ವಿಶ್ವದ ಅತಿ ದುಬಾರಿಯಾದ ಈ ಫೋನ್ ನ ಬೆಲೆ 2.3 ಕೋಟಿ!
439 ಮಾಣಿಕ್ಯಗಳನ್ನು ಹಾಗೂ ಚಿನ್ನದ ಲೇಪನಗಳನ್ನು ಹೊಂದಿರುವ ಫೋನ್ ಅನ್ನು ವೆರ್ಟೋ ಕಂಪನಿ ಬಿಡುಗಡೆಗೊಳಿಸಿದ್ದು, ಇದು ವಿಶ್ವದ ಅತ್ಯಂತ ದುಬಾರಿ ಫೋನ್ ಎನಿಸಿದೆ.
ನವದೆಹಲಿ, ಮೇ 24: ಐಶಾರಾಮಿ ಫೋನ್ ಗಳನ್ನು ತಯಾರಿಸುವ ಕಂಪನಿಯಾದ ವೆರ್ಟು, ಬುಧವಾರ ಹೊಸತೊಂದು ಫೋನ್ ಬಿಡುಗಡೆಗೊಳಿಸಿದೆ. ಅದರ ಬೆಲೆ 3 ಲಕ್ಷದ 60 ಸಾವಿರ ಅಮೆರಿಕನ್ ಡಾಲರ್ ಎಂದು ಹೇಳಲಾಗಿದೆ. ಅಂದರೆ, ಭಾರತೀಯ ಕರೆನ್ಸಿಯಲ್ಲಿ ಇದರ ಬೆಲೆ 2 ಕೋಟಿ 30 ಲಕ್ಷ ರು.!
ಹಾವಿನ ಡಿಸೈನ್ ಇರುವ ಈ ಫೋನ್ ನ ಪೂರ್ತಿ ಹೆಸರು ವೆರ್ಟು ಸಿಗ್ನೇಚರ್ ಕೋಬ್ರಾ. ಈ ಪ್ರತಿ ಫೋನ್ ನಲ್ಲಿ 439 ಮಾಣಿಕ್ಯಗಳನ್ನು ಉಪಯೋಗಿಸಲಾಗಿಯಂತೆ. ಕೋಬ್ರಾ ಹಾವಿನ ಮಾದರಿಯಲ್ಲೇ ಫೋನ್ ನ ಕೇಸ್ ರಚಿಸಲಾಗಿದ್ದು, ಹಾವಿನ ಕಣ್ಣುಗಳನ್ನು ಹೋಲುವ ವಿಶೇಷ ಬಟನ್ ಗಳನ್ನು ಚಿನ್ನದ ಲೇಪನವುಳ್ಳ ಫ್ರೇಮ್ ನಲ್ಲಿ ಅಳವಡಿಸಲಾಗಿದೆ ಎಂದು ಕಂಪನಿ ಹೇಳಿಕೊಂಡಿದೆ.[ONLINEನಲ್ಲಿ ದೊರೆಯುತ್ತಿರುವ ತೆಂಡೂಲ್ಕರ್ ಹೆಸರಿನ ಫೋನ್ ಹೇಗಿದೆ?]
ಅಂದಹಾಗೆ, ಈ ಮೊಬೈಲ್ ಕೊಳ್ಳುವವರು ಚೀನಾದ ಆನ್ ಲೈನ್ ಜಾಲತಾಣ ಜೆಡಿ.ಕಾಮ್ ನಲ್ಲಿ ಖರೀದಿ ಮಾಡಬಹುದು.
ಇನ್ನು, ತಾಂತ್ರಿಕತೆ ವಿಚಾರಕ್ಕೆ ಬಂದರೆ, ಈ ಮೊಬೈಲ್ ಕೇವಲ 2 ಇಂಚು ಅಳತೆಯ ಕ್ಯುವಿಜಿಎ ಪರದೆ ಹೊಂದಿದ್ದು, 240X320 ಟಿಎಫ್ ಟಿ ಎಲ್ ಸಿಡಿ ತಂತ್ರಜ್ಞಾನ ಹೊಂದಿದೆ. 2 ಜಿಬಿ RAM ಹೊಂದಿರುವ ಇದು 16 ಜಿಬಿ ಆಂತರಿಕ ಸಂಗ್ರಹ ಸಾಮರ್ಥ್ಯ ಹೊಂದಿದೆ.
ಬೇರ್ಪಡಿಸಬಹುದಾದ ಬ್ಯಾಟರಿಯನ್ನು ಹೊಂದಿರುವ ಇದು ಒಮ್ಮೆ ಚಾರ್ಜ್ ಮಾಡಿದರೆ, ಟಾಕ್ ಟೈಮ್ ಮೋಡ್ ನಲ್ಲಿ ಐದೂವರೆ ಗಂಟೆಗಳ ಕಾಲ ಸೇವೆ ನೀಡಬಲ್ಲದಂತೆ.