ಪಂಜಾಬ್ ಪೊಲೀಸ್ ಕಾನ್ ಸ್ಟೇಬಲ್ ಗೆ 2 ಕೋಟಿ ರುಪಾಯಿ ಲಾಟರಿ ಬಹುಮಾನ
ಚಂಡೀಗಢ, ಜೂನ್ 23: ಪಂಜಾಬ್ ನ ಪೊಲೀಸ್ ಕಾನ್ ಸ್ಟೇಬಲ್ ಅಶೋಕ್ ಕುಮಾರ್ ಅವರು ಅಲ್ಲಿನ ರಾಜ್ಯ ಸರಕಾರದ ಹೊಸ ವರ್ಷದ ಲೊಹ್ರಿ ಬಂಪರ್ ಡ್ರಾ ತಮ್ಮದಾಗಿಸಿಕೊಂಡಿದ್ದು, ಎರಡು ಕೋಟಿ ಬಂಪರ್ ಬಹುಮಾನ ತಮ್ಮದಾಗಿಸಿಕೊಂಡಿದ್ದಾರೆ. ಭಾನುವಾರದಂದು ಈ ಲಾಟರಿ ಬಹುಮಾನದ ಘೋಷಣೆ ಆಗಿದೆ.
ಮೂವತ್ತು ವರ್ಷದ ಅಶೋಕ್ ಕುಮಾರ್ ಹೋಶಿಯಾರ್ ಪುರ್ ಜಿಲ್ಲೆಯ ಮೋಟಿಯಾನ್ ಹಳ್ಳಿಯವರು. ಎಂದಾದರೂ ಒಂದು ದಿನ ತಾನು ಕೋಟ್ಯಧಿಪತಿ ಆಗಬಹುದು ಎಂಬ ಕಲ್ಪನೆ ಕೂಡ ಇರಲಿಲ್ಲ ಎಂದು ಆತ ಹೇಳಿದ್ದಾರೆ. ಇನ್ನೂ ಆಸಕ್ತಿಕರ ವಿಷಯ ಏನೆಂದರೆ, ಆ ಲಾಟರಿಯನ್ನು ಎಲ್ಲಿಟಿದ್ದೇನೆ ಎಂಬ ಸಂಗತಿಯನ್ನೇ ಅವರು ಮರೆತು ಬಿಟ್ಟಿದ್ದರು.
ಒಂಬತ್ತು ವರ್ಷದ ಹುಡುಗಿಗೆ 6.93 ಕೋಟಿ ರೂಪಾಯಿ ಲಾಟರಿ!
ಆ ನಂತರ ಪೊಲೀಸ್ ಠಾಣೆಯಲ್ಲಿನ ಡೆಸ್ಕ್ ಡ್ರಾವರ್ ನಲ್ಲಿ ಲಾಟರಿ ಟಿಕೆಟ್ ಪತ್ತೆಯಾಗಿದೆ. ಈ ಬಂಪರ್ ಬಹುಮಾನದ ಲಾಟರಿ ಮೊತ್ತದಿಂದ ಬದುಕೇ ಬದಲಾಗಿದೆ ಎಂದು ಅಶೋಕ್ ಕುಮಾರ್ ಹೇಳಿದ್ದಾರೆ.
ಲಾಟರಿ ಇಲಾಖೆಯ ವಕ್ತಾರರು ಮಾತನಾಡಿ, ಪಂಜಾಬ್ ರಾಜ್ಯ ಸಾವನ್ ಬಂಪರ್ 2019 ಮಾರಾಟ ಇನ್ನೂ ನಡೆಯುತ್ತಿದೆ. ಜುಲೈ 8ನೇ ತಾರೀಕು ಡ್ರಾ ಆಗಲಿದೆ. ಮೊದಲ ಬಹುಮಾನ 3 ಕೋಟಿ ರುಪಾಯಿಯು ಇಬ್ಬರು ವಿಜಯಶಾಲಿಗಳಿಗೆ 1.5 ಕೋಟಿ ಹಾಗೂ 1.5 ಕೋಟಿ ಹಂಚಲಾಗುತ್ತದೆ ಎಂದಿದ್ದಾರೆ.
ಎರಡನೇ ಬಹುಮಾನವಾಗಿ ತಲಾ 10 ಲಕ್ಷ ರುಪಾಯಿಗಳನ್ನು ತಲಾ 5 ಮಂದಿಗೆ, ಮೂರನೇ ಬಹುಮಾನ ತಲಾ 2.5 ಲಕ್ಷ ರುಪಾಯಿಯನ್ನು 20 ವಿಜಯಿಗಳಿಗೆ ವಿತರಿಸಲಾಗುವುದು.