ್ಯಮಂತ್ರಿ ಸರ್ವಾನಂದ ಸೊನೊವಾಲ್ ಅವರ ಸಮ್ಮುಖದಲ್ಲಿ ಈ ಉಗ್ರರೆಲ್ಲಾ ಶರಣಾಗಿದ್ದಾರೆ.
ಶರಣಾದವರೆಲ್ಲರೂ ನಿಷೇಧಿತ ಉಲ್ಬಾ (ಐ), ಎನ್ಡಿಎಫ್ಬಿ, ಆರ್ಎನ್ಎಲ್ಎಫ್, ಕೆಎಲ್ಒ, ಸಿಪಿಐ(ಮಾವೋವಾದಿ), ಎನ್ಎಸ್ಎಲ್ಎ, ಎಡಿಎಫ್ ಮತ್ತು ಎನ್ಎಲ್ಎಫ್ಬಿ ಸಂಘಟನೆಯವರಾಗಿದ್ದಾರೆ.
ಅಸ್ಸಾಂ ರಾಜ್ಯ ಪೊಲೀಸ್ ಮಹಾ ನಿರ್ದೇಶಕ ಭಾಸ್ಕರ್ ಜ್ಯೋತಿ ಮಹಂತ ಅವರು ಈ ಬಗ್ಗೆ ಮಾಹಿತಿ ನೀಡಿದ್ದು, 'ಈಶಾನ್ಯ ರಾಜ್ಯಗಳಲ್ಲಿ ಶಾಂತಿ ನೆಲೆಸಲು ಈ ಘಟನೆ ಬಹು ಮಹತ್ವದ್ದು ಎಂದಿದ್ದಾರೆ. ಈ ಎಲ್ಲ ಬಂಡುಕೋರರು ಮತ್ತು ಉಗ್ರಗಾಮಿಗಳು ಸಮಾಜದ ಮುಖ್ಯವಾಹಿನಿಗೆ ಬರಲು ಇಚ್ಛಿಸಿದ್ದಾರೆ' ಎಂದಿದ್ದಾರೆ.