ಹೀಗೂಉಂಟೆ ಎಂಬಂತೆ 2 ಹೈಪ್ರೊಫೈಲ್ ಕಳ್ಳತನಗಳು

ಮುಂಬೈ, ಡಿ.20: ಹೀಗೂ ಉಂಟೆ ಎಂದು ಟಿವಿ9 ನಾರಾಯಣ ಸ್ವಾಮಿ ಹೂಂಕರಿಸುವಂತೆ ಎರಡು ಹೈಪ್ರೊಫೈಲ್ ಕಳ್ಳತನಗಳು ಇತ್ತೀಚೆಗೆ ನಡೆದಿವೆ. ಒಂದು ಪ್ರಕರಣದಲ್ಲಿ ಕಳ್ಳತನ ನಡೆದು 1 ತಿಂಗಳಲ್ಲಿ ವರದಿಯಾಗಿದ್ದರೆ ಮತ್ತೊಂದರಲ್ಲಿ 8 ಕಾವಲುಗಾರರ ಕಣ್ಣು ತಪ್ಪಿಸಿ 11 ಮಳಿಗೆಗಳಿಗೆ ನುಗ್ಗಿದ ಕಳ್ಳರು ಭರಪೂರವಾಗಿ ದೋಚಿದ್ದಾರೆ.

ಅದು ಚೆನ್ನೈನಲ್ಲಿರುವ ವೈಭವೋಪೇತ ಬಂಗಲೆ. ಅಂತಿಂಥವರ ನೆರಳೂ ಸಹ ಅದರ ಮೇಲೆ ಬೀಳುವಂತಿಲ್ಲ. ಅಂಥ ಪ್ರತಿಷ್ಠಿತ ವ್ಯಕ್ತಿಯ ಮನೆಯದು. ಆದರೆ ಆ ಮನೆಯನ್ನು ತಿಂಗಳ ಹಿಂದೆ ಯಾವಾಗಲೋ ಕಳ್ಳರು ದೋಚಿದ್ದರೂ ಸರ್ವಶಕ್ತ ಮನೆಯಾಕೆಗೆ ಅದರ ಸುಳಿವೂ ಸಿಕ್ಕಿಲ್ಲ. (ಅಶ್ವಿನಿ ನಾಚಪ್ಪ ಕ್ರೆಡಿಟ್ ಕಾರ್ಡ್ ಕಳವು; 1.7 ಲಕ್ಷ ಡ್ರಾ )

ಯಾರಪ್ಪಾ ಆಕೆ ಅಂದರೆ PepsiCo ಕಂಪನಿಯ ಅಧ್ಯಕ್ಷೆ, ಪದ್ಮಭೂಷಣ ಇಂದ್ರಾ ನೂಯಿ. ಚೆನ್ನೈನ ಟಿ. ನಗರದಲ್ಲಿರುವ ಜಿಎನ್ ಚೆಟ್ಟಿ ರಸ್ತೆಯಲ್ಲಿರುವ ಆಕೆಯ ಬಿಗಿಭದ್ರತೆ ಮನೆಗೆ ಕಳ್ಳರು ನುಗ್ಗಿ ಬೆಲೆಬಾಳುವ ವಸ್ತುಗಳನ್ನು ಕದ್ದಿದ್ದಾರೆ. ಕಳ್ಳತನದ ಸಂಬಂಧ PepsiCo ಕಂಪನಿಯ ವತಿಯಿಂದ ಚೆನ್ನೈ ಪೊಲೀಸರಿಗೆ ದೂರು ನೀಡಲಾಗಿದೆ.

ಇಂದ್ರ ನೂಯಿ ತನ್ನ ಮನೆಗೆ ಮೊನ್ನೆ ಬುಧವಾರ ಭೇಟಿ ನೀಡಿದಾಗ ಕಳ್ಳತನ ಬೆಳಕಿಗೆ ಬಂದಿದೆ. ಪ್ರಸಕ್ತ ನಡೆಯುತ್ತಿರುವ ಮಾರ್ಗಳಿ ಸಂಗೀತ ಉತ್ಸವಕ್ಕೆ ಸಂಬಂಧಿಸಿದ ಕಾರ್ಯಕ್ರಮಗಳಲ್ಲಿ ಭಾಗವಹಿಸುವುದಕ್ಕಾಗಿ ನೂಯಿ ಚೆನ್ನೈಗೆ ಆಗಮಿಸಿದ್ದಾರೆ. (ಎಂಬಿಎ ಪದವೀಧರ ಬೆಳಗ್ಗೆ ಮ್ಯಾನೇಜರ್ ಸಂಜೆಗೆ ಸರಗಳ್ಳ)

ಜಿಎನ್ ಚೆಟ್ಟಿ ರಸ್ತೆಯಲ್ಲಿರುವ ತಮ್ಮ ಮನೆಗೆ ಹೋದಾಗ ಮುಂಬಾಗಿಲ ಬೀಗ ಒಡೆದಿರುವುದು ನೂಯಿಗೆ ಕಂಡುಬಂದಿದೆ. ಮನೆಯ ಕೋಣೆ/ ಕಪಾಟುಗಳನ್ನು ಜಾಲಾಡಲಾಗಿದೆ. ಮನೆಯಲ್ಲಿ ನೂಯಿಯ ತಾಯಿ ಶಾಂತಾ ಕೃಷ್ಣಮೂರ್ತಿ ವಾಸಿಸುತ್ತಿದ್ದರು. ಆರು ತಿಂಗಳ ಹಿಂದೆ ನೂಯಿ ತಾಯಿ ಅಮೆರಿಕಕ್ಕೆ ಹೋದ ಬಳಿಕ ಮನೆಗೆ ಬೀಗ ಹಾಕಿ. ಖಾಸಗಿ ಭದ್ರತಾ ಕಂಪನಿಯ ಉಸ್ತುವಾರಿಗೆ ವಹಿಸಲಾಗಿತ್ತು.

ಮದ್ರಾಸ್ ಕ್ರಿಶ್ಚಿಯನ್ ಕಾಲೇಜಿನಲ್ಲಿ ವ್ಯಾಸಂಗ ಮಾಡಿರುವ ನೂಯಿ ಅವರು ಪ್ರಸ್ತುತ, ತಮ್ಮ ಪತಿ ರಾಜ್ ಕೆ ನೂಯಿ ಅವರೊಂದಿಗೆ ಕನೆಕ್ಟಿಕಟ್, ಗ್ರೀನ್ ವಿಚ್ ನಲ್ಲಿ ವಾಸವಾಗಿದ್ದಾರೆ. ದಂಪತಿಗೆ ಇಬ್ಬರು ಪುತ್ರಿಯರು ಇದ್ದಾರೆ. (ಹೀಗೂ ಉಂಟೆ! 12 ಜೈನ ವಿಗ್ರಹ ಅಂಚೆಯಲ್ಲಿ ವಾಪಸ್)

ಇನ್ನು, ಮುಂಬೈನಲ್ಲಿ ಮಂಗಳವಾರ ರಾತ್ರಿ ಏನಾಗಿದೆಯೆಂದರೆ ಕಳ್ಳನೊಬ್ಬ ಘಾಟ್‌ ಕೋಪರ್‌ ನಲ್ಲಿರುವ ಕೆನರಾ ಬಿಸಿನೆಸ್ ಸೆಂಟರ್‌ ಗೆ ನುಗ್ಗಿ 10ಕ್ಕೂ ಹೆಚ್ಚು ಮಳಿಗೆಗಳ ಬಾಗಿಲುಗಳನ್ನು ಮೀಟಿ, ಸರಿಸುಮಾರು 1.5 ಲಕ್ಷ ರೂ. ಕದ್ದೊಯ್ದಿದ್ದಾನೆ.

ಸುಮಾರು ಒಂದು ಗಂಟೆ ಬಿಸಿನೆಸ್ ಸೆಂಟರಿನಲ್ಲಿದ್ದ ಕಳ್ಳ, ಒಂದಾದ ನಂತರ ಒಂದರಂತೆ ಮಳಿಗೆಗಳಿಗೆ ನುಗ್ಗಿ ಆರಾಮವಾಗಿ ತನ್ನ ಕೆಲಸ ಪೂರೈಸಿದ್ದಾನೆ. ಚಾಣಾಕ್ಷ ಕಳ್ಳ ಇಲ್ಲಿ ಕರ್ತವ್ಯದಲ್ಲಿದ್ದ 8 ಮಂದಿ ಕಾವಲುಗಾರರ ಕಣ್ಣುತಪ್ಪಿಸಿ ಈ ಕೃತ್ಯವೆಸಗಿದ್ದಾನೆ. ಆದರೆ ಈ ಕಟ್ಟಡದಲ್ಲಿ ಅಳವಡಿಸಲಾಗಿದ್ದ ಏಕೈಕ ಸಿಸಿಟಿವಿ ಕ್ಯಾಮರದಲ್ಲಿ ಕಳ್ಳನ ಕೆಲವು ಚಲನವಲನಗಳು ದಾಖಲಾಗಿವೆ.

English summary

PepsiCo CEO Padma Bhushan Indra Nooyi's house at Chennai burgled. Police said the front door on the house on G N Chetty Road in T Nagar was open. A few cupboards were found open and some articles were strewn on the floor. However Pondy Bazaar inspector G Venkatesan said so far no material was registered as missing from Nooyi's house.