ಇನ್ಫೋಸಿಸ್ ಫೌಂಡೇಷನ್ ತೊರೆದ ವಿಶಾಲ್ ಸಿಕ್ಕಾ ಪತ್ನಿ ವಂದನಾ

ವಿಶಾಲ್ ಸಿಕ್ಕಾ ಇನ್ಫೋಸಿಸ್ ನ ಸಿಇಒ ಹಾಗೂ ವ್ಯವಸ್ಥಾಪಕ ನಿರ್ದೇಶಕ ಹುದ್ದೆಯನ್ನು ತ್ಯಜಿಸಿದ ನಂತರ, ಇದೀಗ ಅವರ ಪತ್ನಿ ವಂದನಾ ಸಿಕ್ಕಾ ಇನ್ಫೋಸಿಸ್ ಫೌಂಡೇಷನ್ ನ ಯುಎಸ್ ಎ ಮುಖ್ಯಸ್ಥೆ ಹುದ್ದೆಯಿಂದ ನಿರ್ಗಮಿಸಿದ್ದಾರೆ. ಅಂದಹಾಗೆ ಕಂಪೆನಿಯ ಸಮಾಜ ಸೇವಾ ಕಾರ್ಯಕ್ಕೆ ಮೀಸಲಾಗಿರುವಂಥದ್ದು ಇನ್ಫೋಸಿಸ್ ಫೌಂಡೇಷನ್.

"ಇನ್ಫೋಸಿಸ್ ಫೌಂಡೇಷನ್ ಯುಎಸ್ ಎ ಅಧ್ಯಕ್ಷೆ ಸ್ಥಾನದಿಂದ ಹೊರನಡೆಯಲು ನಿರ್ಧರಿಸಿದ್ದೇನೆ. ಆದ್ದರಿಂದ ಈ ಇಮೇಲ್ ಬರೆಯುತ್ತಿದ್ದೇನೆ. ಆದರೆ ನಮಗೆ ಗೊತ್ತಿದೆ, ಒಬ್ಬ ವ್ಯಕ್ತಿಯ ಘನವಾದ ಪ್ರೀತಿ ಯಾವುದೇ ಒಂದು ಸಂಸ್ಥೆಗೆ ಸೀಮಿತ ಆಗಿರುವುದಿಲ್ಲ. ಆದರೆ ಇದೊಂದು ತಾತ್ಕಾಲಿಕ ಬಿಡುವು" ಎಂದು ರಾಜೀನಾಮೆ ಇಮೇಲ್ ನಲ್ಲಿ ವಂದನಾ ತಿಳಿಸಿದ್ದಾರೆ.

ಇದು ಅಚ್ಚರಿಯ ಬೆಳವಣಿಗೆ ಆಗಿದೆ. ಈ ತಿಂಗಳ ಆರಂಭದಲ್ಲಿ ವಿಶಾಲ್ ಸಿಕ್ಕಾ ಇನ್ಫೋಸಿಸ್ ತ್ಯಜಿಸಿದ್ದರು. ಇಂಥ ನಿರ್ಧಾರದ ಹಿಂದೆ ನಾರಾಯಣಮೂರ್ತಿ ಅವರ ಆರೋಪಗಳು ಕೆಲಸ ಮಾಡಿವೆ ಎಂದು ಆಡಳಿತ ಮಂಡಳಿ ಹಾಗೂ ವಿಶಾಲ್ ಸಿಕ್ಕಾ ಅವರ ಆಕ್ಷೇಪವಾಗಿತ್ತು.

ಈ ಮಧ್ಯೆ ನಂದನ್ ನಿಲೇಕಣಿ ಅವರನ್ನು ನಾನ್ ಎಕ್ಸ್ ಕ್ಯೂಟಿವ್ ಚೇರ್ ಮನ್ ಆಗಿ ಇನ್ಫೋಸಿಸ್ ಗೆ ನೇಮಕ ಮಾಡಲಾಗಿದೆ. ಹೊಸ ಸಿಇಒಗೆ ಹುಡುಕಾಟ ಮುಂದುವರಿದಿದೆ.

English summary

Former Infosys CEO and MD Vishal Sikka's wife Vandana Sikka has quit the Infosys Foundation. She was the chairperson of Infosys Foundation, USA.