ಶಾಪಿಂಗ್ ಮಾರ್ಟ್ಗೆ ಏಕಾಏಕಿ ನುಗ್ಗಿ ಗುಂಡು ಹಾರಿಸಿದ ದುಷ್ಕರ್ಮಿಗಳ ದಂಡು
ಚಂಡೀಗಢ, ಮಾರ್ಚ್ 25: ಮೆಗಾ ಮಾರ್ಟ್ ಸ್ಟೋರ್ಗೆ ಏಕಾಏಕಿ ನುಗ್ಗಿದ 20-25 ದುಷ್ಕರ್ಮಿಗಳ ದಂಡು ಕಿಟಕಿಗಳನ್ನು ಪುಡಿ ಮಾಡಿ ಮನಬಂದಂತೆ ಗುಂಡು ಹಾರಿಸಿರುವ ಘಟನೆ ಪಂಜಾಬ್ನಲ್ಲಿ ನಡೆದಿದೆ.
ಗುರುವಾರ ಪಂಜಾಬ್ನಲ್ಲಿನ ಟಾರ್ನ್ ತರಣ್ ಜಿಲ್ಲೆಯ ವಿಶಾಲ್ ಮಾರ್ಟ್ನಲ್ಲಿ ಈ ಘಟನೆ ನಡೆದಿದೆ. ಈ ಶಾಪಿಂಗ್ ಮಾರ್ಟ್ ಅನ್ನು ಈಚೆಗಷ್ಟೆ ಉದ್ಘಾಟನೆಗೊಳಿಸಲಾಗಿತ್ತು. ಟಾರ್ನ್ ತರಣ್ ಹಿರಿಯ ಎಸ್ಪಿ ಧ್ರುಮನ್ ನಿಂಬಲ್ ನಿವಾಸದ ಸಮೀಪದಲ್ಲೇ ಈ ಮಾರ್ಟ್ ಇದೆ.
ಅಮೆರಿಕದ ಸೂಪರ್ಮಾರ್ಕೆಟ್ನಲ್ಲಿ ಗುಂಡಿನ ದಾಳಿ: ಪೊಲೀಸರು ಸೇರಿ 10 ಸಾವು
ಈ ಘಟನೆ ಬೆಳಕಿಗೆ ಬರುತ್ತಿದ್ದಂತೆ ಪೊಲೀಸರು ಸ್ಥಳಕ್ಕೆ ಧಾವಿಸಿ, ತನಿಖೆ ಆರಂಭಿಸಿದ್ದಾರೆ. ಘಟನೆಯಲ್ಲಿ ಯಾರಿಗೂ ತೊಂದರೆಯಾಗಿಲ್ಲ ಎಂದು ತಿಳಿದುಬಂದಿದೆ.
ಹೊಸದಾಗಿ ಉದ್ಘಾಟನೆಯಾದ್ದರಿಂದ ಶಾಪಿಂಗ್ ಮಾರ್ಟ್ನಲ್ಲಿ ಅತಿ ಹೆಚ್ಚಿನ ಸಂಖ್ಯೆಯಲ್ಲಿ ಜನ ಸೇರಿದ್ದರು. ಜನರು ಖರೀದಿಯಲ್ಲಿ ನಿರತರಾಗಿದ್ದ ವೇಳೆ ಹಾಡಹಗಲಲ್ಲಿಯೇ ಏಕಾಏಕಿ 20-25 ದುಷ್ಕರ್ಮಿಗಳು ಮಾರ್ಟ್ಗೆ ನುಗ್ಗಿ ಎಲ್ಲಾ ಕಿಟಕಿಗಳನ್ನು ಒಡೆದು ಹಾಕಿದ್ದಾರೆ. ಅವರನ್ನು ತಡೆಯಲು ಪ್ರಯತ್ನಿಸಿದಾಗ ಗುಂಡು ಹಾರಿಸಿದ್ದಾರೆ ಎಂದು ಮಾರ್ಟ್ ನಿರ್ದೇಶಕರು ತಿಳಿಸಿದ್ದಾರೆ.
ಈ ಘಟನೆ ಸಿಸಿ ಟಿವಿಯಲ್ಲಿ ಸೆರೆಯಾಗಿದೆ. ಇದನ್ನಾಧರಿಸಿ ಪೊಲೀಸರು ತನಿಖೆ ಮುಂದುವರೆಸಿ, ದುಷ್ಕರ್ಮಿಗಳ ಸೆರೆಗೆ ಬಲೆ ಬೀಸಿದ್ದಾರೆ.